ދިވެހިރާއްޖޭގެ އަޑުގެ 59ވަނަ އަހަރީ ދުވަސް ފާހަގަކުރުމުގެ ގޮތުން ތަފާތު ޚާއްސަ ޕްރޮގްރާމްތަކެއް ގެނެސްދިނުމަށްވަނީ ރާވާފައެވެ. މީގެ ތެރޭގައި ޚާއްސަ މެހުމާނުންނާއި، ގޭމްޝޯތަކާއި އެހުންތެރިން ޝަޢުގުވެރިވާނެފަދަ ތަފާތު ޕްރޮގްރާމްތައް ހިމެނެއެވެ.
އެގޮތުން މާދަމާ އެހުންތެރިންނަށް ދޫކޮށްލާ އެންމެ ޚާއްސަ އެއް ޕްރޮގްރަމަކީ، ދިވެހިންގެ ތެރޭގައި މަޝްހޫރު ފޯކްލޯރ "ދޮންހިޔަލަޔާ އަލިފުޅު"ގެ ވާހަކައެވެ. މިވާހަކަ އަލުން ރެކޯޑްކޮށް ގެނެސްދެނީ، ދިވެހި ބަހުގެ އުސްތާޛް އަބްދުﷲ ޞާދިޤް (ސޯދު) މިވާހަކަ ލިޔުއްވާފައިވާ ގޮތަށެވެ.
ވާހަކައިގެ އެންމެ ޚާއްސަ ކަމަކީ، ވާހަކައިގެ ހުށައެޅުންތެރިންނެވެ. މީގެ ތެރޭގައި، ދިވެހިރާއްޖޭގެ އަޑުން ގެނެސްދޭ ވާހަކަތަކުގެ ހުށައެޅުންތެރިންނެއް ނޫޅެއެވެ. ވާހަކައިގެ އަންހެން ލީޑް ރޯލް ހުށައަޅައިދެނީ ބްރޮޑްކޮމްގެ ރައީސް މަރިޔަމް ވަޙީދާއެވެ. އަދި ފިރިހެން ލީޑް ރޯލް ހުށަހަޅާދެނީ އެމްއެންޔޫގެ ލެކްޗަރަރ މުޙައްމަދު ދީދީއެވެ.
ދޮންހިޔަލަޔާ އަލިފުޅު ވާހަކައިގެ އެންމެ ބޮޑު ލީޑަކީ ވާހަކައިގައި އުޅޭ ރަދުންނެވެ. ރަދުންގެ ރޯލް ހުށަހަޅާދެނީ ޕީއެސްއެމްގެ މެނޭޖިންގ ޑިރެކްޓަރ އަލީ ޚާލިދްއެވެ.
ވާހަކައިގައި ޖުމްލަ 17 ކެރެކްޓަރ ހިމެނެއެވެ. މުޅިންވެސް ހިމެނެނީ އެކި މުވައްސަސާތަކުން ބައިވެރިކޮށްފައިވާ ފަރާތްތަކެވެ. ޕްރޮގްރާމްގެ ޕްރޮޑިއުސަރ ސާމިޔާ އަހުމަދު ވަހީދު ވިދާޅުވީ، މިގޮތަށް މި ވާހަކަ ގެނެސްދިނުމަށް ރޭވީ، އެހުންތެރިންނަށް އާއްމުކޮށް ރޭޑިއޯއިން ނީވޭ ތަފާތު އަޑުތަކެއް ގެނެސްދިނުމަށްކަމަށެވެ.
ދިވެހިރާއްޖޭގެ އަޑުން މާދަމާ ދޮންހިޔަލަޔާ އަލިފުޅު ވާހަކަ ގެނެސްދޭނީ، 11.15ގައެވެ. ވާހަކައަކީ 27 މިނެޓްގެ ވާހަކައެވެ.
ދޮންހިޔަލަޔާ އަލިފުޅު ވާހަކަ މަޝްހޫރުވެފައިވަނީ، އަސަރުގަދަ ލޯބީގެ ވާހަކައެއްގެ ގޮތުގައެވެ. މިއީ ލޯތްބައްޓަކާވާ ގުރުބާނީ ދައްކުވައިދޭ ވާހަކައެކެވެ.