ރަށުގައި އޮތީ ވިއްސަކަށް ފޫޓުގެ ކުޑަ ޖެޓީއެކެވެ. ޖެޓީގެ ކޮންކްރީޓްތައް ހަލާކުވެވަނީ މޫދަށް ފައިބާފައެވެ. ރަށަށް އަރާފޭބޭނެ އެއްވެސްގޮތެއް ނެތެވެ.
އެންމެ ބޮޑު ދައްޗަކީ ރަށު ރައްޔިތުންނަށް ބޭނުންވާ އެންމެ ޒަރޫރީ މުދާވެސް ރަށަށް އެރުވޭނެ ގޮތެއް ނެތުމެވެ. ޚާއްސަކޮށް އިމާރާތް ކުރުމާ ގުޅޭ ސާމާނު ރަށަށް އެރުވޭނެ އެއްވެސް ގޮތެއް ނެތެވެ. މިއީ ރަށުގެ އިޤްތިޞާދަށްވެސް އޮތް ގޮންޖެހުމެކެވެ.
ހާލުބޮޑު ބަލި މީހަކު ކަނޑު އުޅަނދަކަށް އެރުވުންވެސްވަނީ، ރައްޔިތުން ޖެހިލުންވާފަދަ ކަމަކަށެވެ. މިކަމަށް ޙައްލެއް ލިބުމަކީ އދ.މަންދޫ ރައްޔިތުންގެ އަބަދުގެ އާދޭހެވެ.
ޒަމާންތަކެއްވަންދެން އެރަށުގައި ބޭނުންކުރަމުން އައީ ރައްޔިތުންގެ ފާލަމެކެވެ. ފާލަންވެސް ހަލާކުވެ، ރަށުގެ ރައްޔިތުންނަށް މިހާރު މަޖުބޫރުވެފައިވަނީ ރަށުގައި ގެސްޓްހައުސް ހިންގާ ބަޔަކު ބޭނުންކުރަން ހަދާފައިވާ ކުޑަ ފާލަމެއް ބޭނުންކުރުމަށެވެ.
އދ.މަންދޫ ވެފައިވަނީ ރާއްޖޭގައި ބަނދަރެއް ނެތް މަދު ރަށްތަކުގެތެރެއިން ރަށަކަށެވެ. އެކި ސަރުކާރުތަކުގައި އެދިގެންވެސް މިހާތަނަށްވެސް މިކަމުގައި ޢަމަލީ ސިފައެއް ޖެހިފައެއް ނެތެވެ.
މި ސަރުކާރުގެ އެއްމެ ބޮޑު އެއް އަމާޒަކީ ރަށްރަށުގެ ލަފާކުރުމުގެ ދަތިކަން ޙައްލުކޮށްދިނުމެވެ. ބަނދަރު ނެތް ރަށްރަށުގައި ބަނދަރު ތަރައްޤީކުރުމެވެ. މަންދޫގައި ޒަމާނީ ފެންވަރުގެ ބަނދަރެއް ތަރައްޤީކުރުމަށް އެމްޓީސީސީއާ ހަވާލުކޮށްފައިވަނީ 2019ވަނަ އަހަރުއެވެ. ބަނދަރުގެ ޢަމަލީ މަސައްކަތް ފެށުން ލަސްވެފައިވަނީ ބަނދަރު ތަރައްޤީކުރާނެ ސަރަޙައްދު ކަނޑަނޭޅިގެންނެވެ.
ނަމަވެސް ސަރވޭތަކަށްފަހު ރަށުގެ ހުޅަނގުކޮޅުގައި ބަނދަރު ތަރައްޤީކުރުމަށް ނިންމާ، މަންދޫގައި ބަނދަރު ތަރައްޤީކުރުމުގެ ޢަމަލީ މަސައްކަތް މިވަނީ ފަށާފައެވެ. އެތައް ތަކުލީފަކާ، އެތައް ޒަމާންތަކެއް ވަންދެން ރަށުގެ ރައްޔިތުންކުރި އުއްމީދުގައި މިއަދު މިވަނީ ކުލަޖެހެން ފަށާފައެވެ.
މަންދޫގައި ތަރައްޤީކުރާ ބަނދަރަކީ 236 މީޓަރުގެ ބަނދަރެކެވެ. މަންދޫގައި ބަނދަރު ތަރައްޤީ ކުރުމަށް ހިންގާ މަޝްރޫޢުގެ ދަށުން، 65854 ކިއުބިކް މީޓަރުގެ ސަރަޙައްދެއް ފުންކުރުމާއި، 319 މީޓަރު ސަރަޙައްދުގައި ބޭރު ތޮށި ލުމާއި، 71 މީޓަރު ސަރަހައްދެއްގައި ރިވެޓްމަންޓްޖެހުމާއި، 50 މީޓަރުގެ ސަރަޙައްދުގައި ގްރޮއިންސްޖެހުން ހިމެނެއެވެ.
މީގެ އިތުރުން ނެރު ބައްތިއާއި، ބަނދަރު އަލިކުރުމަށް ލައިޓް ހަރުކުރުމާއި، ޕޭމަންޓްޖެހުމުގެ މަސައްކަތްވެސް މިމަޝްރޫޢުގެ މަސައްކަތްތަކުގެ ތެރޭގައި ހިމެނެއެވެ. މި މަޝްރޫޢަށް ސަރުކާރުން 34.1 މިލިއަން ރުފިޔާ ޚަރަދުކުރެވެ.
މަންދޫގެ އާބާދީ އުޅެނީ 400ގައެވެ. ނަމަވެސް ރަށު ފަތުރުވެރިކަމުގެ ވިޔަފާރިއަށް މަންދޫ މިހާރު ވަންނަމުން އަންނައިރު، ރަށުގައި ދިރިއުޅޭ އާބާދީ 500އަށް އަރައެވެ.
މަންދޫގައި 4 ގެސްޓްހައުސް ހިންގައެވެ. ބަނދަރާއެކު ގެސްޓްހައުސް ވިޔަފާރިއާއި ރަށުގެ އިޖްތިމާޢީ އަދި އެހެނިހެން އިޤްތިޞާދީ ކަންކަމަށްވެސް ބޮޑު ކުރިއެރުމެއް ލިބޭނެކަމަށް ރައްޔިތުން ޤަބޫލްކުރެއެވެ.