ކުރީގެ އިސްލާމިކް މިނިސްޓަރ އަޙްމަދު ޒިޔާދުގެ މައްޗަށް ދައުލަތުން އުފުލި ދައުވާ ސާބިތުނުވާކަމަށް ކްރިމިނަލްކޯޓުން ހުކުމްކޮށްފިއެވެ. ޒިޔާދުގެ މައްޗަށް ދައުލަތުން ކުރީ ރަސްމީ ހައްސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާއެވެ.
އަޙްމަދު ޒިޔާދުގެ މައްޗަށް ރަސްމީ ޙައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދަޢުވާ އުފުލާފައިވަނީ ޒިކުރާ މިސްކިތް ހުރި ބިމުގައި 10 ބުރީގެ ޢިމާރާތެއް އެޅުމަށް އެސް ޖޭ ކޮންސްޓްރަކްޝަނާއި ހަވާލުކުރުމުގައި ކޮރަޕްޝަނަށް މަގުފަހިވާ ކަންކަން ހިންގާފައިވާ މައްސަލައިގައެވެ. ޑރ ޒިޔާދުގެ އިތުރުން އިސްލާމިކް މިނިސްޓްރީގެ އެންޑޯމަންޓް ސެކްޝަންގެ ވެރިއަކަށް ކުރިން ހުންނެވި ހުރި އިބްރާހީމް ޢަބްދުﷲ ސަޢީދުގެ މައްޗަށް މި މައްސަލާގައިވަނީ ދަޢުވާކޮށްފައެވެ.
މި މައްސަލަ ނިންމާ ކްރިމިނަލް ކޯޓުން އިއްވި ހުކުމުގައިވަނީ ޒިކުރާ މިސްކިތް ހެދުމަށް އެސް ޖޭ ކޮންސްޓްރަކްