އިންގްލިޝް ޕްރިމިއަރ ލީގުގައި ވެސްޓް ހޭމް ޔުނައިޓެޑާއި ކްރިސްޓަލް ޕެލަސް ބައްދަލުކުރިމެޗް ވެސްޓް ހޭމް ކާމިޔާބުކޮށްފިއެވެ. ޕެލަސްގެ ދަނޑުގައި ކުޅުނު މިމެޗް ވެސްޓް ހޭމްއިން ކާމިޔާބުކުރީ 3 ލަނޑު 2 ލަނޑުންނެވެ.
މިމެޗްގެ ފުރަތަމަ ހާފްގައި މޮޅަށް ކުޅެފައިވަނީ ވެސްޓް ހޭމްއިންނެވެ. މިގޮތުން ފުރަމަތަ ހާފްގައި ވެސްޓް ހޭމުން ވަނީ ތިން ލަނޑުގެ ލީޑެއް ނަގާފައެވެ. މިމެޗްގެ ފުރަތަމަ ލަނޑު މެޗްގެ 22 ވަނަ މިނެޓްގައި ވެސްޓް ހޭމްއަށް ޖަހައިދިނީ މިކައިލް އެންޓޯނިއޯއެވެ. އަދި ދެވަނަ ލަނޑު މެޗްގެ 25 ވަނަ މިނެޓްގައި ޖަހައިފައިވަނީ މެނުއަލް ލަންޒީނީއެވެ. އަދި އެޓީމްގެ ފަހު ލަނޑު ފުރަތަމަ ހާފްގެ އިތުރު ވަގުތުގައި ލިބުނު ޕެނަލްޓީ އަކުން ޖަހައިދިނީވެސް ދެވަނަ ލަނޑު ޖަހައިދިން ލަންޒީނީއެވެ. މިމެޗްގެ ފުރަތަމަ ހާފްގައި ޕެލަސްއިން ނުރައްކާތެރި ހަމަލާތަކެއް އުފެއްދި ނަމަވެސް އެއިން އެއްވެސް ހަމަލާއެއް ލަނޑަކަށް ބަދަލުކޮށްލެވޭ ގޮތެއް ނުވިއެވެ. މިމެޗްގައި ޕެލަސްއިން ޖެހި ފުރަތަމަ ލަނޑު މެޗްގެ 83 ވަނަ މިނެޓްގައި ޖަހައިދިނީ އޮޑްސަން އެޑުއާޑެވެ. އަދި ފަހު ލަނޑު މެޗްގެ ފަހު މިނެޓްގައި ޖަހައިދިނީ މައިކަލް އޮލީސޭއެވެ.
މިކާމިޔަބީއާއެކު ވެސްޓް ހޭމް މިހާރު ވަނީ ކުޅުނު 20 މެޗުން ލިބިފައިވާ 34 ޕޮއިންޓާއެކު ތާވަލްގެ ފަސްވަނައަށް ކުރިއަށް ޖެހިލާފައެވެ. އަދި ކްރިސްޓަލް ޕެލަސް އުޅެނީ 23 ޕޮއިންޓާއެކު 11 ވަނައިގައެވެ.