އިންގްލިޝް ޕްރިމިއަރ ލީގުގައި ވުލްވަރހެމްޕްޓަން ވޮންޑަރަރސް އާއި މެންޗެސްޓަރ ޔުނައިޓެޑް ބައްދަލުކުރިމެޗް ވުލްވްސް ކާމިޔާބުކޮށްފިއެވެ. ޔުނައިޑެޓްގެ ދަނޑުގައި ކުޅުނު މިމެޗް ވުލްވްސް ކާމިޔާބުކުރީ އެއްލަނޑު ސުންލަނޑުންނެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ޔުނައިޓެޑުން ގިނައިރު ބޯޅަ ގެންގުޅުނު އިރު ގިނަ ހަމަލާ އުފައްދާފައިވަނީ ވުލްވްސްއެވެ. މިމެޗްގައި ވުލްވްސްއިން ޖެހި ހަމައެކަނި ލަނޑު މެޗްގެ 82 ވަނަ މިނެޓްގައި ޖަހައިދިނީ ޖާއޮ މޮއުޓީނިއޯއެވެ. މިމެޗްގެ އިތުރު ވަގުތުގެ ފަސްވަނަ މިނެޓްގައި ޔުނައިޓެޑަށް މެޗްގެ ނަތީޖާ ހަމަހަމަ ކުރުމަށް ރަނގަޅު ފުރުސަތެއް ލިބިގެންދިޔައެވެ. ނަމަވެސް ބްރޫނޯ ފެނާންޑޭޒް ފޮނުވާލި ހިލޭޖެހުން ވަނީ ވުލްވްސްގެ ކީޕަރ ހޯޒޭ ސާ ދިފާއުކޮށްފައެވެ. މިއީ 1980 ވަނަ އަހަރަށްފަހު ޔުނައިޓެޑްގެ ދަނޑު އޯލްޑް ޓްރެފަޑްގައި ކުޅެ ވުލްވްސް މޮޅުވި ފުރަތަމަ ފަހަރެވެ. އަދި މިއީ ޔުނައިޓެޑްގެ ކޯޗްކަމާއި ރަލްފް ރަންގްނިކް ހަވާލުވިފަހުން އެޓީމް ބަލިވި ފުރަތަމަ މެޗެވެ.
މިކާމިޔާބީއާއެކު ވުލްވްސް އަށް މިހާރުވަނީ ކުޅުނު 19 މެޗުން ލިބިފައިވާ 28 ޕޮއިންޓާއެކު ތާވަލްގެ އަށްވަނައަށް ކުރިއަށް ޖެހިލާފައެވެ. އަދި ޔުނައިޓެޑް އުޅެނީ 19 މެޗުން ލިބިފައިވާ 31 ޕޮއިންޓާއެކު ތާވަލްގެ 7 ވަނައިގައެވެ.