ސަރުކާރުން އެންމެ އިސްކަންދޭ ކަންތަކުގެ ތެރޭގައި މިންތީގެ ތަފާތުކުރުން ނައްތާލުން ހިމެނޭ: ރައީސް

ކޯވިޑަށްފަހު، ކުރިއަށްއޮތް ދެ އަހަރު ސަރުކާރުން ތަންފީޒުކުރުމަށް އެންމެ އިސްކަންދޭ ކަންކަމުގެތެރޭގައި "ޖެންޑަރ އިކުއަލިޓީ އެކްޝަން ޕްލޭން" ހިމަނުއްވާފައިވާ ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވިދާޅުވެއްޖެއެވެ. ރައީސުލްޖުމްހޫރިއްޔާ ވިދާޅުވީ މިންތީގެ ތަފާތުކުރުން ނައްތާލުމަށް ސަރުކާރުން ފަށާފައިވާ މަސައްކަތްތަކުގައި ރާއްޖެއިން މިހާރުވެސް ބޮޑެތި ކާމިޔާބީތަކެއް ހޯދާފައިވާކަމަށެވެ.

"ވިމަން އިން މެނޭޖްމަންޓް"ގެ "ވިމް ޕްރޮފެޝަނަލް އެންޑް ކެރިއަރ ވިމެން އެވޯޑްސް 2021" ޙަފްލާ ޝަރަފުވެރިކޮށްދެއްވާ ވާހަކަފުޅު ދައްކަވަމުން، ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ވިދާޅުވީ ކޯވިޑަށްފަހު، ސަރުކާރުން އެންމެ އިސްކަމެއްދީގެން ފެށި މަސައްކަތްތަކުގެ ތެރޭގައި ޖެންޑަރ އީކުއަލިޓީ އެކްޝަން ޕްލޭން ތަންފީޒްކުރުން ހިމެނޭކަމަށެވެ. ސަރުކާރުންވަނީ ކުރިއަށް އޮތް ދެއަހަރުގެ ތެރޭގައި އިސްކަންދިނުމަށް އެކުލަވާލި "ނެޝަނަލް ރެޒިލިއަންސް އެންޑް ރިކަވަރީ ޕްލޭން"ގެ ތެރޭގައި މިކަމާ ގުޅޭ މުހިންމު މަސައްކަތްތައް ހިމަނުއްވާފައެވެ.

މި ޕްލޭނާއެކު އިޤްތިސާދީ ގޮތުން އަންހެނުން އިތުރަށް ބާރުވެރިކޮށް، އަދި އަންހެނުންނަށް ލިބެންވާ ރައްކާތެރިކަންވެސް އިތުރުވާނެ ކަމަށް ރައީސް ވިދާޅުވިއެވެ. ޚާއްސަކޮށް ކަންކަމުގައި ޚިޔާލު ހޯދުމާއި ސިޔާސަތުތައް ކަނޑައެޅުމުގައި އަންހެނުންގެ ދަޢުރު ފުޅާކުރުމަށް އިސްކަންދެއްވާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.

"ގްލޯބަލް ޖެންޑަރ އިންޑެކްސް ގެޕް 2021އަށް ބަލާއިރު ރާއްޖޭގައި ތަޢުލީމީ ނިޒާމާއި ސިއްޙީ ދާއިރާގައި މިންތީގެ ތަފާތުކުރުމެއް ނެތް. ނަމަވެސް ސިޔާސީ އަދި އިޤްތިޞާދީ ދާއިރާތަކުގައި މިންތީގެ ތަފާތު ބޮޑު. ނަމަވެސް ސަރުކާރުން މިހާރު މިދަނީ މިދާއިރާތަކުން އަންހެނުންގެ ބައިވެރިވުން އިތުރުކުރަމުން." ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ފާހަގަކުރެއްވި ކަންކަމުގެ ތެރޭގައި ކަންކަން ނިންމުމުގައާއި ސިޔާސަތުތައް ކަނޑައެޅުމުގައި އަންހެނުންނަށް ހަމަހަމަ ފުރުޞަތު ދިނުމަށް ކައުންސިލްތަކުގެ ވަކި އިންސައްތައެއް އަންހެނުންނަށް ޚާއްސަކުރުމާއި، ޝަރުޢީ ކޯޓުތަކަށް އަންހެން ފަނޑިޔާރުން އައްޔަންކުރުމާއި، ރާއްޖޭގެ ޚާރިޖީ އޮފީސްތަކުގައި އަންހެނުން ހަމަހަމަކަމާއެކު ތަމްސީލްކުރުން ހިމެނެއެވެ. އަދި ވިހެއުމާ ގުޅިގެން ދޭ ޗުއްޓީ މުސާރައާއެކު 6 މަސްދުވަހަށް އިތުރުކުރުންވެސް ރައީސް ފާހަގަކުރެއްވިއެވެ.

ރައީސުލްޖުމްހޫރިއްޔާގެ ވާހަކަފުޅުގައިވަނީ އަންހެނުން ބާރުވެރިކުރުވުމާއި، އަންހެނުންގެ ތަރައްޤީއަށް ކުރަމުންދާ މަސައްކަތްތަކާ، އަދި އަންހެނުންގެ އަގު ވަޒަންކުރުމަށް މިފަދަ އެވޯޑެއް ދެމުންދާކަމަށްޓަކާ "ވިމެން އިން މެނޭޖްމަންޓް"އަށް ޝުކުރު އަދާކުރައްވާފައެވެ.

އަންހެނުންނަށް ޚާއްސަކޮށްގެންދިން "ވިމް ޕްރޮފެޝަނަލް އެންޑް ކެރިއަރ ވިމެން އެވޯޑްސް 2021"ގައި، އެކި ދާއިރާތަކުން މަސައްކަތްކުރާ ކަނބަލުންނަށްވަނީ އެވޯޑް ދީފައެވެ.

އެގޮތުން ސިއްޙީ، ތިމާވެށި، ތަޢުލީމީ، ކުޅިވަރު އަދި މި ނޫންވެސް ގިނަ ދާއިރާތައް ހިމެނެއެވެ. އަދި މުޖުތަމަޢުގައި ނަމޫނާ ދައްކަމުންދާ އަންހެނުންގެ މަސައްކަތް ފާހަގަކޮށް ޚާއްސަ އެވޯޑެއްވެސް ދީފައިވެއެވެ.

ސްރީލަންކާގެ އަމިއްލަ ޖަމިއްޔާއެއްކަމަށްވާ "ވިމެން އިން މެނޭޖްމަންޓް"ގެ ރާއްޖޭގެ ގޮފި "ވިމެން އިން މެނޭޖްމަންޓް މޯލްޑިވްސް" އުފައްދާފައިވަނީ 2014ވަނަ އަހަރުއެވެ. އެއަހަރުން ފެށިގެން ޖަމިއްޔާއިންދަނީ ރާއްޖޭގައި އަންހެނުން ބާރުވެރިކުރުމަށް މުހިންމު ގިނަ މަސައްކަތްތަކެއް ކުރަމުންނެވެ.