ޖަރުމަނު ބުންޑަސްލީގާގައި ބޮރޫޝިއާ ޑޯޓްމުންޑް އާއި އެއިންޓްރެކްޓް ފްރެންކްފަރޓް ބައްދަލުކުރިމެޗް ފަހަތުން އަރާ ޑޮޓްމުންޑް ކާމިޔާބުކޮށްފިއެވެ. ފްރެންކްފަރޓްގެ ދަނޑުގައި ކުޅުނު މިމެޗް ޑޯޓްމުންޑް ކާމިޔާބުކުރީ 3 ލަނޑު 2 ލަނޑުންނެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޑޯޓްމުންޑުން. ނަމަވެސް މިމެޗްގެ ފެށުން ރަނގަޅުވީ ފްރެންކްފަރޓެވެ. މިގޮތުން މެޗްގެ ފުރަތަމަ 25 މިނެޓްގެ ތެރޭގައި ފްރެންކްފަރޓުން ވަނީ 2 ލަނޑުގެ ލީޑެއް ނަގާފައެވެ. މިދެލަނޑު ފްރެންކްފަރޓްއަށް ކާމިޔާބުކޮށްދިނީ މެޗްގެ 15 ވަނަ މިނެޓާއި 24 ވަނަ މިނެޓްގައި ރަފައެލް ބޮރަރއެވެ. މިމެޗްގައި ޑޯޓްމުންޑްގެ ފުރަތަމަ ލަނޑު މެޗްގެ 71 ވަނަ މިނެޓްގައި ޖަހައިދިނީ ތޯގަން ހަޒާޑެވެ. އަދި ޑޯޓްމުންޑުން މެޗްގެ ނަތީޖާ ހަމަހަމަ ކުރި ލަނޑު މެޗް ނިމެން ތިން މިނެޓަށް ވެފައިވަނިކޮށް ޖަހައިދިނީ ޖޫޑް ބެލިންހަމްއެވެ. މިމެޗުން ޑޯޓްމުންޑް މޮޅުވި ލަނޑު މެޗްގެ 89 ވަނަ މިނެޓްގައި ޖަހައިދިނީ މަހްމޫދު ދާއޫދެވެ.
މިކާމިޔާބީއާއެކު ޑޯޓްމުންޑަށް މިވަނީ ކުޅުނު 18 މެޗުން ލިބިފައިވާ 37 ޕޮއިންޓާއެކު ތާވަލްގެ ދެވަނައިގައެވެ. އަދި މިއާއެކު ޕޮއިންޓް ތާވަލްގެ އެއްވަނައިގައި އުޅޭ ބަޔާން މިޔުނިކާއި ދެމެދުގައިވާ ފަރަގު މިވަނީ 6 ޕޮއިންޓަށް ކުޑަކޮށްފައެވެ. އަދި ފްރެންކްފަރޓް ވަނީ 18 މެޗުން ލިބިފައިވާ 27 ޕޮއިންޓާއެކު ތާވަލްގެ ހަތްވަނައަށް ވެއްޓިފައެވެ.