ބްރޯޑްކާސްޓިންގް ކޮމިޝަނަށް ދިގުމުއްދަތަށް ޚިދުމަތްކޮށްފައިވާ މުވައްޒަފުނާއި ފާހަފަކޮށްލެވޭ މަސައްކަތްތަކެއް ކޮށްފައިވާ މުވައްޒަފުންގެ އަގު ވަޒަންކޮށް އެވޯޑްދީފިއެވެ. އެވޯޑް ދީފައިވަނީ ކޮމިޝަންގެ "ސްޓާފް ނައިޓް 2021"ގެ ތެރެއިންނެވެ. މި އެވޯޑް ޖުމްލަ 14 މުވައްޒަފަކަށްވަނީ ލިބިފައެވެ.
2010ވަނަ އަހަރު ވަކި ކޮމިޝަނެއްގެ ގޮތުގައި ބްރޯޑްކާސްޓިންގ ކޮމިޝަން އުފައްދަވާފައިވަނީ ޤާނޫނުއަސާސީން ލިބިދޭ ޚިޔާލުފާޅު ކުރުމުގެ މިނިވަންކަން، ޒިންމާދާރުކަމާއި ހަމަހަމަކަމާއެކު ދަމަހައްޓައި އާލާކޮށްދިނުމަށް މަސައްކަތްކުރުމަށެވެ. ކޮމިޝަންގެ ޚިދުމަތަށް 11 އަހަރު ފުރިފައިވާއިރު، ކޮމިޝަނުންވަނީ މިދާއިރާ ކުރިއެރުވުމަށް ގިނަ މަސައްކަތްކެއް ކުރައްވާފައެވެ. މަދު މުވައްޒަފުންނާއެކުވެސް، މުހިންމު ނިންމުންތަކާއި މަސައްކަތްތައް ކޮމިޝަނުންވަނީ ކޮށްފައެވެ.
ކޮމިޝަނުގެ މަސައްކަތްތައް ކާމިޔާބުކަމާއެކު ކުރިއަށްގެންދިއުމުގައި އެ ކޮމިޝަންގެ މުވައްޒަފުން ކުރަމުންދާ މަސައްކަތްތަކުގެ އަގު ވަޒަންކުރުމަށް، ކޮމިޝަންގެ ފަރާތުން މިވަނީ ޚާއްސަ އެވޯޑެއް ދީފައެވެ. "ސްޓާފް ނައިޓް 2021"ގެ ތެރެއިން ކޮމިޝަނަށް 10އަހަރަށްވުރެ ދިގު މުއްދަތަށް ޚިދުމަތްކޮށްދެއްވި 11 މުވައްޒަފުންނާއި ހާޒިރީއަށް އެންމެ ރަނގަޅު 3 މުވައްޒަފަކަށް ސްޓާފް އެވޯޑް ދީފައިވެއެވެ. މިއީ ކޮމިޝަނުން މުވައްޒަފުންގެ އަގު ވަޒަންކޮށް އެވޯޑެއްދިން ފުރަތަމަ ފަހަރެއެވެ.
"ކޮމިޝަނުގެ މުވައްޒަފުން ކުރަނީ ވަރަށް ބުރަ މަސައްކަތެއް. ކޮމިޝަންގެ ކޮންމެ މަސައްކަތެއްވެސް ކާމިޔާބުކަމާއެކު ގެންދެވެނީ މުވައްޒަފުންގެ ބޮޑު އެހީތެރިކަމަކާއެކު. އެހެންވީމާ ހާމަކޮށްދޭން ބޭނުންވަނީ މިއިން ކޮންމެ މުވައްޒަފެއްގެ މަސައްކަތް ކޮމިޝަނުން ބަލައިގަންނަކަން." ބްރޯޑްކާސްޓިންގ ކޮމިޝަންގެ ރައީސާ މަރިޔަމް ވަޙީދާ ވިދާޅުވިއެވެ.
މަރިޔަމް ވަޙީދާ ވިދާޅުވީ ކޮމިޝަނަކީ މުވައްޒަފުންނާ ގާތުން، އެންމެން ގުޅިގެން އެކުގައި މަސައްކަތް ކުރާ މާޙައުލަކަށް ބަދަލުކޮށްފައިވާކަމަށެވެ. ކޮމިޝަނުގެ ރައީސާ ވިދާޅުވީ އެކޮމިޝަންގެ އޮނިގަނޑު ރީސްޓްރަކްޗަރކޮށް، މުވައްޒަފުންނަށް ކުރިއެރުން ހޯދައިދިނުމަށް ކޮމިޝަނުން މަސައްކަތް ކުރަމުންދާކަމަށެވެ.
"ކޮމިޝަނުގެ ތެރެއިން ހަގީގަތުގައި ކުރެވެނީ ވަރަށްބުރަ މަސައްކަތެއް. ކޭސްއެއް ލޮގް ކުރުމުން، ކޮމްޕްލެއިން ސެކްޝަނުން، ލީގަލް ސެކްޝަނުން، އިދާރީ މުވައްޒަފުން، އެތަށް މަސައްކަތެއްކޮށް ކޮމިޝަންގެ މޭޒާ ހަމައަށް އަންނަނީ. ވަރަށް ގިނަ ލިޔެކިޔުންތައް، ވަރަށް ގިނަ ދުވަހުގެ މަސައްކަތް. ކޮމިޝަންގެ ތެރެއިން މުވައްޒަފުން ކުރަނީ ވަރަށް ބުރަ މަސައްކަތެއް. މުވައްޒަފުންގެ މަސައްކަތުން، ކޮމިޝަނަށް އޮތް ލޯތްބާ އިޙްތިރާމް އެނގޭ." މަރިޔަމް ވަހީދާ ވިދާޅުވިއެވެ.
ބްރޯޑްކާސްޓިންގ ކޮމިޝަނަކީ ބްރޯޑްކާސްޓިން މީޑިއާތަކުގެ ބެލެނިވެރި ފަރާތެވެ. މީޑިއާގެ އުސޫލުތަކާއި މިންގަނޑުތަކަށް ބްރޯޑްކާސްޓަރުން ހޭލުންތެރިކުރުވުމަށް އެކިކަހަލަ ޕްރޮގްރާމްތައްވެސް އަންނަނީ ހިންގަމުންނެވެ. ކޮމިޝަނުން މިވަގުތު އެންމެ މުހިންމު މަސައްކަތެގެ ގޮތުގައި ކުރަމުން އަންނަނީ، ބްރޯޑްކާސްޓިންގގެ 11 އަހަރުވީ ޤާނޫނު، ޒަމާނާ އެއްގޮތަށް އިސްލާހުކުރުމުގެ މަސައްކަތެވެ.