ވިޔަފާރިތަކަކީ އިންސާނީ ޙައްގުތައް ހިމާޔަތްކުރާ ތަންތަނަށް ހެދުމަށް އެޗްއާރްސީއެމުން ގޮވާލައިފި
ރާއްޖޭގައި ހިންގާ ވިޔަފާރިތަކަކީ އިންސާނީ ޙައްގުތައް ހިމާޔަތްކުރާ، އިންސާނީ ކަރާމާތަށް ރައްކާތެރި ވިޔަފާރިތަކެއްކަން ކަށަވަރުކުރުމަށްޓަކައި ޚާއްސަ މަސައްކަތްތަކެއް ކުރުމަށް ނިންމާފައިވާ ކަމަށް އެޗްއާރްސީއެމުން ވިދާޅުވެއްޖެއެވެ.
މިއަދު ފާހަގަކުރަމުން އަންނަ ބައިނަލްއަޤްވާމީ އިންސާނީ ޙައްޤުތަކުގެ ދުވަހުގެ މުނާސަބަތުގައި ދެއްވި ޚިޠާބުގައި އެޗްއާރްސީއެމްގެ ރައީސާ މަރިޔަމް މުނާ ވަނީ މަސައްކަތްތެރިންގެ ހައްގު އިސްކޮށް މިރިވެތި ސިފަ ވިޔަފާރީގައި ގެންގުޅޭ ބަޔަކަށް ވުމަކީ މުހިންމުކަމެއްކަން ފާހަގަކުރައްވާފައެވެ.
ކޮންމެ އަހަރެއްގެ ޑިސެމްބަރު މަހުގެ 10 ވަނަ ދުވަސް ފާހަގަކުރަމުން އަންނަނީ ބައިނަލްއަޤްވާމީ އިންސާނީ ހައްޤުތަކުގެ ދުވަހުގެ ގޮތުގައެވެ. މި އަހަރުގެ, އިންސާނީ ޙައްޤުތަކުގެ ޝިއާރެއްގެ ގޮތުގައި, އ.ދ. އިން ކަނޑައަޅާފައިވާ ޝިއާރަކީ "އޯލް ހިއުމަން، އޯލް އީކުއަލް"އެވެ.
މިދުވަހާ ގުޅިގެއް ދެއްވި ޚިތާބުގައި އެޗްއާރްސީއެމްގެ ރައީސާ މަރިޔަމް މުނާ ވިދާޅުވީ ރާއްޖޭގައި ބިދޭސީ މަސައްކަތްތެރިންގެ ހައްގުތަކަށް އިހްތިރާމް ކުރާ ޘަގާފަތެއް އާލާ ކުރަންޖެހޭކަމަށެވެ. އެމީހުންނަކީ ވެސް މުޖްތަމައުގައި އުޅޭ އިހްތިރާމް ލިބިގެންވާ ބައެއް ގޮތަށް ކަމޭހިތަންޖެހޭކަމަށާއި ބިދޭސީ މަސައްކަތްތެރިން ލައްވާވެސް އުސޫލުތަކާ އެއްގޮތަށް މަސައްކަތް ކުރުވުމަށް މޫނާ ގޮވާލެއްވިއެވެ. އަދި މަހުން މަހަށް ހަމައަށް އުޖޫރަ ދިނުމާއި ބިދޭސީ މަސައްކަތްތެރިން ގެނައުމުގެ ހުރިހާ މަރުހަލާއެއްގައިވެސް ގާނޫނީ މިންގަނޑުން އަމަލު ކުރުން މުހިންމުކަން މުނާ ފާހަގަކުރެއްވިއެވެ. އަދި ހިއުމަން ޓްރެފިކިންގެ ޝިކާރައަކަށް ބިދޭސީ މަސައްކަތްތެރިން ނުވާނެ ހަމަޔަކުން ކަންކަން ބައްޓަންކުރުމީ މުހިންމު ކަމެއްކަމަށް އޭނާ ވިދާޅުވިއެވެ. މުނާ ވިދާޅުވީ މަސައްކަތްތެރިންގެ ހައްގު އިސްކުރުވުމަށް އެކޮމިޝަނުންވެސް ޚާއްޞަ މަސައްކަތްތަކެއް ކުރުމަށް މިހާރު ނިންމާފައިވާކަމަށެވެ.
