ބަންގްލަދޭޝްއިން ދިވެހިރާއަށް 4 ދާއިރާއަކުން އެހީތެރިކަން ދިނުމުގެ ފަހުމުނާމާތަކުގައި ސޮއިކޮށްފިއެވެ. ފަހުމުނާމާގައި ސޮއިކޮށް، އެކަމުގެ ލިޔުން ހަވާލުކުރުމަށް ބޭއްވި ރަސްމިއްޔާތުގައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުއާއި ކެބިނެޓް މެންބަރުންނާއި ބަންގްލަދޭޝް ސަރުކާރުގެ އިސްވެރިން ބައިވެރިވެ ވަޑައިގެންނެވިއެވެ.
ދެ ޤައުމުގެ ދެމެދުގައި ޤާއިމުކުރި 4 ފަހުމުނާމާގެ ތެރެއިން ދިވެހިރާއްޖެއާއި ބަންގްލަދޭޝްއާ ދެމެދު ޤާބިލު ޞިއްޙީ ޚިދުމަތްތެރިން ހޯދުމަށް "މެމޮރަންޑަމް އޮފް އަންޑަސްޓެންޑިންގ އޮން ދަ ރިކްރޫމަންޓް އޮފް ކޮލިފައިޑް ހެލްތު ޕްރޮފެޝަނަލްސް" އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ މިނިސްޓަރ އޮފް ހެލްތު އަޙުމަދު ނަސީމްއެވެ. ބަންގްލަދޭޝްގެ ފަރާތުން ސޮއިކުރެއްވީ އެޤައުމުގެ މިނިސްޓަރ އޮފް ހެލްތު އެންޑް ފެމިލީ ވެލްފެއަރ ޒާހިދް މާލިކްއެވެ.
ދިވެހި ސަރުކާރާއި ބަންގްލަދޭޝް ސަރުކާރާ ދެމެދު ޞިއްޙީ ދާއިރާއިން މީހުން ބިނާކުރުމަށް ވެފައިވާ އެއްބަސްވުން އާކުރުމަށް "ރިނިއުވަލް އޮފް މެމޮރަންޑަމް އޮފް އަންޑަސްޓޭންޑިންގ އިން ދަ އޭރިއާސް އޮފް ހެލްތްކެއަރ އެންޑް މެޑިކަލް ސައިންސް" ގައި މިއަދު ސޮއިކުރެއްވެވިއެވެ.
ރާއްޖޭގެ ސިއްޙީ ދާއިރާއަށް ބަލާއިރު ގިނަ އަދަދެއްގެ ދިވެހި ޑޮކްޓަރުންނާ ޕްރޮފެޝަނަލުންނަކީ، ބަންގްލަދޭޝްއިން ތަމްރީންވެ ރާއްޖެއަށް ޚިދުމަތްކުރަމުންދާ ފަރާތްތަކެވެ. ޚާއްސަކޮށް މި ކުރިމަތިވި ކޯވިޑްގެ ޙާލާތާ ގުޅިގެން ސިއްޙީގޮތުން ރާއްޖެއަށް ބޭނުންވި އިމަރޖެންސީ އެހީތެރިކަން ފޯރުކޮށްދިން ޤައުމުތަކުގެ ތެރޭގައިވެސް ބަންގްލަދޭޝް ހިމެނެއެވެ. އެ ޤައުމުން ރާއްޖެއަށްވަނީ ޑޮކްޓަރުންގެ ޓީމެއް ފޮނުވާފައެވެ.
ދިވެހި ސަރުކާރާއި ބަންގްލަދޭޝް ސަރުކާރާ ދެމެދު ކުޅިވަރާއި ޒުވާނުން ތަރައްޤީކުރުމުގެ ރޮނގުން ގުޅުން ބަދަހިކުރުމަށް " މެމޮރަންޑަމް އޮފް އަންޑަސްޓޭންޑިންގ އޮން ކޯޕަރޭޝަން އިން ދަ އޭރިއާ އޮފް ޔޫތް އެންޑް ސްޕޯޓްސް ޑިވެލޮޕްމަންޓް" ގައި ސޮއިކުރެއްވީ މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް، އަޙްމަދު މަޚްލޫފް އާއި ބަންގްލަދޭޝްގެ ފޮރިން ސެކްރެޓަރީ މައްޞޫދު ބިން މޮމެން އެވެ.
އަދި ޓެކްސްއަށް މަކަރު ހެދުމުގެ ފުރުޞަތު ނައްތާލުމަށާއި، ޑަބަލް ޓެކްސޭޝަން ނައްތާލުމަށްވެސް ދިވެހި ސަރުކާރާއި ބަންގްލަދޭޝް ސަރުކާރާ ދެމެދު އެއްބަސްވުމެއްގައި ސޮއިކުރެއްވެވިއެވެ. މިއެއްބަސްވުމުގައި ދިވެހިރާއްޖޭގެ ފަރާތުން ސޮއިކުރެއްވީ މޯލްޑިވްސް އިންލެންޑް ރެވެނިއު އޮތޯރިޓީގެ ކޮމިޝަނަރ ޖެނެރަލް އޮފް ޓެކްސޭޝަން ފަތުޙުﷲ ޖަމީލް، އަދި ބަގްލަދޭޝްގަ ފަރާތުން ސޮއިކުރެއްވީ ބަންގްލަދޭޝްގެ ނެޝަނަލް ބޯޑް އޮފް ރެވެނިއުގެ ޗެއަރމަން އެމް.ޑީ ރަހްމަތުލް މުނީމް އެވެ.
މި އެއްބަސްވުމުގެ އިތުރުން ބަންގްލަދޭޝްއާ ދިވެހިރާއްޖޭގެ ގާތް ގުޅުން ރަމްޒުކޮށްދިނުމަށް، ރާއްޖޭގެ އަސްކަރިއްޔާއަށް ބަންގްލަދޭޝްއިން ހަދިޔާކުރި އަސްކަރީ އުޅަނދުތަކުގެ ތަޅުދަނޑި ރަމްޒީގޮތުން ހަވާލުކޮށްދެއްވުންވެސް މި ރަސްމިއްޔާތުގައި ކުރިއަށްދިޔައެވެ. އެގޮތުން ރާއްޖެއިން މި އަސްކަރީ އުޅަނދުތަކުގެ ރަމްޒީ ތަޅުދަނޑިއާ ހަވާލުވެވަޑައިގަތީ ދިވެހިރާއްޖޭގެ ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުالله ޝަމާލެވެ. ތަޅުދަނޑި ހަވާލުކޮށްދެއްވީ ބަންގްލަދޭޝްގެ ޗީފް އޮފް އާރމީ ސްޓާފް ޖެނެރަލް އެސް.އެމް ޝާފިޢުދީން އަޙްމަދެވެ.
1978ވަނަ އަހަރު ރާއްޖެއާ ބަންގްލަދޭޝްއާއެކު ދެމެދު ޚާރިޖީ ގުޅުން ޤާއިމުކުރުމަށްފަހު، އެ ޤައުމުން ރާއްޖެއަށް އަންނަނީ އެކި ގޮތްގޮތުން އެހީތެރިކަން ފޯރުކޮށްދެމުންނެވެ. ރާއްޖެއާ ބަންގްލަދޭޝްއާ ދެމެދު ޚާރިޖީ ގުޅުން ޤާއިމުކުރިތާ 43އަހަރުވަނީ ފުރިފައެވެ.