އިޓާލިއަން ސެރީއާގައި ޔުވެންޓަސް އާއި އޭ އެސް ރޯމާ ބައްދަލުކުރިމެޗް ފަހަތުން އަރާ ޔުވެންޓަސްއިން ކާމިޔާބުކޮށްފިއެވެ. ރޯމާގެ ދަނޑުގައި ކުޅުނު މިމެޗް ޔުވެންޓަސްއިން ކާމިޔާބުކުރީ 4 ލަނޑު 3 ލަނޑުންނެވެ.
މިމެޗްގެ ފުރަތަމަ ލަނޑު މެޗްގެ 11 ވަނަ މިނެޓްގައި ލަނޑު ޖަހައި ލީޑު ނެގީ ރޯމާއިންނެވެ. މިލަނޑު އެޓީމަށް ކާމިޔާބުކޮށްދިނީ ޓެމީ އަބްރަހަމެވެ. ނަމަވެސް މިލަނޑު ޖެހިތާ 7 މިނެޓްފަހުން ޔޫވެންޓަސްގެ ޕައުލޯ ޑިބާލާވަނީ ލަނޑެއް ޖަހާ މެޗްގެނަތީޖާ ހަމަހަމަކޮށްފައެވެ. މިމެޗްގައި ރޯމާއިން ދެވަނަ ފަހަރަށް ލީޑު ނެގީ މެޗްގެ 48 ވަނަ މިނެޓްގައި ހެންރިކް މިހިޓާރިއަން ޖަހައިދިން ލަނޑުންނެވެ. އަދި 53 ވަނަ މިނެޓްގައި ލޮރެންޒޯ ޕެލެގްރީނީ ޖަހައިދިން ލަނޑުން ރޯމާއިން އެޓީމުގެ ލީޑު ފުޅާކުރިއެވެ. ނަމަވެސް މެޗްގެ 70 ވަނަ މިނެޓްގައި މަނުއެލް ލޮކަޓެއްލީ ޖަހައިދިން ލަނޑާއެކު މެޗްގެ އޮވެވަރު ޔޫވެންޓަސް ކޮޅަށް އެނބުރިގެންދިޔައެވެ. ނަތީޖާއަކަށް ވީ އޭގެ ދެމިނެޓްފަހުން ޑެޖާން ކުލުސެވްސްކީ ޖަހައިދިން ލަނޑާއެކު މެޗްގެ ނަތީޖާ ޔުވެންޓަސްއިން ހަމަހަމަކުރިއިރު 77 ވަނަ މިނެޓްގައި މަޓިއާ ޑި ޝިގްލިއޯ ޖަހައިދިން ލަނޑާއެކު މިމެޗްގައި ފުރަތަމަ ފަހަރަށް ޔުވެންޓަސްއިން ލީޑު ނަގާ އެގޮތުގައި އޮވެ މެޗް ނިންމާލިއެވެ.
މެޗަށްފަހު ވާހަކަ ދައްކަމުން ރޯމާގެ ކޯޗް ހޯސޭ މޮރީނިއޯ ބުނީ އޭނާގެ ކުޅުންތެރިން ނަފްސާނީގޮތުން ދެވަނަ ހާފްގައި ކޮލެޕްސްވީކަމަށެވެ. މިމެޗްގެ ފުރަތަމަ 70 މިނެޓް އޭނާގެ ކުޅުންތެރިން ވަރަށް ރަނގަޅަށް ކުޅުނު ކަމަށާއި ނަމަވެސް އޭގެފަހުން ކުޅުންތެރިން މުޅިން ކޮލެޕްސްވީ ކަމަށް މޮރީނިއޯ ބުންޏެވެ. މިކާމިޔާބީއާއެކު ޔޫވެންޓަސް މިހާރުވަނީ ކުޅުނު 21 މެޗުން ލިބިފައިވާ 38 ޕޮއިންޓާއެކު ތާވަލްގެ ފަސްވަނައަށް ކުރިއަށް ޖެހިލާފައެވެ. އަދި ރޯމާ އުޅެނީ 32 ޕޮއިންޓާއެކު ތާވަލްގެ 7 ވަނައިގައެވެ.