ކޯވިޑް ދިފާއު ވެކްސިން ޑޯޒް ފުރިހަމަކޮށްފައިވާ ދިވެހިންނަށް، ކަރަންޓީންވުމަކާއި ނުލާ ސިންގަޕޫރަށް ދަތުރުކުރެވޭނެ އިންތިޒާމް ހަމަޖައްސައިފިއެވެ.
މިގޮތަށް ހަމަޖައްސާފައިވަނީ ދިވެހިރާއްޖެއާއި ސިންގަޕޫރާ ދެމެދު ޤާއިމުކުރި "ވެކްސިނޭޓެޑް ޓްރެވެލް ލޭން" ވީ.ޓީ.އެލްގެ ދަށުންނެވެ.
މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ވިދާޅުވީ، މި ޓްރެވެލް ލޭން އެކުލަވާލާފައިވަނީ ރާއްޖޭގެ ޓްރާންސްޕޯޓް މިނިސްޓްރީއާ ފޮރިން މިނިސްޓްރީ، ހެލްތް މިނިސްޓްރީ އަދި ސިންގަޕޫރުގެ މިނިސްޓްރީ އޮފް ޓްރާންސްޕޯޓާއެކު ކުރިއަށްގެންދިޔަ މަޝްވަރާތަކުގެތެރެއިންކަމަށެވެ.
މި އެއްބަސްވުމާއެކު، ކަރަންޓީންވުމަކާ ނުލާ ދިވެހިރާއްޖެއިން ސިންގަޕޫރަށް ދަތުރުކުރެވޭނީ މިމަހުގެ 16 ވަނަ ދުވަހުން ފެށިގެންނެވެ. ހެލްތް ޕްރޮޓެކްޝަން އެޖެންސީ އެޗްޕީއޭއިން ދޫކޮށްފައިވާ ކޯވިޑް19 ޑިޖިޓަލް ވެކްސިން ސެޓްފިކެޓެއް އޮންނަ ކޮންމެ ދިވެއްސަކަށްވެސް، ކަނޑައެޅިފައިވާ ވީ.ޓީ.އެލް ފްލައިޓްތަކުން ކޯވިޑް19 ނެގެޓިވް ނަތީޖާއާއެކު ދަތުރުކުރެވޭނެއެވެ. މިދަތުރުތަކަށް ކޯވިޑް ޓެސްޓުކުރަންޖެހެނީ ދަތުރަށް ފުރާ ގަޑީގެ 48 ގަޑިއިރުގެ ތެރޭގައެވެ.
މި އުސޫލުގެދަށުން ސިންގަޕޫރަށް ދަތުރުކުރާ ފަރާތްތަކުން މިކަމަށް ޚާއްސަ ޕޯޓަލް މެދުވެރިކޮށް ރެޖިސްޓްރީ ކުރަން ޖެހޭނެއެވެ.
އޮކްޓޯބަރުމަހު ސިންގަޕޫރުގައި ކޯވިޑްގެ ކޭސްތައް އިތުރުވުމަށްފަހު މިހާރު އަންނަނީ މަޑުމަޑުން އަދަދު ދަށަށްދަމުންނެވެ. އެގޮތުން ދުވާލަކު ރިޕޯޓްކުރި ކޭސްތަކުގެ އަދަދު 3000 އިން މަތީގައި ހުރުމަށްފަހު މިހާރުވަނީ 500 އަށް ތިރިވެފައެވެ.
ސިންގަޕޫރުގައި ވެކްސިން ޖެހޭ އާބާދީގެ %80މީހުން މިހާރުވަނީ ވެކްސިންވެސް ފުރިހަމަކޮށްފައެވެ. އަދި %10މީހުންވަނީ ވެކްސިންގެ ބޫސްޓަރ ޑޯޒްވެސް ޖަހާފައެވެ.