އިންކްލޫސިވް އެޑިއުކޭޝަން ޔުނިޓްތައް: ދަރިވަރުންގެ އުނގެނުމާ ދިރިއުޅުމަށްވެސް ބޮޑު ކުރިއެރުމެއް

ޚާއްސަ އެހީއަށް ބޭނުންވާ ކުދިންނަކީ މުޖުތަމަޢުން ހަމަހަމަ ފުރުޞަތު ލިބިގެން ބޮޑުވާ ކުދިންނަށް ހެދުމަށް، ތަޢުލީމީ ނިޒާމުގެތެރެއިންވެސް އަންނަނީ މުހިންމު މަސައްކަތްތަކެއް ކުރަމުންނެވެ. ސްކޫލްތަކުގައި ޤާއިމުކުރަންފެށި އިންކްލޫސިވް ޔުނިޓްތަކާއެކު، މިފަދަ ދަރިވަރުންގެ އުނގެނުމާއި އަދި ދިރިއުޅުމުގެ ހުނަރުތައް ދަސްކުރުމަށްވެސް އިތުރު ކުރިއެރުންތައް އަންނަންވަނީ ފަށާފައެވެ.

އެއްވެސް ކުއްޖަކު ބާކީ ނުކުރުމުގެ ސިޔާސަތުގެދަށުން ސްކޫލްތަކުގައި ތަޢުލީމުދެމުން އައިނަމަވެސް، ސްކޫލްތަކަށް އޮތް ގޮންޖެހުމަކީ އެކަމަށް ބޭނުންވާ އެކަށީގެންވާ ވަސީލަތްތައް ސްކޫލްތަކުގައި ޤާއިމުވެފައިނެތުމެވެ. މިފަދަ ކުދިންގެ ގިނަ ފިލާވަޅުގަނޑިތައް ކުރިއަށްގެންދަނީ އެހެންކުދިންނާއެކު މެއިންސްޓްރީމް ކްލާސްތަކުގައެވެ. އޭގެއިތުރުން މިފަދަ ދަރިވަރުންނަށް ވަކި ކްލާސްތައްވެސް ނަގައިދެމުންދެއެވެ.

ކުޅުދުއްފުށީ ސިޓީ އަފީފުއްދީން ސްކޫލްގައި ޚާއްސައެހީއަށް ބޭނުންވާ ކުދިންނަށް ތަޢުލީމުދޭންފެށީ 2017ގައެވެ. ކުދިންގެ ޢަދަދު މަދުނަމަވެސް، ކުދިންނަށް ފިލާވަޅުތައް ނަގައިދިނުމުގައި އެންމެ ބޮޑަށް ކުރިމަތިވި ގޮންޖެހުމަކީ ސްކޫލްގެ ޖާގައިގެ ދަތިކަމާ، އަދި އެ ކުދިން އުނގެނުމަށް ބޭނުންވާ އެކަށީގެންވާ ވަސީލަތްތައް ނެތުންކަމަށް އަފީފުއްދީން ސްކޫލްގެ ޑެޕިއުޓީ ޕްރިންސިޕަލް ޝަޒްނާ އިބްރާޙިމް ވިދާޅުވިއެވެ. ވަކި ޚާއްސަ ކްލާސްރޫމެއް ނެތުމުގެ ސަބަބުން، ކިޔަވައިދެމުންއައީ އެ ވަގުތަކަށް ހުސްވާ ކްލާސްރޫމްތަކުގައެވެ.

"ބޭނުންކުރަމުންދާ ކްލާސްތަކުގައި ކިޔަވައިދޭންޖެހުނީ. (ވަން-އޮން-ވަން)ވަކި ވަކި ކުދިންގެ ފިލާވަޅުނަގަން ވަރަށް ދަތި. ހުސްކޮށް ހުންނަ ކްލާސްތަކާ ލައިބްރަރީގައި ކިޔަވަދޭންޖެހެނީ. ވަކި ކްލާހެއް ނެތުމުގެ ދަތިކަން ވަރަށް ބޮޑަށް ކުރިމަތިވި. ޚާއްސަކޮށް ޢަމަލީ ހަރަކާތްތައް ގެންދަން ދަތި." ޝަޒްނާ އިބްރާޙިމް ވިދާޅުވިއެވެ.

ދަތި އުނދަގޫތަކާއެކު ކިޔަވައިދެމުން ދަނިކޮށް، ޚާއްސައެހީއަށް ބޭނުންވާ ކުދިންނަށް ކިޔަވައިދިނުމަށް ވަކި ޔުނިޓެއް ސްކޫލްގައި ހަމަޖެހިގެންދިޔައީ މިއަހަރުގެ މަރޗްމަހުއެވެ. އިންޑިއާ ސަރުކާރުގެ 1.6މިލިއަން ރުފިޔާގެ އެހީގައި ތަރައްޤީކުރި އިންކްލޫސިވް އެޑިއުކޭޝަން ޔުނިޓަކީ މިފަދަ ކުދިންނަށް ކިޔަވައިދިނުމަށް ބޭނުންވާ ޖާގައާ ވަސީލަތްތަކާއެކު ޤާއިމުކުރި ޔުނިޓެކެވެ.

އާ ޔުނިޓާއެކު ދަރިވަރުންނަށް އުނގެނުމުގައި ދޭންޖެހޭ އެހީތެރިކަން ވަރަށް ބޮޑަށް އިތުރުކުރެވިގެންދިޔަކަން ޔުނިޓްގެ ޓީޗަރުން ފާހަގަކުރެއެވެ. ޔުނިޓްގައި މިހާރުވެސް 35ދަރިވަރުން ތަޢުލީމު ޙާސިލްކުރަމުން އާދެއެވެ. އަދި ކިޔަވައިދިނުމަށް 9 ޓީޗަރުން ހަރަކާތްތެރިވެއެވެ.

