ސްޕެނިޝް ލަލީގާގެ އެފްސީ ބާސެލޯނާއަށް ކުޅެމުންދާ ބްރެޒިލްގެ ބައިނަލްއަޤްވާމީ ކުޅުންތެރިޔާ ފިލީޕޭ ކޫޓީނިއޯ އިންގްލިޝް ޕްރިމިއަރ ލީގުގެ އެސްޓަން ވިލާއަށް ލޯން އެއްބަސްވުމެއްގެދަށުން ގުޅިއްޖެއެވެ. މަޢުލޫމާތު ލިބިފައިވާގޮތުގައި ކޯޓީނިއޯ ވިލާ އާއި ގުޅިފައިވަނީ މިސީޒަންގެ ނިޔަލަށެވެ.
މިއެއްބަސްވުން ފުރިހަމަ ވާނީ ކުޓީނިއޯ ވިލާގެ މެޑިކަލް ހެދުމުގެ އިތުރުން އޭނާއަށް ވާރކް ޕަރމިޓް ލިބުމުންނެވެ. އަދި ވިލާއިން ވަނީ އެކްލަބުން ބޭނުންނަމަ ސީޒަން ނިމުމުން 39 މިލިއަން ޑޮލަރަށް އޭނާ ގަތުމަށްވެސް އެއްބަސްވުމަކަށް އައިސްފައެވެ. ކޯޓީނިއޯ ބާރސާއާއި ގުޅިފައިވަނީ 2018 ވަނަ އަހަރު ޕްރިމިލިއަރ ލީގުގެ ކްލަބް ލިވަޕޫލުން 142 މިލިއަން ޕައުންޑްގެ އަގަކަށެވެ. ނަމަވެސް ބޮޑު އަގެއްގާ ބާރސާއަށް ބަދަލުވެ އޭނާއަށް ލިވަޕޫލްގައި ދައްކަމުންދިޔަ މޮޅު ކުޅުން ބާރސާގައި ތަކުރާރު ކުރެވޭގޮތެއް ނުވިއެވެ. އަދި ބާރސާއިން މިހާރު ބޭނުންވަނީ އެކްލަބްގެ މުސާރައިގެ ހަރަދުތައް ކުރުމަށް ކުޓީނިއޯ ވިއްކާލުމަށްވެ. ކުޓީނިއޯ ހޯދުމަށް އާސެނަލް އާއި އެވަޓަން، ނިއުކާސްލް އަދި ޓޮޓްނަމް ހޮޓްސްޕަރވެސް ވަނީ ޝައުގުވެރިކަން ފާޅުކޮށްފައެވެ. ބާރސާއަށް 106 މެޗް ކުޅޭދީ 26 ލަނޑު މިހާތަނަށް ޖަހައިދީފައިވާ ކުޓީނިއޯ ބާރސާ އާއެކު ހަދާފައިވާ އެއްބަސްވުން މިއަންނަ ސީޒަންގެ ނިޔަލަށް ހަމަވާނެއެވެ.
ކުޓީނިއޯ ވިލާއަށް ބަދަލުވުމުން އޭނާ އެއްކޮށް ލިވަޕޫލްގައި ކުޅުނު ސްޓީވަން ޖެރާޑާ އެއްޓީކަށް އާދެވުނީއެވެ. ލިވަޕޫލްގައި ޖެރާޑްގެ ކެޕްޓަން ކަމުގެ ދަށުން ކުޅުނުއިރު މިފަހަރު ވިލާގައި ކުޓީނިއޯ ކުޅޭނީ ޖެރާޑްގެ ކޯޗް ކަމުގެ ދަށުންނެވެ. ޖެރާޑް ވަނީ ކުޓީނިއޯއަކީ ވަރަށް ޚާއްސަ ކުޅުންތެރިއެއްގެ ގޮތުގައި ސިފަކޮށްފައެވެ.