އިސްލާމް ދީނަށް ފުރައްސާރަކުރާ މީހުންނާމެދު ޤާނޫނީ ފިޔަވަޅު އެޅުމަށް ދައުލަތުގެ މުއައްސަސާތަކަށް މިއަދުގެ ހުކުރު ޚުޠުބާގައި ގޮވާލައްވައިފިއެވެ.
ފަހަކަށްއައިސް ރާއްޖޭގައި އިސްލާމްދީނަށް ފުރައްސާރަކުރުމާއި ދީނީ ކަންކަމަށް ފުރައްސާރަވާގޮތަށް ބައެއް މީހުން ޢަމަލުކުރާކަން ޚުޠުބަގައިވަނީ ފާހަގަކޮށް އެކަންކަން ހުއްޓާލުމަށް ގޮވާލައްވާފައެވެ.
އެގޮތުން މީހުންގެ މުދަލަށާއި ފުރާނައަށް ގެއްލުންދިނުމާއި މުޖުތަމަޢުގައި ނަފުރަތު އުފެއްދުމުގެ އެކިޢަމަލުތައް ހިންގުމާއި އިސްލާމީ ޝިޢާރުތަކަށް ސިއްރާއި ފާޅުގައި ހަޖޫޖަހާ ދީނަށް ފުރައްސާރަކުރުން ޢާއްމުވަމުން އަންނަކަން ޚުޠުބާގައިވަނީ ފާހަގަކުރައްވާފައެވެ. ރާއްޖޭގެ ދީނީ އެއްބައިވަންތަކަމާއި އަމާންކަން ދެމެހެއްޓުމަށް ހަދާފައިވާ ޤާނޫނުތަކުގެ ދަށުން މިފަދަ ޢަމަލުތައް ހިންގާ ފަރާތްތަކާ މެދު ޤާނޫނީ ފިޔަވަޅު އެޅުމަށާއި އެކަންކުރުމުގައި ޒިންމާ އަދާކުރުމަށް ހުކުރު ޚުޠުބާގައިވަނީ ދައުލަތުގެ މުއައްސަސާތަކަށާއި ވެރިންނަށް ގޮވާލައްވާފައެވެ.
އިސްލާމްދީނާމެދު މީސްތަކުގެ މެދުގައި ޝައްކާއި ވަހުމު އުފެއްދުމަށް ދުނިޔޭގެ ނުފުޒުގަދަ ބައެއް ފަރާތްތަކުން ރާވައިގެން ހިންގާ ކަންކަމުގެ މައްޗަށް ޚުޠުބާގައި ވަނީ އަލިއަޅުއްވާލައްވާފައެވެ.