ދިވެހިރާއްޖޭގެ އަޑުގެ އަހަރީ ދުވަހުގެ ޚާއްސަ ޕްރޮގްރާމްތަކުގެ ތެރޭގައި، ރައްޔިތުންގެ މަޖިލީހުގެ މެންބަރުންގެ ޚާއްސަ ގޭމް ޝޯވއެއް ގެނެސްދިނުމަށް ތައްޔާރުވެއްޖެއެވެ.
"މުޅިން އެހެން ގޮތަކަށް" މި ނަމުގައި ގެނެސްދޭ މި ޝޯވްގައި ރައްޔިތުންގެ މަޖިލީހުގެ 6 ދައިރާއެއްގެ މެންބަރުން ބައިވެރިވެވަޑައިގަނެއެވެ.
ޕްރޮގްރާމްގައި ބައިވެރިވާ މެންބަރުންގެ ތެރޭގައި ހިމެނެނީ ކުރެންދޫ ދާއިރާގެ މެންބަރު އަބްދުލް ޣަނީ އަބްދުލް ހަކީމް، ނޮޅިވަރަމް ދާއިރާގެ މެންބަރު މުޙައްމަދު ނަޝީދު ޢަބްދުﷲ، އިހަވަންދޫ ދާއިރާގެ މެންބަރު މުޙައްމަދު ޝިފާޢު، އިސްދޫ ދާއިރާގެ މެންބަރު ޢަލީ ޙަމީދު، މަކުނުދޫ ދާއިރާގެ މެންބަރު މުޙައްމަދު ރާއީ އަދި މައްޗަންގޮޅި ދެކުނު ދާއިރާގެ މެންބަރު އަޙުމަދު ހައިތަމެވެ.
ދިވެހިރާއްޖޭގެ އަޑުގެ ޕްރޮގްރާމް ޕްރޮޑިއުސަރ އަދި މި ޕްރޮގްރާމްގެ ޕްރޮޑިއުސަރ ރުގިއްޔާ ވާފިރާ ވިދާޅުވީ، މިފަދަ ޕްރޮގްރާމެއް ގެނެސްދިނުމަށް ރޭވީ މަޖިލިސް މެންބަރުންގެ އަޑު ތަފާތު މާޙައުލަކުން ތަފާތު ގޮތަކަށް ގެނެސްދިނުމަށްކަމަށެވެ. މި ޕްރޮގްރާމްގައި ހިމެނެނީ އެކި ކަހަލަ ހެއްވާ މަޖާ ގޭމްތަކެވެ. އެގޮތުން ޓީމް އަދި ވަކިވަކިން ކުރިއަށްގެންދާ ބައިތައް ހިމެނެއެވެ.
"މުޅިން އެހެން ގޮތަކަށް" ގޭމް ޝޯވ ހުށައަޅައިދެނީ ދިވެހިރާއްޖޭގެ އަޑުގެ ޕްރެސެންޓަރ އިނާޔަތު ޢަލީއެވެ. މިޕްރޮގްރާމް ގެނެސްދޭނީ ދިވެހިރާއްޖޭގެ އަޑުގެ އަހަރީ ދުވަސް ކަމަށްވާ 29 ޑިސެމްބަރުގެ މެންދުރު 14:00އިން 15:00އަށެވެ.
ދިވެހިރާއްޖޭގެ އަޑުގެ އަހަރީ ދުވަހު، އަޑުން ޚާއްސަ ތަފާތު އެކި ޕްރޮގްރާމްތައް ގެނެސްދިނުމަށްވަނީ ހަމަޖެހިފައެވެ. ދިވެހިރާއްޖޭގެ އަޑުގެ ޚިދުމަތަށް މިއަހަރު ފުރެނީ 59އަހަރެވެ.