އދގެ އާއްމު މަޖިލީހުގެ މިއަހަރުގެ މަސައްކަތްތަކުގައި އެންމެ އިސްކަމެއް ދޭނެ އެއް ދާއިރާއަކީ އިންސާނީ ޙައްގުތަކުގެ ދާއިރާގައި ހުރި މައްސަލަތައް ޙައްލުކުރުމަށް ޤައުމުތައް ގުޅިގެން މަސައްކަތް ކުރުންކަމަށް އ.ދގެ އާއްމު މަޖިލީހުގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އ.ދގެ އާއްމު މަޖިލީހުގެ ރައީސް އަދި ރާއްޖޭގެ ހާރިޖީ ވަޒީރު އަބްދުﷲ ޝާހިދު މިހެން ވިދާޅުވީ ޗުއްޓީއަށްފަހު އާއްމު މަޖިލީހުގެ ޖަލްސާތައް ފެށުމުގެ ގޮތުން ބޭއްވި ބައްދަލުވުމުގައި ދެއްކެވި ވާހަކަފުޅުގައެވެ.
ޝާހިދުގެ ވާހަކަފުޅުގައި ވަނީ އދގެ އާއްމު މަޖިލީހުގައި މި އަހަރަށް ރާވާފައިވާ މުހިއްމު ކަންކަން ޙިއްސާކުރައްވާފައެވެ.
އެގޮތުން މިހާރު ކުރިމަތިވެފައިވާ ކޯވިޑްގެ ޙާލަތު އިތުރަށް ރަނގަޅުކުރުމާއި، ހީނަރުކަން އައި ދާއިރާތައް އަލުން ކޮޅަށްޖެހުމުގައި މަސައްކަތްތައް ކުރާނެގޮތްތައް ހޯދުން ހިމެނެއެވެ. އަދި ތިމާވެއްޓަށް އަންނަމުންދާ ބަދަލުތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރައްވާނެކަމަށް ވިދާޅުވިއެވެ.
ޝާހިދް ވިދާޅުވީ އދ.ގެ މިއަހަރުގެ މަސައްކަތު ކަލަންޑަރުގައި އިންސާނީ ޙައްގުތަކުގެ ދާއިރާއިން މުހިއްމު މަސައްކަތްތަކެއް ކުރުމަށް ނިންމާފައިވާކަމަށެވެ.
"ވަރަށް ނާޒުކު، އާއްމުކޮށް ވާހަކަ ނުދެކެވޭ ދާއިރާތައް އެބަހުރި. މިއަހަރަށް ރާވާފައިވަނީ މައިގްރޭޝަން ރިވިއު ފޯރަމެއް ބޭއްވުމަށް. އަދި "ހޭޓް ސްޕީޗް" ހުއްޓުވުމަށް މަސައްކަތްތައް ކުރެވޭނެ. މީގެއިތުރުންވެސް އަންހެނުންގެ ޙައްގުތަކާ ހަމަހަމަ ފުރުޞަތު ހޯދައިދިނުމަގުޅޭ މަސައްކަތްތައް ކުރެވޭނެ." ޝާހިދު ވިދާޅުވިއެވެ.
ޝާހިދު ވިދާޅުވީ ކޯވިޑްގެ ޙާލަތުން ޤައުމުތައް އަރައިގަނެ އާއްމު ޙާލަތަށް ދަނިކޮށް، އަނެއްކާވެސް ޙާލަތު ގޯސްވާން ފަށާފައިވާކަމަށެވެ. އެހެންކަމުން މިއީ އަނެއްކާވެސް ޤަޢުމުތައް އެކުވެ ޙާލަތު ރަނގަޅުކުރުމަށް މަސައްކަތް ފަށަންވީ ވަގުތުކަމަށް އޭނާ ވިދާޅުވިއެވެ.
"މިހާރު ކުރަންވީ އެންމެ މުހިންމު މަސައްކަތަކީ ވެކްސިން ކުރިއަށްގެންދިއުން. ވެކްސިންއާއި އަދި ކޯވިޑްއާ ގުޅޭ ސިއްޙީ ސާމާނު އުފައްދާ ފަރާތްތަކަށް ގޮވާލަން، ޕްރޮޑަކްޝަން އިތުރުކޮށް ޤައުމުތަކަށް ވަސީލަތްތައް ފަސޭހައިން ފޯރުކޮށްދިނުންމަށް." ޝާހިދު ވިދާޅުވިއެވެ.
ޝާހިދުގެ ވާހަކަފުޅުގައި ވަނީ ގައުމުތައް ވަކިވެގަތުމުގެ ބަދަލުގައި ގުޅިގެން މަސައްކަތްކުރަންޖެހޭ ވަރަށް ބޮޑަަށް ފާހަގަކުރައްވާފައެވެ. އަދި އެހުރިހާ މަސައްކަތްތައްވެސް ވަރުގަދަވެގެންދާނީ އުއްމީދާއެކު މަސައްކަތްކުރުމުންކަން ޝާހިދު ފާހަގަކުރެއްވިއެވެ.