ފްރެންޗް ލީގު އާންގައި ތާވަލްގެ އެއްވަނައިގާ އުޅޭ ޕެރިސް ސެއިންޓް ޖަރމެއިން އާއި އޮލިމްޕިކް ލިއޯން ބައްދަލުކުރިމެޗް އެއްވަރުވެއްޖެއެވެ. ލިއޯންގެ ދަނޑުގައި ކުޅުނު މިމެޗް ނިމުނީ އެއްލަނޑު އެއްލަނޑުން ދެޓީމް އެއްވަރު ވެގެންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޕީއެސްޖީއިންނެވެ. ނަމަވެސް މިމެޗްގެ ފެށުން ރަނގަޅީ ލިއޯންގެއެވެ. މިގޮތުން މެޗްގެ 7 ވަނަ މިނެޓްގައި ލިއޯންއިން ވަނީ ލަނޑެއް ޖަހާ މިމެޗްގެ ލީޑު ނަގާފައެވެ. މިލަނޑު އެޓީމަށް ޖަހައިދިނީ ލޫކަސް ޕަކުއެޓާއެވެ. ނަމަވެސް ލިއޯންއަށް މި ލީޑު ދެމެހެއްޓޭގޮތްވީ 69 މިނެޓް ވަންދެނެވެ. މިމެޗްގައި ޕީއެސްޖީއަށް އެއްވަރު ކޮށްދިން ލަނޑު މެޗްގެ 76 ވަނަ މިނެޓްގައި ޖަހައިދިނީ ބަދަލު ކުޅުންތެރިޔާ ތީލޯ ކޭރަރ ޖަހައިދިން ލަނޑުންނެވެ. މިއީ 2020 ވަނަ އަހަރުގެ ފެބްރުއަރީމަހުގެ ފަހުން އޭނާއަށް ކާމިޔާބު ކުރެވުނު ފުރަތަމަ ލަނޑެވެ. މިމެޗްގައި މީގެއިތުރުންވެސް ލަނޑު ޖަހާނެ ރަނގަޅު ފުރުސަތު ދެޓީމަށްވެސް ލިބި ވަނީ ބޭކާރުވެފައެވެ. އެގޮތުން ޕީއެސްޖީގެ ކިލިއަން އެމްބާޕޭ ފޮނުވާލި ދެ ހަމަލައެއްވަނީ ގޯލްގެ ދަނޑިއަށް އަމާޒުވެފައެވެ.
މިމެޗް އެއްވަރު ވުމުން ޕީއެސްޖީއަށް ވަނީ 20 މެޗުން 47 ޕޮއިންޓް ލިބިފައެވެ. އަދި ދެވަނައިގައިއުޅޭ ނީސްގެ މައްޗަށް 11 ޕޮއިންޓްގެ ލީޑެއް ޕީއެސްޖީއަށް ލިބިފައިވެއެވެ. ލިއޯން އިން އެންމެ ފަހުން ކުޅުނު ހަތަރު މެޗުންވެސް އެއްވަރު ވުމާއެކު މިހާރުވަނީ 25 ޕޮއިންޓާއެކު ތާވަލްގެ 11 ވަނައިގައެވެ.