"ސަރުކާރާއި ރައްޔިތުންނާ ގުޅުން ހުރި ސިޔާސަތުތައް ހަރުދަނާ ކުރުވައި އާންމު ފަރުދުންގެ އަސާސީ ޙައްޤުތައް ރައްކާތެރިކޮށް ޙިމާޔަތް ކޮށްދިނުމުގައި އެންމެ ބޮޑު ދައުރެއް އަދާކުރާ އެއްބަޔަކީ، މިނިވަން މަދަނީ ޖަމްޢިއްޔާތަކަށްވީ ހިނދު ޖަމްޢިއްޔާތަކުގެ ދައުރު ފުޅާވުމަކީ ސަރުކާރުގެ ކަންތައްތައް ސީދާ މަގުން ދިއުމަށް ބާރުއެޅޭ އަދި އޭގެ ސަބަބުން ރައްޔިތުންގެ ޙައްޤުތަކަށް ފުރިހަމަކަން ލިބިގެންދާނެކަމެއްކަމުގައި ފާހަގަކުރަން. މަދަނީ ޖަމްޢިއްޔާތައް ބާރުވެރި ކުރުމަށް ގިނަ މަސައްކަތްތަކެއް ކުރަންޖެހޭ. ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީން ކަށަވަރުކޮށްދީފައިވާ ޙައްޤުތައް ރައްޔިތުންނަށް ލިބިދިނުމަށްޓަކައި ދައުލަތުގެ ތިންބާރުންވެސް މަސައްކަތްކުރުމަކީ މުހިއްމުކަމެއް. އަދި ޤައުމުގެ ސުލްޙަމަސަލަސްކަމާއި އަމަންއަމާންކަން ދެމިއޮންނާނޭ ގޮތަށް އަމަން ބަލަހައްޓަވާ ފަރާތްތަކުން ޢަމަލު ކުރުމަށާއި ކޮންމެ ފަރުދެއްގެވެސް އިންސާނީ ކަރާމާތް ނެގެހެއްޓުމަށް ސަމާލުކަން ދެއްވުމަކީ މުހިއްމުކަމެއް"އެޗްއާރްސީއެމްގެ ރައީސާ މަރިޔަމް މުނާ ވިދާޅުވިއެވެ.
މިޚިތާބުގައި މުނާވަނީ ކުޑަކުދިންނާއި އަންހެނުންގެ ޙައްޤުތަކަށް އަލިއަޅުވާލައްވާ ވާހަކަ ދައްކަވާފައެވެ. އެގޮތުން ފާއިތުވި އަހަރަށް ބަލާއިރު، ކުޑަކުދިންނަށް އަނިޔާކޮށްގެން ގުޅުންހުރި ދައުލަތުގެ އިދާރާތަކަށް، ހުށަހެޅުނު މައްސަލަތަކުގެ ތެރެއިން އެންމެ ގިނައީ ޖިންސީ އަނިޔާއާއި އިހުމާލު އަދި ޖިސްމާނީ އަނިޔާކޮށްގެން ހުށަހަޅާފައިވާ މައްސަލަތައްކަން މުނާ ފާހަގަކުރެއްވިއެވެ. އަދި ގެވެށި އަނިޔާގެ މައްސަލަތަކުގެ ތެރެއިން އެންމެ ގިނައީ ކުޑަކުދިންނަށް އަނިޔާކޮށްގެން ހުށަހަޅާފައިވާ މައްސަލަތައްކަމަށާއި ކުޑަކުދިންގެ ނާޖާއިޒު ބޭނުންކޮށްފައިވާ މައްސަލަތައް ރިޕޯޓުކޮށްފައިވާ މިންވަރު އިތުރުވެފައިވާކަން މުނާ ފާހަގަކުރެއްވިއެވެ. .
