ތަޢުލީމާއި ތަރުބިއްޔަތުގެ ދާއިރާ ކުރިއަރުވަން، އިސްލާމިކް އޯގަނައިޒޭޝަން ފޯ ކަލްޗަރ އެންޑް ސިވިލައިޒޭޝަން (އައި.އޯ.ސީ.ސީ)އިން ފަންޑެއް އުފައްދައިފިއެވެ.
"އައިއޯސީސީ ވަޤްފް ފަންޑު"ގެ ނަމުގައި އުފެއްދި މިފަންޑު ޤާއިމުކުރުމުގެ މަޤްސަދަކީ، މުސްތަގުބަލުގައި މި ފަންޑު ދިރުވައިގެން ތަޢުލީމާއި ތަރުބިއްޔަތާއި އިސްލާމީ ހަޟާރަތާއި ސަޤާފަތް ދިރުވައި އާލާކުރުމަށް މިފަންޑުން ޚަރަދުކުރުމެވެ.
އައިއޯސީސީން ވިދާޅުވީ މި ފަންޑު ގާއިމުވެގެންވަނީ އެތަނުން ނެރޭ ޢިލްމީ ފޮތްތަކާއި ދިރާސާތަކުން ލިބޭ ފައިސާއާއި ހެޔޮ އެދޭ ފަރާތްތަކުން ދޭ އެހީއާއި މިފަދަ އެހީތަކުގެ މައްޗަށްކަމަށެވެ. އަދި ހަމައެއާއެކު ކައިރި މުސްތަގުބަލެއްގައި ގިނަ ފޮތްތަކެއް ޗާޕުކުރުމަށް ދަނީ ތައްޔާރުވަމުންކަމަށް އެ އޯގަނައިޒޭޝަނުން ވިދާޅުވެއެވެ.
Ilm Institute for Islamic Studies and Islamic Organization for Culture and Civilization (IOCC) have agreed to collaborate on the development of a preschool-specific book set. @ilminstitutemv pic.twitter.com/IH3aWIMoeZ
— IOCC Maldives (@IOCCMv) February 8, 2022
އައިއޯސީސީން ގިނަ ފޮތްތަކެއް ޗާޕުކުރުމަށް ތައްޔާރުވަމުން ދާއިރު، ޢިލްމް އިންސްޓިޓިއުޓް ފޯ އިސްލާމިކް ސްޓަޑީޒްއާ ގުޅިގެން ޕްރީ ސްކޫލް މަރުޙަލާގައި ކިޔަވައިދޭން ޚާއްސަކޮށްގެން ފޮތް ސެޓެއް އެކުލަވާލުމުގެ އެއްބަސްވުމުގައި ވަނީ ސޮއެކޮށްފައެވެ.
މި ފޮތް ސެޓުގައި ޖުމްލަ 40 ފޮތް ހިމެނޭއިރު މި ފޮތްތައް ހަތަރު މަރުހަލާއަކަށް ބެހިގެންވެއެވެ. އެ މަރުހަލާތަކަކީ ބޭބީ ނާސަރީ، ނާސަރީ، ޖޭކޭޖީ އަދި އެސްކޭޖީއެވެ. އެ ފޮތްތައް ތައްޔާރުކުރެވޭ ދާއިރާތަކަކީ އިސްލާމް، ދިވެހި، ގުރުއާން، ހިސާބު، އިނގިރޭސި، ސޯޝަލް ސްޓަޑީސް، ސައެންސް އެންޑް ޓެކްނޮލެޖީ، ކްރިއޭޓިވް އާރޓްސް، ހެލްތު އެންޑް ވެލްބީން، އަދި ވެލިއުސް އެންޑް އެތިކްސްއެވެ.