ސްކޮޓިޝް ޕްރިމިއަރ ލީގުގެ ރޭންޖަރސްއަށް ކުޅޭ ނޭތަން ޕެޓަރސަން އިންގްލިޝް ޕްރިމިއަރ ލީގުގެ އެވަޓަންއަށް ސޮއިކޮށްފިއެވެ. ޕެޓަރސަން އެވަޓަންއަށް ސޮއިކޮށްފައިވަނީ ހަތަރު އަހަރާއި ބައިގެ އެއްބަސްވުމެއްގެދަށުންނެވެ.
އުމުރުން ވިހި އަހަރުގެ ސްކޮޓްލަންޑް ޓީމަށް ކުޅޭ ޕެޓަރސަން އެވަޓަންއަށް ސޮއިކޮށްފައިވަނީ 11 ޕޮއިންޓް 5 މިލިއަން ޕައުންޑްގެ އަގަކަށެވެ. އަދި އޭނާ އެވަޓަންގައި ދައްކާ ކުޅުމާއި ގުޅިގެން މިއަދަދު އިތުރު ވާނެކަމަށް ބެލެވެއެވެ. މިއީ ރޭންޖަރސްއަށް މިހާތަނަށް ރިކޯޑް ފީއެކެވެ. ޕެޓަރސަންއަކީ މިފަހަރުގެ ޓްރާންސްފަރ ވިންޑޯގައި އެވަޓަންއިން ސޮއިކުރި ދެވަނަ ކުޅުންތެރިޔާއެވެ. އަދި މިދެކުޅުންތެރިންނަކީވެސް ފަހަތަށް ކުޅޭ ދެކުޅުންތެރިންނެވެ. ޕެޓަރސަން ބުނީ އެވަޓަންއަށް ސޮއިކުރާކަށް މާގިނަ ވިސްނުންތަކެއް ވިސްނާކަށް ނުޖެހުނު ކަމަށެވެ. އެއީ އެވަޓަންއަކީ ދިގު ތާރީހެއް އޮތް ބޮޑު ކްލަބަކަށް ވުމުންނެވެ. ޕެޓަރސަން ބުނީ އެވަޓަން މިހާރު އޮތީ އެޓީމް އޮންނަން ބޭނުންވާ ހިސާބުގައި ނޫންކަމަށާއި ނަމަވެސް ހުރިހާ ކުޅުންތެރިން ގުޅިގެން މަސައްކަތް ކޮށްފިނަމަ ވާސިލްވާން ބޭނުންވާ ހިސާބަށް ވާސިލް ވެވޭނެކަމަށެވެ.
މިވަގުތު އެވަޓަންއޮތީ ތާވަލްގެ 15 ވަނައިގައެވެ. އަދި އެންމެފަހުން އެޓީމު ކުޅުނު 12 މެޗްގެ ތެރެއިން މޮޅުވެފައިވަނީ އެންމެ މެޗަކުންނެވެ.