މިޔަންމާގެ ކުރީގެ އެންމެ އިސްވެރިޔާ އަން ސަން ސޫ ކީގެ ނޭޝަނަލް ލީގު ފޮރ ޑިމޮކްރެސީ، އެންއެލްޑީގެ އިސްވެރިންނާ ބައްދަލުކުރެއްވުމުގެ ޙުއްދަ ދެކުނުއިރުމަތީ އޭޝިޔާގެ ޤައުމުތަކުގެ މައި ޖަމުޢިއްޔާ، އާސިޔާނުގެ މަންދޫބަށް ދިނުމަށް މިޔަންމާގެ އަސްކަރީ ސަރުކާރުން ނިންމައިފިއެވެ.
މީގެ އެއް އަހަރުކުރިން މިޔަންމާގައި ކުރި އަސްކަރީ ބަޣާވާތަށްފަހު ސޫ ކީއާއި އޭނާގެ ޕާޓީގެ އިސްވެރިންވަނީ ޖަލުގައި ބަންދުކޮށްފައެވެ. އެއާއެކު މިޔަންމާގައި ކުރި އަސްކަރީ ބަޣާވާތާ ދެކޮޅަށް އެ ޤައުމުގެ އެތައް މިލިޔަން ޢާއްމުންނެއްވަނީ މުޒާހަރާކޮށްފައެވެ. ރައްދުގައި މިޔަންމާގެ އަސްކަރިއްޔާއިންވަނީ މުޒާހަރާކުރަމުންދާ ޢާއްމުންނާ ދެކޮޅަށް ލާއިންސާނީ ޢަމަލުތަކެއް ހިންގައި 1،500 މީހުން މަރާލައި 8،800 މީހުން އެއްވެސް ޝަރީޢަތަކާ ނުލައި ޖަލުގައި ބަންދުކޮށްފައެވެ. މިޔަންމާގެ ޙާލަތާމެދު ކަނބޮޑުވުން ފާޅުކޮށް މައްސަލަ ޙައްލުކުރުމަށް އާސިޔާނުންވަނީ އެ ޤައުމަށް ޚާއްޞަ މަންދޫބެއް ކަނޑައަޅައިފައެވެ.
އަވަށްޓެރި ކެންބޯޑިޔާގެ ސަރުކާރުން ބުނެފައިވާ ގޮތުގައި އެ ޤައުމުގެ ބޮޑުވަޒީރު ހުން ސެންއާއި މިޔަންމާގެ އަސްކަރީވެރިޔާ މިން އައުންގް ލެއިންވަނީ ޖަނަވަރީ މަހުގެ 24ވަނަ ދުވަހު ތެލެފޯނު މެދުވެރިކޮށް މަޝްވަރާކުރައްވައިފައެވެ. އެ މަޝްވަރާތަކުގައި އާސިޔާނުގެ މަންދޫބަށް ސޫ ކީގެ ޕާޓީގެ އިސްވެރިންނާ ބައްދަލުކުރެއްވުމުގެ ފުރުޞަތު ފުރަތަމަ ފަހަރަށް ދެއްވުމަށް މިން އެއްބަސްވެވަޑައިގެންނެވިކަމަށް ކެންބޯޑިޔާގެ ސަރުކާރުންވަނީ ބުނެފައެވެ. ނަމަވެސް އާސިޔާނުގެ މަންދޫބު ބައްދަލުކުރައްވާނީ ކޮން ބޭފުޅުންނަކާކަމެއް ކެންބޯޑިޔާގެ ސަރުކާރުން ނުބުނެއެވެ.
މިޔަންމާގައި އަސްކަރީ ބަޣާވާތެއް ކުރި ނަމަވެސް އެ ޤައުމާ ދެކޮޅަށް އާސިޔާނުން އެއްވެސް ފިޔަވަޅެއް އަޅާފައެއް ނުވެއެވެ. ނަމަވެސް އާސިޔާނުގެ ބައްދަލުވުންތަކުގައި މިޔަންމާގެ އަސްކަރީވެރިން ބައިވެރިކުރުމަށް އެ ޖަމުޢިއްޔާއިންވަނީ ދެކޮޅުހަދައިފައެވެ.