ބަންގުލަދޭޝުގެ ރަށްފުށުގެ ސަރަޙައްދުތަކުގައި ބޭއްވި ކައުންސިލް އިންތިޚާބަށްފަހު ހިނގި ބޮޑެތި ހަމަނުޖެހުންތަކުގައި ގިނަ ޢަދަދެއްގެ ބަޔަކު މަރުވެއްޖެއެވެ.
ބަންގުލަދޭޝުގެ ރަށްފުށުގެ ސަރަޙައްދުތަކުގައި ބޭއްވި ކައުންސިލް އިންތިޚާބުގައި އެ ޤައުމުގެ އިދިކޮޅު ޕާޓީތަކުން ބައިވެރިވެފައެއް ނުވެއެވެ. އެ ޕާޓީތަކުން ބުނެފައިވާ ގޮތުގައި ބަންގުލަދޭޝުގައި މިނިވަން އަދި އިންޞާފުވެރި އިންތިޚާބެއް ބޭއްވުމުގެ މާޙައުލެއް ނެތެވެ. އަދި އެންމެ ފަހުން ބޭއްވި ޢާއްމު އިންތިޚާބުތަކުގައި އުޞޫލުތަކާ ޚިލާފު ގިނަ ކަންތައްތަކެއް ހިންގާފައިވާކަމަށްވެސް ބަންގުލަދޭޝުގެ އިދިކޮޅު ޕާޓީތަކުންވަނީ ތުޙްމަތުކޮށްފައެވެ. ބަންގުލަދޭޝުގެ ރަށްފުށުގެ ސަރަޙައްދުތަކުގައި ކައުންސިލް އިންތިޚާބު ބޭއްވުމުގެ ކުރިން ބޮޑެތި ހަމަނުޖެހުންތަކެއްވެސްވަނީ ހިންގައިފައެވެ.
ބަންގުލަދޭޝުގެ ރަށްފުށުގެ ސަރަޙައްދުތަކުގައި ބޭއްވި ކައުންސިލް އިންތިޚާބުގައި ވެރިކަންކުރާ އަވާމީ ލީގަށް ލިބުނު ގޮނޑިތަކުގެ ޢަދަދެއް އަދި ނޭނގެއެވެ. އިންތިޚާބުގައި ހުރަސްއެޅުމަށް ހަތިޔާރުއެޅި މީހުން ނުކުމެ ވޯޓުލާން މަސައްކަތްކުރި މީހުންނާ ދެކޮޅަށް ނުރައްކާތެރި ޙަމަލާތަކެއްވަނީ ދީފައެވެ. އެ ޙަމަލާތަކުގައި 20އަށްވުރެ ގިނަ މީހުންވަނީ މަރުވެފައެވެ.
ބަންގުލަދޭޝުގެ ރަށްފުށުގެ ސަރަޙައްދުތަކުގައި ބޭއްވި އިންތިޚާބުގައި 835 ކައުންސިލަށް މެންބަރުން އިންތިޚާބުކުރުމަށް 15 މިލިޔަން މީހުންނަށް ވޯޓުލުމުގެ ޙައްޤު ލިބިފައިވެއެވެ. ނަމަވެސް އިންތިޚާބުގައި ވޯޓުލި މީހުން ޢަދަދެއް އެ ޤައުމުގެ އިންތިޚާބާބެހޭ އިދާރާއިން ބުނެފައެއް ނުވެއެވެ.
ބަންގުލަދޭޝުގެ އެކި ސަރަޙައްދުތަކުގައި ބޭއްވި އިންތިޚާބުތަކާ ގުޅިގެން ހިނގާފައިވާ ހަމަނުޖެހުންތަކުގައި މި އަހަރުގެ ތެރޭގައި 85 މީހުން މަރުވެ 6،000 މީހުންވަނީ ޒަޚަމުވެފައެވެ. އެ ޤައުމުގައި އެންމެ ފަހުން ބޭއްވި އިންތިޚާބަކީ 2023ވަނަ އަހަރު ބާއްވައި ޢާއްމު އިންތިޚާބުގެ ކުރިން އެ ޤައުމުގެ ބޮޑުވަޒީރު ޝޭޚު ހަސީނާއަށް އޮތް ތާޢީދު ދެނެގަތުމަށް ލިބުނު ފުރުޞަތެކެވެ. އެ ޤައުމުގައި އެންމެ ފަހުން ބޭއްވި ދެ އިންތިޚާބުވެސް ބޮޑު ތަފާތަކުން ކާމިޔާބުކުރައްވާފައިވަނީ ޝޭޚު ހަސީނާގެ އަވާމީ ލީގުންނެވެ. ނަމަވެސް އަވާމީ ލީގުން އެ އިންތިޚާބުތައް ކާމިޔާބުކުރީ ވޯޓު އޮލުވާލައިގެންކަމަށް ތުޙްމަތުކުރެއެވެ.
1991ވަނަ އަހަރުގެ ފަހުން އެކި ފަހަރުމަތިން ބަންގުލަދޭޝުގެ ބޮޑުވަޒިރުކަން ކުރައްވާފައިވަނީ ޚާލިދާ ޒިޔާއާއި ޝޭޚު ހަސީނާއެވެ. ނަމަވެސް ފާއިތުވި އިންތިޚާބުތަކުގައި ބައިވެރިވެވަޑައިގަތުމަށް ޚާލިދާ ޒިޔާ ދެކޮޅުހެއްދެވުމުން 2008ވަނަ އަހަރުން ފެށިގެން ބޮޑުވަޒީރުކަންކުރައްވަނީ ޝޭޚު ހަސީނާއެވެ.