މެކްސިކޯގައި ކޮވިޑް-19ގެ ކޭސްތައް 5 މިލިއަނަށްވުރެ މައްޗަށް ގޮސްފިއެވެ. ބަލިމަޑުކަމުގެ ހަތަރުވަނަ ރާޅު މެކްސިކޯ ސިޓީއަށް ކުރިމަތިވިއިރު، ޓެސްޓު ކުރާ ސައިޓްތަކާއި، ހޮސްޕިޓަލުތަކުގެ ބޭރުގައި ކިޔުތައް ހަދާ މީހުން އާދަޔާ ޚިލާފަށް ގިނައެވެ.
އިންފެކްޝަސް ޑިޒީޒްގެ ތަޖުރިބާކާރު، ފްރެންސިސްކޯ މޮރޭނޯ ވިދާޅުވީ، އެހެން ޤައުމުތަކާ އަޅާބަލާއިރު މެކްސިކޯގައި ވެކްސިންގެ ބޫސްޓަރ ޑޯސްޖެހުމުގެ ކަންކަން ވަރަށް ދަށްކަމަށެވެ. 18 އަހަރުން ދަށުގެ މީހުންނަށް ވެކްސިން ދިނުމުގައި މެކްސިކޯ ފަހަތަށް ޖެހެމުންދާ ކަމަށާއި، އޭގެ ސަބަބުން ކޭސްތައް އިތުރުވެ، ހޮސްޕިޓަލުތަކުގައި މީހުން ގިނަ ވަމުންދާކަމަށް އޭނާ ފާހަގަކުރެއްވިއެވެ.
މެކްސިކޯ ސަރުކާރުން އާންމުކޮށްފައިވާ ތަފާސްހިސާބުތަކަށް ބަލާއިރު ހޮސްޕިޓަލު އެނދުގެ %38 ވަނީ ފުރިފައެވެ.
މެކްސިކޯގެ ޞިއްޙަތާބެހޭ ވުޒާރާގެ އެންމެ ފަހުގެ ރިޕޯޓްތައް ބުނާގޮތުން ޖެނުއަރީ މަހުގެ މެދުތެރެއިން ފެށިގެން އެ ޤައުމުގައި ދުވާލެއްގެ މައްޗަށް އަލަށް ބަލިޖެހޭ މީހުންގެ ޢަދަދު ވަނީ 40،000އަށްވުރެ މައްޗަށް އަރާފައެވެ.