"ކުޑަކުދިން ގުރޫމްކޮށް، ދީނީ ހަރުކަށި ފިރުކުގެތެރެއަށް ލަންބާލުމަށް މަސައްކަތް ކުރާ ބަޔަކު އުޅޭއިރު، އެފަދަ ކުދިން ސަލާމަތް ކުރުމަށް ކުރެވެން ހުރި މަސައްކަތްތައް މަދުކަމާއި މިފަދަ ކުދިންނަށް ރީހެބިލިޓޭޝަން ޕްރޮގްރާމްތައް ރާވާ ހިންގޭނެ އިންތިޒާމުތަކެއް ސަރުކާރުގެ ތެރެއިން ހަމަޖެހިގެން ދިއުމުގެ މުހިންމުކަމާ އަދި އަނބުރާ މުޖުތަޢުގެ ތެރެއަށް ގެނައުމަށް ސަރުކާރުގެ މުޢައްސަސާތަކުން ގުޅިގެން ބޮޑެތި މަސައްކަތްތަކެއް ކުރަން ޖެހިފައިވާކަން ކޮމިޝަނަށް ފާހަގަކުރެވޭ، މީގެ އިތުރުން، ޖިނާއީ ބޮޑެތި ކުށްތަކަށް ކުޑަކުދިން އަރައިގަންނަ ކަމީ މި ކޮމިޝަނުން ނުހަނު ކަންބޮޑުވާ ކަމެއް، އަދި ކުށްތަކަށް އަރައިގަންނަ ކުދިން އަލުން އަނބުރާ މުޖްތަމައަށް ނެރުމަށްޓަކައި ހަރުދަނާ ރީހެބިލިޓޭޝަން ނިޒާމެއް އޮތުމަކީވެސް ނުހަނު މުހިންމުކަމެއް ކަމުގައި ދެކެން. އެޗްއާރްސީއެމްގެ ރައީސް މަރިޔަމް މުނާ ވިދާޅުވިއެވެ.
މުނާ ވިދާޅުވީ މުޖުތަމައުގެ ކުރިއެރުމަށް ކުރެވޭ މަސައްކަތްތަކުގައި އަންހެނުން ބާރުވެރިކުރުވާ އަންހެނުންގެ ދައުރާއި ސިޔާސަތުތައް އެކަށައެޅުމުގައާއި ކަންކަން ނިންމުމުގައި މިހާރަށްވުރެވެސް ފުޅާކުރަންޖެހޭކަމަށެވެ. އަންހެނުންގެ ޙައްޤުތަކާއި މިންތީގެ ހަމަހަމަކަން މުޖުތަމައު ބަލައިގަންނަ މިންވަރު ދައްވަމުންދާ ކަން ފާހަގަކުރައްވާ މުނާ ވިދާޅުވީ އަންހެނުންގެ ޙައްޤުތަކާއި މިންތީގެ ހަމަހަމަކަން ޤާއިމްކުރުމަށް ކުރާ މަސައްކަތަށް ހުރަސްއެޅުމަށްވެސް ދީން ބޭނުންކުރާކަމަށެވެ. އަދި އަންހެނުންނަށް އަނިޔާކުރުމަށް ދީން ހަތިޔާރެއްގެ ގޮތުން ބޭނުންކުރާކަމީ ކަންބޮޑުވާންޖެހޭ ކަމެއްކަން އޭނާ ފާހަގަކުރެއްވިއެވެ.
އަންހެނުން ބާރުވެރިކުރުވުމަށް ގިނަ މަސައްކަތްތަކެއް ކުރިކަމުގައިވިޔަސް، ސިޔާސީ މައިދާނުގައި އަންހެނުންގެ ބައިވެރިވުން އަދިވެސް މަދުކަމަށާއި މިންތީގެ ހަމަހަމަކަން ޤާއިމްކޮށް އަންހެނުންގެ ބައިވެރިވުން އިތުރުކުރުމަށް މަގުފަހިވާގޮތަށް ޤާނޫނީ އޮނިގަނޑު ފަރުމާކުރެވިފައިވީ ނަމަވެސް އެކަން ތަންފީޒުކުރުމަށް އެކަށީގެންވާ މަސައްކަތްކުރަމުން ނުދާކަން އޭނާ ފާހަގަކުރެއްވިއެވެ.