ޔުއޭފާ ޔޫރޮޕާ ލީގު ގްރޫޕް ޖީ ގައި ބަޔަރ ޒީރޯ ފޯ ލެވަރކޫސެން އާއި ސެލްޓިކް ބައްދަލުކުރިމެޗް ލެވަކޫސެން ކާމިޔާބުކޮށްފިއެވެ. ލެވަރކޫސެންގެ ދަނޑުގައި ކުޅުނު މިމެޗް އެޓީމް ކާމިޔާބުކުރީ 3 ލަނޑު 2 ލަނޑުންނެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ލެވަރކޫސެންއިންނެވެ. މިމެޗްގެ ފުރަތަމަ ލަނޑު މެޗްގެ 16 ވަނަ މިނެޓްގައި ޖަހާ ލީޑު ނަގާފައިވަނީ ލެވަރކޫސެންއިންނެވެ. މިލަނޑު އެޓީމަށް ޖަހައިދިނީ ރޮބަރޓް އެންޑްރިޗެވެ. މިމެޗްގައި ސެލްޓިކްއިން އެޓީމުގެ ފުރަތަމަ ލަނޑު ޖަހައި މެޗްގެ ނަތީޖާ ހަމަހަމަ ކުރީ މެޗްގެ 40 ވަނަ މިނެޓްގައި ލިބުނު ޕެނަލްޓީއަކުން ޔޯސިޕް ޔުރަނޮވިޗް ކާމިޔާބުކޮށްދިން ލަނޑުންނެވެ. އަދި މެޗްގެ 56 ވަނަ މިނެޓްގައި ޖޮޓާ ޖަހައިދިން ލަނޑައެކު މިމެޗްގައި ފުރަތަމަ ފަހަރަށް ސެލްޓިކަށް ލީޑު ލިބިގެންދިޔައެވެ. އަދި މިނަތީޖާއާއެކު މިމެޗުން ސެލްޓިކް ފުރަތަމަ ފަހަރަށް ޖަރުމަނުވިލާތުގައި ކުޅެ މޮލުވާނެކަމަށް ގަބޫލް ކުރެވުނު ނަމަވެސް ލެވަރކޫސެންއިން މެޗްގެ ފަހު އަށް މިނެޓްގެ ތެރޭގައި ކާމިޔާބު ކުރި ދެ ލަނޑާއެކު ސެލްޓިކަށް މާޔޫސްކަން ގެނުވިއެވެ. މިގޮތުން މިމެޗްގެ 782 ވަނަ މިނެޓްގައި ފުރަތަމަ ލަނޑުވެސް ޖަހައިދިން އެންދްރިޗެވެ. އަދި މިމެޗުން ލެވަރކޫސެން މޮޅުވި ލަނޑު މެޗް ނިމެން ތިން މިނެޓަށް ވެފައިވަނިކޮށް ޖަހައިދިނީ މޫސާ ޑިއާބީއެވެ.
މިކާމިޔާބީއާއެކު ލެވަރކޫސެން އުޅެނީ ކުޅުނު ފަސް މެޗުން ލިބިފައިވާ 13 ޕޮއިންޓާއެކު ގްރޫޕްގެ އެއްވަނައިގައެވެ. ސެލްޓިކް އުޅެނީ ފަސް މެޗުން ލިބިފައިވާ 6 ޕޮއިންޓާއެކު ގްރޫޕްގެ ތިންވަނައިގައެވެ. އެހެން ކަމުން ދެވަނަ ބުރަން ދިއުމުގެ ފުރުސަތު މިވަނީ ސެލްޓިކަށް އެއްކޮށް ގެއްލިފައެވެ.