ކެމެރޫންގައި ރޭ ފެށި އެފްރިކާ ކަޕް އޮފް ނޭޝަންސް، އެފްކޮން 2021ގެ ފުރަތަމަ މެޗް މުބާރާތް ބާއްވާ ޤައުމުކަމަށްވާ ކެމެރޫންއިން ކާމިޔާބުކޮށްފިއެވެ. މިމެޗް ކެމެރޫން ކާމިޔާބުކުރީ ބުރްކީނަ ފާސޯ އާއި ބައްދަލުކުރިމެޗް ފަހަތުން އަރާ ކާމިޔާބުކޮށްގެން މިމެޗް ކެމެރޫން ކާމިޔާބުކުރީ 2 ލަނޑު އެއްލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ކެމެރޫންއިންނެވެ. ނަމަވެސް މިމެޗްގެ އިތުރުން މިމުބާރާތުގެވެސް ފުރަތަމަ ލަނޑު މެޗްގެ 24 ވަނަ މިނެޓްގައި ޖަހައި ލީޑު ނެގީ ބުރްކީނަ ފާސޯ. މިލަނޑު އެޓީމަށް ޖަހައިދިނީ ގުސްޓާވޯ ސަންގާރޭއެވެ. މިމެޗްގައި ކެމެރޫންއިން އެއްވަރު ކުރި ލަނޑު މެޗްގެ 40 ވަނަ މިނެޓްގައި ލިބުނު ޕެނަލްޓީ އަކުން ކާމިޔާބުކޮށްދީ މެޗްގެ ނަތީޖާ ހަމަހަމަ ކޮށްދިނީ ކެޕްޓަން ވިންސެންޓް އަބޫބަކާއެވެ. އަދި މިމެޗުން ކެމެރޫން މޮޅުވި ލަނޑު ފުރަތަމަ ހާފްގެ އިތުރު ވަގުތުގައި ޖަހައިދިނީވެސް ލިބުނު ދެވަނަ ޕެނަލްޓީ އާއެކު ފުރަތަމަ ލަނޑުވެސް ޖަހައިދިން އަބޫބަކާއެވެ.
މިއާއެކު ކެމެރޫންއިން އަމިއްލަ ސަޕޯޓަރުން ކުރިމަތީ މިމުބާރާތް މޮޅަކާއެކު ފެށިއިރު ގްރޫޕް އޭއަށް ނިސްބަތްވާ އަނެއް ދެޓީމް ކަމަށްވާ ކާބޯ ވާޑެ އާއި އިތިއޯޕިއާ ބައްދަލުކުރިމެޗް އެއްލަނޑު ސުންލަނޑުން ކާމިޔާބުކުރީ ކާބޯ ވާޑޭއެވެ. މިމެޗްގެ 8 ވަނަ މިނެޓްގައި އިތިއޯޕިއާގެ ޑިފެންޑަރ ޔަރެޑް ބަޔޭއަށް ވަނީ ވީއޭއާރުގެ ބެލުމަށްފަހު ރަތްކާޑު ދައްކާފައެވެ. އެހެންކަމުން މިމެޗްގެ ބޮޑުބައި އިތިއޯޕިއާއިން ކުޅެފައިވަނީ އެއް ކުޅުންތެރިއެއް މަދުކޮށެވެ. މިމެޗަށް ކޯވިޑް-19 އާއި ގުޅިގެން ކޯޗާއި ނުވަ ކުޅުންތެރިންނާއި ނުލާ ކުރިމަތިލި ކާބޯ ވާޑޭ އިން މޮޅުވި ލަނޑު މެޗްގެ ފުރަތަމަ ހާފްގެ އިތުރު ވަގުތުގައި ޖަހައިދިނީ ހޫލިއާ ޓަވަރޭޒެވެ.
މިމުބާރާތުގައި މިއަދާއި މިރޭ ހަތަރު މެޗް ކުޅުމަށްވަނީ ހަމަޖެހިފައެވެ. މިގޮތުން ފުރަތަމަ މެޗްގައި އިރުއޮއްސި ހައެއް ޖަހާއިރު ބައްދަލުކުރާނީ އެންމެފަހުގެ ރަނައަޕް ޓީމް ކަމަށްވާ ސެނެގާލާއި ޒިމްބާބްވޭއެވެ. މިރޭ ނުވައެއް ޖަހާއިރު ފަށާ ދެމެޗްގެ ތެރެއިން ފުރަތަމަ މެޗްގައި ގިނީ އާއި މަލާވީ ބައްދަލުކުރާއިރު ދެވަނަ މެޗްގައި ބައްދަލުކުރުމަށް ހަމަޖެހިފައިވަނީ މޮރޮކޯ އާއި ގާނާއެވެ. އަދި ދަންވަރު ބާރަޖަހާއިރު ފަށާމެޗުގައި ބައްދަލުކުރާނީ ކޮމޮރޯސް އާއި ގެބޯންއެވެ.