ޕިލިޕީންސްގައި ޕައިލެޓްކަން ކިޔަވާ ދިވެހި ދަރިވަރުންގެ ޙާލު އާއްމުގޮތެއްގައި ރަނގަޅު: ފޮރިން މިނިސްޓްރީ
ފިލިޕީންސްގައި ޕައިލެޓްކަން ކިޔަވަމުންދާ ދިވެހި ދަރިވަރުން ތިބި ފްލައިންގ ސްކޫލާ މިހާރު ގުޅިފައިވާ ކަމަށާ، ހުރިހާ ދަރިވަރުންގެ ޙާލުވެސް އާއްމުގޮތެއްގައި ރަނގަޅުކަމަށް ފޮރިން މިނިސްޓްރީން ވިދާޅުވެއްޖެއެވެ.
ތޫފާން ރާއީގެ ސަބަބުން ފިލިޕީންސްގައިވަނީ ވަރަށް ބޮޑަށް މޫސުން ގޯސްވެފައެވެ. އެ ޤައުމުގައި ދިވެހި ދަރިވަރުން ކިޔަވަމުންދާ ބައެއް ސަރަޙައްދުތަކަށްވެސް މޫސުން ގޯސްވެ ބޮޑެތި ގެއްލުންތައްވަނީ ވެފައެވެ. މިއާ ގުޅިގެން ދިވެހި ދަރިވަރުންގެ ޙާލަތު ވަރަށް ގާތުން ބަލަމުންދާކަމަށާ، އަދި ބޭނުންވާ ޒަރޫރީ އެހީ ލިބެމުންދާކަން ކަށަވަރުކުރަމުންދާ ކަމަށް މިނިސްޓްރީންވަނީ ވިދާޅުވެފައެވެ.
އެގޮތުން ޤައުމުގެ ކަމާބެހޭ ފަރާތްތަކާ ގުޅިގެން އެކުދިންނަށް ބޭނުންވާ ކާނާއާއި ފެން ލިބެމުންދާ ކަމަށް މިނިސްޓްރީންވަނީ ވިދާޅުވެފައެވެ. އަދި މިވަގުތު ހުރިހާ ދަރިވަރުންގެ ޙާލުވެސް އާއްމުގޮތެއްގައި ރަނގަޅު ކަމަށްވެސް އެމިނިސްޓްރީން ވިދާޅުވެއެވެ.
ދިވެހި ދަރިވަރުން ކިޔަވާ ފްލައިންގ ސްކޫލްގައި 45 ދަރިވަރުންދަނީ ޓްރެއިނިންގ ހަދަމުންނެވެ. ދިވެހި ކުދިން ދިރިއުޅޭ ސަރަޙައްދުންވަނީ ކަރަންޓު ކެނޑިފައެވެ.
މީގެތެރެއިން ބައެއް ދަރިވަރުންގެ ބެލެނިވެރިންގެ އެދުމުގެމަތީން، އެ ދަރިވަރުންގެ ބެލެނިވެރިންނާވެސް މިނިސްޓްރީގެ ފަރާތުންވަނީ ބައްދަލުކޮށް ދަރިވަރުންގެ ޙާލަތު އޮޅުންފިލުއްވާދީފައެވެ.
ފޮރިން މިނިސްޓްރީން ވިދާޅުވި ދިވެހި ކުދިން ތިބޭ ސަރަޙައްދަށް ބޮޑެތި ގެއްލުންތައް ކުރިމަތިވެފައިވަތީ، އެހީ ފޯރުކޮށްދިނުމުގައިވެސް ޕިލިޕީންސްގެ ކަމާބެހޭ ފަރާތްތަކަށް ދަތިތަކާ ކުރިމަތިވެފައިވާކަމަށެވެ. ދިވެހި ދަރިވަރުންނަށް އިތުރަށް އެހީތެރިކަން ފޯރުކޮށްދިނުމަށް ފިލިޕީންސްގެ ސަފީރާ، ފިލިޕީންސްގައި ހުންނަވާ ދިވެހިރާއްޖޭގެ އޮނަރަރީ ކޮންސުލް މެދުވެރިކޮށް އިތުރަށް ދަނީ މަސައްކަތްކުރަމުންނެވެ.