ކަނޑުގެ ލޮނުގަނޑު އުފުލުން ހުއްޓުވުމަށްޓަކައި ކަނޑުތަކާބެހޭ ބައިނަލްއަޤްވާމީ މުއާޙަދާއަށް އަމަލު ކުރުން ހަރުދަނާ ކުރަން ޖެހޭކަމަށް އ.ދ.ގެ އާއްމު މަޖިލީހުގެ ރައީސް އަދި ދިވެހިރާއްޖޭގެ ޚާރިޖީ ވަޒީރު ޢަބްދުﷲ ޝާހިދު ވިދާޅުވެއްޖެއެވެ.
އ.ދ.ގެ އާއްމު މަޖިލީހުގައި ބޭއްވި ޕްލިނަރީގެ ޖަލްސާގައި ކަނޑުތަކާބެހޭ ބައިނަލްއަޤްވާމީ އުޞޫލުތަކާ ބެހޭގޮތުން ޢާންމު މަޖިލީހުގެ ރައީސް ޢަބްދުﷲ ޝާހިދު ދެއްކެވި ވާހަކަފުޅުގައި ކަނޑުތަކަކީ ދުނިޔޭގެ ހަތްދިހަ އިންސައްތަ ކަމަށާއި، ދުނިޔޭގައި އޮކްސިޖަން އިތުރުކޮށް ކާބަންޑައިއޮކްސައިޑް ފަދަ ނުރައްކާތެރި ގޭސްތައް މަދުކުރުމަށް ކަނޑުތަކުން ކުޅޭ ރޯލު ފާހަގަ ކުރައްވައި، ކަނޑުތަކުގެ ހާލަތާބެހޭގޮތުން ކަންބޮޑުވުން ފާޅުކުރެއްވިއެވެ.
ޝާހިދުގެ ވާހަކަފުޅުގައި، މޫސުމަށް އަންނަ ބަދަލުތަކާއި، ކަނޑުތައް ތަޣައްޔަރުވުމާއި އަދި ޤާނޫނާ ޚިލާފަށް އަދި އިމެއްނެތި ކުރާ މަސްވެރިކަމުގެ ސަބަބުން ކަނޑު ތަކުގެ ހާލަތު ދަށްވަމުންދާކަން ފާހަގަކުރެއްވިއެވެ. އަދި ކަނޑުތައް ޕްލާސްޓިކާއި، ކެމިކަލް އަދި އެނޫންވެސް މިފަދަ މާއްދާ ތަކުން ތަޣައްޔަރު ވެފައިވާ ކަމަށާއި، އޭގެ ނުރަނގަޅު އަސަރު ކަނޑުތަކުގެ ދިރުންތަކުގެ އިތުރުން އިންސާނުންނަށް ވަރަށް ފާޅުކަންބޮޑު ގޮތަކަށް ކުރާކަމަށް ޝާހިދު ވިދާޅުވިއެވެ.
މިގޮތުން ވިހައިގެ އަސަރުކޮށްފައިވާ މަސް އިންސާނުން ކެއުމުގައި ބޭނުންކުރުމުގެ އިތުރުން، ކަނޑުގެ ލޮނުގަނޑު އުފުލުން ފަދަ ކަންތައްތަކުގެ ސަބަބުން ދިމާވާ ގެއްލުންތަކުގެ ބޮޑުބައެއް ތަޙައްމަލް ކުރަނީ ރާއްޖެފަދަ ކުދި ޖަޒީރާ ޤައުމު ތަކުން ކަމަށްވެސް ޝާހިދު ވިދާޅުވިއެވެ.
ކަނޑުތަކަށް ކުރިމަތިވެފައިވާ ގޮންޖެހުން ތަކަކީ އިންސާނީ ނަސްލު ދެމެހެއްޓުމަށް އޮތް ހުރަހަކަށް ވިޔަސް މި ކަންކަން ހުއްޓުވުމަށް ޢަމަލީ ގޮތުން މަސައްކަތް ކުރުމުގައި ޤައުމުތައް ފެންނަނީ ފަހަތު ފަޔަށް ބުރަވެފައިވާތަން ކަމަށް ޝާހިދު ވިދާޅުވިއެވެ. އަދި މިފަދަ ކަންކަން ޙައްލު ކުރެވޭނީ އ.ދ. ފަދަ ބައިނަލްއަޤްވާމީ ޖަމިއްޔާތަކުގެ ތެރެއިން ކަމަށް ވިދާޅުވިއެވެ.
އަންނަ އަހަރަކީ ކަނޑުތަކާބެހޭ ބައިނަލްއަޤްވާމީ މުއާޙަދާއަށް ސާޅީސް އަހަރު ފުރޭ އަހަރުކަން ފާހަގަކުރައްވައި، ކަނޑުތަކަށް ކުރިމަތިވެފައިވާ ގޮންޖެހުންތައް ޙައްލު ކުރުމަށް އެ މުއާޙަދާގެ ރޯލު މިހާރަށްވުރެ ހަރުދަނާކޮށް އެ މުއާޙަދާއަށް ޢަމަލުކުރުމަށް ޤައުމުތަކަށް ޝާހިދު ވަނީ ގޮވާލައްވާފައެވެ.