ރަޝިޔާއާ ކުރިމަތިލުމަށް އެމެރިކާގެ ފައުޖުތައް ވިލާތުގެ އިރުމަތީ ޤައުމުތަކަށް ފޮނުވުމަށް އެމެރިކާގެ ރައީސް ޖޯ ބައިޑަން ނިންމަވައިފިއެވެ.
ޔޫކްރެއިންގެ ސަރަޙައްދީ ރޮނގު ކައިރިއަށް ރަޝިޔާއިން އެތައް ހާސް ސިފައިންނަކާއި ބަރު ހަތިޔާރުތައް ޖަމާކުރަމުންދާ ދަނޑިވަޅެއްގައި ބައިޑަންވަނީ އެމެރިކާގެ 3،000 ސިފައިން ވިލާތުގެ އިރުމަތީ ޤައުމުތައްކަމަށްވާ ޕޯލޭންޑާއި ރޮމޭނިޔާއަށް ފޮނުވުމަށް ނިންމަވައިފައެވެ. އެމެރިކާގެ ދިފާޢީ ވުޒާރާއިން ބުނެފައިވަނީ ޖަރުމަންވިލާތުގައި ޤާއިމުވެ ތިބި އެމެރިކާގެ 1،000 ސިފައިން ރޮމޭނިޔާއަށް ފޮނުވުމަށް ހަމަޖެހިފައިވާކަމަށާއި އެމެރިކާގެ ނޯތު ކެރޮލައިނާގައި މަރުކަޒުވެގެން ތިބި 1،700 ސިފައިން ޕޯލޭންޑަށް އަދި 300 ސިފައިން ޖަރުމަންވިލާތަށް ފޮނުވުމަށް ނިންމާފައިވާކަމަށެވެ. އެ ވުޒާރާއިން ބުނެފައިވަނީ ހުޅަނގުގެ އަސްކަރީ އިއްތިޙާދު، ނޭޓޯއަށް ދެމުންދާ އެއްބާރުލުން ދިނުމުގައި އެމެރިކާއިން ދެމިއޮންނާނެކަމަށާއި ނޭޓޯއަކީ ރަޝިޔާއިން ޖެހިލުންވާ އިއްތިޙާދެއްކަމަށެވެ. ނެޓޯއިންވަނީ ޔޫކްރެއިންގެ ދިފާޢަށް އެމެރިކާއިން ނިންމި ނިންމުމަށް މަރުޙަބާ ކިޔައިފައެވެ.
ފާއިތުވި ދުވަސްތަކުގައި ރަޝިޔާއިންވަނީ 100،000 ސިފައިން ޔޫކްރެއިންގެ ސަރަޙައްދީ ރޮނގު ކައިރިއަށް ފޮނުވައިފައެވެ. ރަޝިޔާއިން ބުނެފައިވަނީ ޔޫކްރެއިންނަށް ޙަމަލާ ދިނުމުގެ އެއްވެސް ވިސްނުމެއް ނެތްކަމަށާއި އެ ސަރަޙައްދަށް ސިފައިން ފޮނުވީ ސަލާމަތީ ސަބަބުތަކަށްކަމަށެވެ. ނަމަވެސް އެ ޤައުމުން ބުނެފައިވަނީ ނޭޓޯގެ މެންބަރުކަން ޔޫކްރެއިންނަށް ދީފިނަމަ އެ ޤައުމާ ދެކޮޅަށް ފިޔަވަޅު އަޅަން މަޖުބޫރުވާނެކަމަށެވެ. އަދި ޔޫކްރެއިންނަށް މެންބަރުކަން ނުދޭނެކަން ނޭޓޯއިން ޔަޤީންކަން ދޭން ޖެހޭކަމަށްވެސް ރަޝިޔާއިންވަނީ ބުނެފައެވެ.
ރަޝިޔާއާއި ޔޫކްރެއިންނާ ދެމެދު އުފެދިފައިވާ ނުތަނަވަސްކަން ޙައްލުކުރުމަށް މެދުވެރިއެއްގެ ދަޢުރު ޢަދާކުރުމަށް ތުރުކީވިލާތުންވަނީ ހުށައަޅައިފައެވެ.