މިދިޔަ އޮކްޓޫބަރުމަހު މާލޭގައި މަރުވި ފިލިޕީންސް ނަރުހުގެ މަރާ ގުޅިގެން ހައްޔަރުކުރި ދިވެހި އަންހެން މީހާގެ ބަންދަށް 15 ދުވަސް ޖަހައިފިއެވެ.
ފުލުހުން ވިދާޅުވީ ހައްޔަރުކުރި އަންހެން މީހާ ބަންދުގައި ބަހައްޓައިދިނުމަށް ކޯޓުގައި އެދުމުން، 15 ދުވަހުގެ ބަންދުގެ މުއްދަތެއް ކޯޓުން ދީފައިވާކަމަށެވެ.
އަންހެން މީހާ ހައްޔަރުކޮށްފައިވަނީ ބުރާފަސްތިދުވަހުއެވެ. ކޯޓު އަމުރެއްގެދަށުން ހައްޔަރުކޮށްފައިވަނީ އުމުރުން 24 އަހަރުގެ ދިވެހި އަންހެނެކެވެ.
އޮކްޓޯބަރު މަހުގެ 19 ވަނަ ދުވަހު މަރުވި ފިލިޕީންސް އަންހެން މީހާގެ މަރުގެ މައްސަލަ ފުލުހުން ތަޙުގީގުކުރަން ފެށީ، އެޙާދިސާއާ ގުޅިގެން އަދަޔާ ޚިލާފު ކަންތައްތަކެއް ފާހަގަކުރެވިގެންނެވެ. މަންޒަރު ދުށް ބައެއް މީހުން ބުނިގޮތުގައި، އޭނާ މަރުވެގެން ހޮސްޕިޓަލަށް ގެނެސްފައިވަނީ އޭނާގެ ފިރިމީހާއެވެ. މި މައްސަލައާ ގުޅިގެން އެންމެ ބޮޑަށް ޝަކުކުރެވެނީވެސް ނަރުސްމީހާގެ ފިރިމީހާއަށެވެ. އޭނާވެސް މަސައްކަތް ކުރަމުންދިޔައީ އައިޖީއެމް ހޮސްޕިޓަލްގައި ނަރުހެއްގެ ގޮތުގައެވެ. މިކަމާއި ގުޅިގެން ފުލުހުން ވަނީ ނަރުސް މީހާގެ ފިރިމީހާވެސް ހައްޔަރުކޮށްފައެވެ.
މަރުވެގެން އަންހެން މީހާ ހޮސްޕިޓަލަށް ގެންދިޔައީ، ޑިއުޓީގައި ހުރުމަށްފަހު ގެއަށް ބްރޭކަށް ދިޔަތާ ކުޑަ ވަގުތުކޮޅެއް ފަހުންނެވެ. ހޮސްޕިޓަލަށް އަންހެން މީހާގެ ހަށިގަނޑު ގެންދިޔަވަގުތުގަވެސް އޭނާގެ ފިރިމީހާގެ ކިބައިން އާދަޔާ ޚިލާފަ ކަންކަތައްތަކެއް ފާހަގަކުރެވުނުކަމަށް އެވަގުތު އެތާތިބި ބައެއް މީހުން ބުނެފައިވެއެވެ.
އެމީހުން ބުނިގޮތުގައި އަންހެން މީހާގެ ކަރުގައި ކޮންމެވެސް ކަހަލަ ނިޝާންތަކެއް ހުއްޓެވެ. ނަމަވެސް އެއީ ކަރުގައި ވާ / ފޮތި އައްސައިގެން ދަންޖެހިފައިވާ ނިޝާންތަކަކަށްވުރެ ބޮޑަށް ޝައްކު ކުރެވެނީ، މީހެއްގެ އިނގިލީގެ ނިޝާންތަކެއްގެ ގޮތުގައެވެ.
އަދި މައްސަލަ އިތުރަށް ތަޙުޤީގުކުރުމަށް، އަންހެން މީހާގެ ހަށިގަނޑު ރާއްޖެއިން ބޭރަށް ފޮނުވާ ޕޯސްޓްމޯޓަމްވެސް ހަދާފައިވެއެވެ. ޕޯސްޓްމޯޓަމަށްފަހު ފުލުހުން ބުނެފައިވަނީ އަންހެން މީހާ މަރުވެފައިވަނީ މީހަކު ދިން އަނިޔާއަކުންކަން ހާމަވެފައިވާކަމަށެވެ.
ތަޙުގީގަށްފަހު އަންހެން މީހާގެ ހަށިގަނޑު އާއިލާއާ ހަވާލުކުރީ ނޮވެމްބަރު މަހުގެ 11 ވަނަ ދުވަހުއެވެ.