ޔޫތް އެކްސްޗޭންޖް ޕްރޮގްރާމްތަކާއެކު، ކިޔެވުމުގެ އިތުރު ދަރިވަރުންނަށް ޢަމަލީ މައިދާނުގައި ކަންކަން ތަޖުރިބާކުރުމުގެ މުހިންމު ފުރުޞަތުތަކެއް ހުޅުވިގެންދާކަމަށް ޔޫތް މިނިސްޓްރީގެ ސްޓޭޓް މިނިސްޓަރ ޙުސައިން އިސްމާޢިލް ވިދާޅުވެއްޖެއެވެ.
ޔޫތް މިނިސްޓްރީގެ ސްޓޭޓް މިނިސްޓަރ ޙުސައިން އިސްމާޢިލް މިހެން ވިދާޅުވީ ރާއްޖެއާއި އިންޑިއާއާ ދެމެދު މިއަދު ފެށި ޔޫތް އެކްސްޗޭންޖް ޕްރޮގްރާމްއާ ގުޅޭގޮތުން ވާހަކަފުޅުދައްކަވަމުންނެވެ.
ރާއްޖޭގެ ޔޫތް މިނިސްޓްރީއާއި އިންޑިއާ ސަރުކާރު ގުޅިގެން ހިންގާ ޔޫތް އެކްސްޗޭންޖް ޕްރޮގްރާމުގައި 14ޒުވާނަކު ވަނީ އިންޑިއާއަށް ދަތުރުކޮށްފައެވެ. މި ޕްރޮގްރާމްރަކީ އެއް ޤައުމު އަނެއް ޤައުމުގެ ގުޅުންބަދަހިކޮށް، ތަޖުރިބާ ޙިއްސާކުރުމަށް ކުރާ ދަތުރުތަކެވެ. މި ޕްރޮގްރާމަކީ ރާއްޖެއާއި އިންޑިއާގެ ޔޫތް މިނިސްޓްރީއާ ދެމެދު ވެފައިވާ އެއްބަސްވުމެއްގެ ދަށުން ހިންގާ ޕްރޮގްރާމެކެވެ.
ޔޫތް އެކްސްޗޭންޖް ޕްރޮގްރާމްގެ މަޢުލޫމާތު ޙިއްސާކުރަމުން ޔޫތް މިނިސްޓްރީގެ ސްޓޭޓް މިނިސްޓަރ ޙުސައިން އިސްމާޢިލް ވިދާޅުވީ މި ޕްރޮގްރާމްގެ ސަބަބުން، ޒުވާނުންނަށް އިތުރު ފުރުޞަތުތައް ފަހިވެ، އާ ކަންކަން ތަޖުރިބާކުރުމުގެ ފުރުޞަތު ލިބިގެންދާކަމަށެވެ. އަދި އިންޑިއާއަށް މި ކުރާ ދަތުރުގައިވެސް ތަޢުލީމީ ދާއިރާއާއި، އިޖްތިމާއީ މަސައްކަތްތައް ކުރާ ގްރޫޕްތަކާއި ބައްދަލުކުރުމާ، އިންޑިއާ ސަޤާފީ ތަންތަނަށް ޒިޔާރަތްކުރުމާ، އަދި ޢަމަލީ ތަންރީން ހޯދުމުގެ ޕްރޮގްރާމްތަކުގައިވެސް ދިވެހި ޒުވާނުންގެ ޓީމުން ބައިވެރިވާނެކަމަށް ވިދާޅުވިއެވެ.
"ސަރުކާރުގެ ވިސްނުމަކީ ކިޔެވުމުގެ އިތުރުން، ޒުވާނުންނަށް އާ އިތުރު ކަންކަން ތަޖުރިބާކުރުމުގެ ފުރުޞަތު ދިނުން. އެހެން މީހުންނާ ބައްދަލުވެ މަޢުލޫމާތު ހޯދާ އާ ކަންކަން އެބަ ދަސްވޭ. އިންޑިއާގެ އިތުރުން އިތުރު 2 ގައުނަކާއެކު އެކްސްޗޭންޖް ޕްރޮގްރާމް ގެންދިއުމުގެ އެމްއޯޔޫގައިވަނީ ސޮއިކޮށްފަ." ސްޓޭޓް މިނިސްޓަރ ވިދާޅުވިއެވެ.
މި ދަތުރުގައި ރާއްޖޭގެ ސަޤާފަތާ ތާރީޚާ ގުޅޭ ބައެއް ހުށައެޅުންތައް ދައްކާލުމާއި ދިވެހި ޒުވާނުންގެ ތަރައްޤީއަށް ރާއްޖޭގައި ކުރިއަށްދާ މަސައްކަތްތަކާއި ގުޅޭ ޕްރެޒެންޓޭޝަނެއް ހުށައެޅުމަށް ވަނީ ހަމަޖެހިފައެވެ.
"އިންޑިއާގެ ޒުވާނުންނާ ބައްދަލުވެ އެ ޤައުމުގެ އެންޖީއޯތަކާ ބައްދަލުކުރުމާ، ޤައުމުގެ ހިސްޓްރީ އާރްޓް ފަދަ ދާއިރާތައް އެކްސްޕްލޯ ކުރެވޭނެ. މިދަނީ ތައްޔާރުވެގެން ރާއްޖޭގެ ސަޤާފަތާ އަދި ރާއްޖޭގައި ޒުވާނުންނަށް މި ހުރި ފުރުޞަތުތައް އެކޮޅުގެ ޒުވާނުންނާ ޙިއްސާކުރުމަށް. ވަރަށް ގިނަ ކަންކަން މި ދަތުރުން ތަޖުރިބާކުރެވޭނެކަމަށް އުއްމީދުކުރަން." ޕްރިގްރާމްގެ ބައިވެރިން ފާހަގަކުރިއެވެ.
ޔޫތް އެކްސްޗޭންޗް ޕްރޮގްރާމްގެ ދަށުން އިންޑިއާއަށް މި ކުރާ ދަތުރަކީ 8 ދުވަހުގެ ދަތުރެކެވެ. މި ޕްރޮގްރާމްގެ ދަށުން އިންޑިއާގެ ޒުވާނުންގެ ޓީމެއްވެސް ރާއްޖެއަށް ދަތުރުކުރުމަށް ވަނީ ހަމަޖެހިފައެވެ.
ގުޅުން ބަދަހިކުރުމަށް މީގެކުރިންވެސް ޒުވާނުންނަށް ޚާއްސަކޮށްގެން މިފަދަ ޔޫތް އެކްސްޗޭންޖް ޕްރޮގްރާމްތައް ކުރިއަށްގެންގޮސްފައިވެއެވެ.