އައިޖީއެމްއެޗްގައި މަސައްކަތްކުރި ފިލިޕީންސް ނަރުހުގެ މަރުގެ މައްސަލައާ ގުޅިގެން ދިވެހި އަންހެނަކު ހައްޔަރުކޮށްފައިވާކަމަށް ފުލުހުން ވިދާޅުވެއްޖެއެވެ. ޢުމުރުން 24އަހަރުގެ އަންހެން މީހާ ހައްޔަރުކޮށްފައިވަނީ ކޯޓުއަމުރެއްގެ ދަށުންނެވެ.
މައްސަލައިގެ ތަޙުޤީގު މިހާރުވެސް ކުރިއަށްދާކަމަށް ފުލުހުންވަނީ ވިދާޅުވެފައެވެ.
އޮކްޓޯބަރު މަހުގެ 19ވަނަ ދުވަހު މަރުވި ފިލިޕީންސް އަންހެންމީގެ މަރުގެ މައްސަލަ ފުލުހުން ތަޙުގީގުކުރަން ފެށީ، އެޙާދިސާއާ ގުޅިގެން އަދަޔާ ޚިލާފައި ކަންތައްތަކެއް ފާހަގަކުރެވިގެންނެވެ. މަންޒަރުދުށް ބައެއް މީހުން ބުނިގޮތުގައި، އޭނާ މަރުވެގެން ހޮސްޕިޓަލަށް ގެނެސްފައިވަނީ އޭނާގެ ފިރިމީހާއެވެ. މި މައްސަލައާ ގުޅިގެން އެންމެ ބޮޑަށް ޝަކުކުރެވެނީވެސް ނަރުސްމީހާގެ ފިރިމީހާއަށެވެ. އޭނާވެސް މަސައްކަތް ކުރަމުންދިޔައީ އައިޖީއެމް ހޮސްޕިޓަލްގައި ނަރުހެއްގެ ގޮތުގައެވެ.
މަރުވެގެން އަންހެން މީހާ ހޮސްޕިޓަލަަށް ގެންދިޔައިީ، ޑިއުޓީގައި ހުރުމަށްފަހު ގެއަށް ބްރޭކަށް ދިޔަތާ ކުޑަ ވަގުތުކޮޅެއް ފަހުންނެވެ. ހޮސްޕިޓަލަށް އަންހެން މީހާގެ ހަށިގަނޑު ގެންދިޔަވަގުތުގަވެސް އޭނާގެ ފިރިމީހާގެ ކިބައިން އާދަޔާ ޚިލާފަ ކަންކަތައްތަކެއް ފާހަގަކުރެވުނުކަމަށް އެވަގުތު އެތާތިބި ބައެއް މީހުން ބުނެފައިވެއެވެ.
އެމީހުން ބުނިގޮތުގައި އަންހެން މީހާގެ ކަރުގައި ކޮންމެވެސް ކަހަލަ ނިޝާންތަކެއް ހުއްޓެވެ. ނަމަވެސް އެއީ ކަރުގައި ވާ / ފޮތި އައްސައިގެން ދަންޖެހިފައިވާ ނިޝާންތަކަކަށްވުރެ ބޮޑަށް ޝައްކު ކުރެވެނީ، މީހެއްގެ އިނގިލީގެ ނިޝާންތަކެއްގެ ގޮތުގައެވެ. މިއާ ގުޅިގެން ފުލުހުންވަނީ ނަރުސްމީހާގެ ފިރިމީހާ ހައްޔަރުކޮށްފައެވެ.
އަދި މައްސަލަ އިތުރަށް ތަޙުޤީގުކުރުމަށް، އަންހެން މީހާގެ ހަށިގަނޑު ރާއްޖެއިން ބޭރަށް ފޮނުވާ ޕޯސްޓްމޯޓަމްވެސް ހަދާފައިވެއެވެ. ޕޯސްޓްމޯޓަމަށްފަހު ފުލުހުން ބުނެފައިވަނީ އަންހެން މީހާ މަރުވެފައިވަނީ މީހަކުދިން އަނިޔާއަކުންކަން ހާމަވެފައިވާކަމަށެވެ.
ތަޙުގީގަށްފަހު އަންހެން މީހާގެ ހަށިގަނޑު އާއިލާއާ ހަވާލުކުރީ ނޮވެމްބަރު މަހުގެ 11ވަނަ ދުވަހުއެވެ.