ޔުނިޓްގައި ކުދިންނަށް ހެލިފެލިވެ އުޅެވޭނެ ޖާގައިގެ ކްލާސްރޫމަކާ، ފާޚާނައާ ސްޓާފް ރޫމެއްވެސް ހިމެނެއެވެ. ކްލާސްރޫމްގައި ޓީވީއާ ކުދިންނަށް ބޭނުންވާ ފޮތްތަކާއި، އެކި ހަރަކާތްތައް ކުރިއަށްގެންދިއުމަށް ބޭނުންވާ ވަސީލަތްތައްވެސްވަނީ ޤާއިމުކޮށްފައެވެ.

އާ ޔުނިޓާއެކު ދަރިވަރުން އުނގެނުމަށް ބަހައްޓާ ޝަޢުގު އިތުރުވެ، ކަންކަން ދަސްކުރުމަށް ހޭދަވާ ވަގުތު ކުޑަވެފައިވާކަން އެ ކުދިންނަށް ކިޔަވައިދޭ ޓީޗަރުން ފާހަގަކުރެއެވެ.

"ކުރިން ސްކޫލަށް ގެންނަން އުނދަގޫކުދިން މިހާރު ގަވާއިދުން އެބަ ސްކޫލަށް އާދޭ. މިހާރު އެ ކުދިންނަށް މެއިންސްޓްރީމް ކްލާސްތަކުގައިވެސް އަމިއްލައަށް މަޑުމަޑުން ކްލާހުގައި ތިބެން ދަސްވޭ އެބަ. ޔުނިޓްގައި އިތުރު ހަރަކާތްތައް ހިންގޭނެ ފުރުޞަތު ލިބުމާއެކު ކުދިންގެ ޝަޢުޤު ވަރަށް ބޮޑަށް އިތުރު. އަދި އަމިއްލަ ކަންކަން އަމިއްލައަށް ކުރަންވެސް އެބަ ދަސްވޭ" ޔުނިޓްގައި މަސައްކަތްކުރާ މުދައްރިސުން ފާހަގަކުރިއެވެ.

އަފީފުއްދީން ސްކޫލްގައި މިހާރުވެސް އެލްކޭޖީން ފެށިގެން، ގްރޭޑް 7އާއި ހަމައަށް ޚާއްސަ އެހީއަށް ބޭނުންވާ ދަރިވަރުން އުނގެނެމުން އާދެއެވެ. މީގެތެރޭގައި އެކި ކަހަލަ ނުކުޅެދުންތެރިކަން ހުންނަ ކުދިން ހިމެނެއެވެ.

ޔުނިޓްތައް ތަރައްޤީކުރުމަށް އިންޑިއާ ސަރުކާރުން ދިން އެހީތެރިކަމުގެ ތެރޭގައި ޓީޗަރުންނަށް ބޭނުންވާ އިތުރު ތަމްރީންތައްވެސް ހިމެނެއެވެ. މި ތަމްރީންތަކާއެކު، އެކި ކަހަލަ ނުކުޅެދުންތެރިކަން ހުންނަ ކުދިންނަށް ކިޔަވައިދިނުމުގައި ގެންގުޅެންޖެހޭ އުކުޅުތައް ޓީޗަރުންނަށްވަނީ ދަސްވެފައެވެ.

ދަރިވަރުން އުނގެނުމުގައި ހޯދަމުން އަންނަ ކުރިއެރުމުގެ އިތުރުން، ދިރިއުޅުމުގެ ހުނަރުތައް ދަސްވެ މުޖުތަމަޢުތެރެއަށް ނުކުމެ ކުދިން އުޅުމުގައިވެސް މި ކްލާސްތަކުގެ ސަބަބުން ދަރިވަރުންނަށް ބޮޑު އެހީއެއް ލިބިގެން ގޮސްފައިވާކަން ބެލެނިވެރިން ފާހަގަކުރެއެވެ. ކުދިން ކަންކަން ދަސްކުރާ މިންވަރަށް ބޮޑު ކުރިއެރުމެއް ލިބިފައިވާކަމަށް ބެލެނިވެރިންދަނީ ބުނަމުންނެވެ.

"ކުރިން ހަމަ އެއްގޮތަކަށްވެސް އެއްތާކު ނީދެވޭނެ. ހަމަ ދުވާނީ. މިހާރު ފިލާވަޅު ހަދަންވެސް ބޭންދީމަ ހަމަ އިންނާނެ ބުނަންދެން. މިހާރު ސްކޫލަށްދާން ބުނީމަވެސް އިނގޭނެ، ސްކޫލަށް ދިއުމަށް ތައްޔާރުވާން ކުރަންޖެހެނީ ކޮންކަމެއްކަން. ކަމެއް ބޭނުންވީމަ ބުނަންވެސް މިހާރު އިނގޭ."ޕީއެސްއެމްއާ ވާހަކަދެއްކި ބެލެނިވެރިން ކިޔައިދިނެވެ.

އިންކްލޫސިވް ޔުނިޓްގެ ފިލާވަޅުތަކުގެ ތެރޭގައި، ދަރިވަރުންނަށް ހުނަރު ދަސްކޮށްދިނުމުގެ ޕްރޮގްރާމްތައްވެސް ހިމެނެއެވެ. ޔުނިޓާއެކު ސްކޫލުން ހިންގާ އިތުރު ހަރަކާތްތަކުގައިވެސް ދަރިވަރުންގެ ބައިވެރިވުންވަނީ އިތުރުވެފައެވެ.