އިންގްލިޝް ޕްރިޕަރޭޓަރީ އެންޑް ސެކަންޑްރީ ސްކޫލް (އީޕީއެސް)އާ ހަމައިން، ރާއްޖޭގައި ވަށާޖެހޭ ތަޢުލީމު އޮތީ ފެށިފައިކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އީޕީއެސްއަށް ޚިދުމަތްކޮށްދެއްވި ޚިދުމަތްތެރިންގެ އަގު ވަޒަންކުރުމަށް ބޭއްވި "ޚިދުމަތުގެ ހަވީރު" ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.
އިންގްލިޝް ޕްރެޕް ސްކޫލްގެ ނަމުގައި އީޕީއެސްގެ ޚިދުމަތް ފުރަތަމަ ފެށީ 1969ގައެވެ. އޭރު ކިޔަވައިދިނީ 5 ކްލާސްރޫމްގައި 83 ދަރިވަރުންނާއެކުއެވެ. ރާއްޖޭގެ މިހާރުގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ތަޢުލީމީ ޙަޔާތުގެ ބައެއްވެސް ފުރިހަމަކުރެއްވީ އީޕީއެސް ސްކޫލްގައެވެ.
ސްކޫލްގެ ޚިދުމަތްތެރިންގެ އަގު ވަޒަންކުރުމަށް ބޭއްވި "ޚިދުމަތުގެ ހަވީރު" ޝަރަަފުވެރިކޮށްދެއްވައި ވާހަކަދައްކަވަމުން ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ އެމަނިކުފާނު ސްކޫލްގައި އުޅުއްވި ދުވަސްވަރުގެ ހަނދާން އާކުރައްވާފައެވެ.
"ހަނދާންވޭ ކްލާހުގެ ވަނައެއް ލިބި، ސްޓޭޖްމަތިން ލިޔުން ލުބުނު ހަނދާން. ލިޔުން ލިބުނީ އޭރުގެ ޓްރާންސްޕޯޓް މިނިސްޓަރ މައުމޫން އަބްދުލްޤައްޔޫމްގެ އަތްޕުޅުން. އޭގެފަހުން ރައީސް މައުމޫނަށްވީ." ރައީސް އޭރުގެ ހަނދާން އާކުރެއްވިއެވެ.
ރައީސް ވިދާޅުވީ އީޕީއެސްއަކީ ރާއްޖޭގެ ތަޢުލީމީ ނިޒާމަށް ބޮޑެތި ހެޔޮ ބަދަލުތަކެއް ގެނައި ސްކޫލެއްކަމަށެވެ. އަދި މިހާރު ރާއްޖެމިދެކޭ ތަރައްޤީއަށް އެތަށްބަޔަކު އުފެއްދެވުމުގެ ފަހަތުގައިވާ ތަޢުލީމީ މުއައްސަސާކަމަށެވެ. ތަޢުލީމު ދިނުމުގެ އިތުރުން ދިރިއުޅުމުގެ އެތަށް ހުނަރެއް ދަރިވަރުންނަށް ދަސްކޮށްދީ، މީހުން ބިނާކުރި ސްކޫލެއްކަމަށެވެ.
"ތަރުބިއްޔަތު، ތަމްރީން އަދި ދުނިޔެއަށް ދަރިވަރުން ހޭލުންތެރިކޮށްދިން ސްކޫލް. ހަގީގަތް އޮތީ ސާފުކޮށް ފެންނަން. ވަށާޖެހޭ ތަޢުލީމް އީޕީއެސްއާ ހަމައިން އޮތީ ފެށިފައި. މިއަދު މި ރާއްޖެ އޮތީ އީޕީއެސްއަކަށް ބޭނުންވެފައި." ރައީސް ވިދާޅުވިއެވެ.
ރައީސުލްޖުމްހޫރިއްޔާވަނީ އީޕީއެސްގެ ފައުންޑަރުންނާއި، ސްކޫލްގެ ޚިދުމަތެރިންނަށް ހިތުގެ އެންމެ ފުންމިނުން ޝުކުރު އަދާކުރައްވާފައެވެ. އަދި އީޕީއެސްގެ ނަން ފަނޑު، ނުވާނެހެން ދިރުވާ އާލާކުރުމަށް ގޮވާލެއްވިއެވެ.