ތުރުކީވިލާތުގެ ރައީސް ރަޖަބު ޠައްޔިބު ޢުރުދުޣާނަށް ކޯވިޑް-19 ޖެހިއްޖެއެވެ.
ޢުމުރުފުޅުން 67 އަހަރުގެ ޢުރުދުޣާން ވިދާޅުވީ އޭނާއާއި އޭނާގެ އަނބިކަނބަލުންނަށް ކޯވިޑް-19 ޖެހިފައިވާކަމަށާއި އެ ބޭފުޅުންގެ ޙާލުކޮޅު ރަނގަޅުކަމަށެވެ. އަދި އެ ދެ ބޭފުޅުންނަށް ޖެހިފައިވަނީ ކޯވިޑް-19ގެ ވާރުތަވުމުގެ ބާރުގަދަ ވައްތަރެއްކަމަށްވާ އޮމިކްރޯންކަމަށާއި އެ ބޭފުޅުން ތިއްބެވީ އެކަހެރިވެވަޑައިގެންކަމަށްވެސް ޢުރުދުޣާން ވިދާޅުވިއެވެ. އެ ބޭފުޅުންގެ ގައިން ބަލީގެ އަލާމަތްތަކެއް ނުފެންނަކަމަށާއި މަޤާމުގެ މަސްޢޫލިއްޔަތުތައް ގޭގައި ހުންނަވައިގެން ކުރިޔަށްގެންދަވާނެކަމަށްވެސް އޭނާވަނީ ވިދާޅުވެފައެވެ.
ފާއިތުވި ހަފުތާތަކުގެ ތެރޭގައި ރަޝިޔާއާއި ޔޫކްރެއިންނާ ދެމެދު އުފެދިފައިވާ ނުތަނަވަސްކަން ޙައްލުކުރުމަށް ތުރުކީވިލާތުން މެދުވެރިއެއްގެ ދަޢުރު ޢަދާކުރުމަށް ބޭނުންފުޅުވާކަމަށް ޢުރުދުޣާންވަނީ ވިދާޅުވެފައެވެ. އަދި މީގެ ތިން ދުވަސްކުރިން އޭނާވަނީ ޔޫކްރެއިންނަށް ވަޑައިގެން އެ ޤައުމުގެ ރައީސާއި ސަރުކާރުގެ އިސްވެރިންނާ ބައްދަލުކުރައްވައިފައެވެ.