ރާއްޖޭގައި ފުރަތަމަ ފަހަރަށް ޓީ10 ކްރިކެޓް މުބާރާތެއް ބާއްވަން ނިންމައިފިއެވެ. ކްރިކެޓް ބޯޑް އޮފް މޯލްޑިވްސް (ސީބީއެމް) އިން ބުނީ ދުނިޔޭގެ އެކި ގައުމުތަކުގައި ވެސް ފޯރިގަދަކޮށް ބާއްވަމުން އަންނަ ޓީ10 ކްރިކެޓް، ރާއްޖެ އަށް ތައާރަފްކޮށް، ކުރިއަށްގެންދާ ފުރަތަމަ މުބާރާތް އޮންނާނީ މި މަހުގެ 18 ވަނަ ދުވަހުކަމަށެވެ. މި މުބާރާތުގައި ޓީމުތަކުން ބައިވެރިވުމުގެ މުއްދަތު މިއަދުގެ ނިޔަލަށް ވަނީ ހަމަވެފައެވެ.
ޓީ10 ކްރިކެޓް މުބާރާތެއް ރާއްޖޭގައި ބާއްވަން ނިންމީ ކްރިކެޓް ކުޅުންތެރިންނަށް ވާދަކުރެވޭނެ އިތުރު މުބާރާތެއް އިންތިޒާމުކުރުމާއި، ކްރިކެޓްގެ ދުނިޔޭގައި ކުރިއަރަމުން އަންނަ ޓީ10 ކްރިކެޓް ރާއްޖޭގައި ވެސް ފޯރީގައި ކުރިއަށް ދިއުމުގެ ބޭނުމުގައި ކަމަށް ކްރިކެޓް ބޮޑު އޮފް މޯލްޑިވްސްއިން މަޢުލޫމާތުދޭ
މި މުބާރާތުގައި ގާތްގަނޑަކަށް 10 ވަރަކަށް ޓީމު ފުރަތަމަ ޓީ10 ކްރިކެޓް މުބާރާތުގައި ވާދަކުރާނެކަމށްވެސް ސީބީއެމްއިން މަޢުލޫމާތުދެއެވެ.
ދާދި ފަހުން ކްރިކެޓް ބޯޑުން ވަނީ ރާއްޖޭގެ ޓީ20 ކްރިކެޓް ލީގު ކާމިޔާބުކަމާ އެކު ކުރިޔަށްގެންގޮސް ނިންމާލައިފައެވެ.
ކްރިކެޓް ބޯޑްގެ މިހާރުގެ ރައީސް މުހައްމަދު ފައިސަލްގެ މޭސްތިރިކަމުގެ ދަށުން ރާއްޖޭގެ ކްރިކެޓް ކުރިއެރުވުމަށް ގިނަ ކަންތައްތަކެއް އަންނަނީ ތަޢާރަފްކުރަމުންނެވެ. އެ ގޮތުން ކްރިކެޓްގެ މައުލޫމާތާއި މެޗުތަކުގެ ނަތީޖާ ވަގުތުން ބަލައިލެވޭ ގޮތަށް މޯލްޑިވްސް ކްރިކެޓް އެޕެއް ލޯންޗް ކުރުމުގެ އިތުރުން، 2030 އަށް އަމާޒުކޮށް ދުރުރާސްތާ ޕްލޭނެއް ވަނީ އެކުލަވާލައިފައެވެ.
މީގެ އިތުރުން ރާއްޖެ އަށް އިންޑޯ ކްރިކެޓް ތައާރަފް ކުރުމުގެ އިތުރުން ގައުމީ ކްރިކެޓް ޓީމުން ބައިނަލްއަގުވާމީ މުބާރާތްތަކުގައި ދައްކާ ޕާފޯމަންސަށް ބަލައި، ބޯނަސް ސްކީމެއް ވެސް ވަނީ ތައާރަފްކޮށްފައެވެ.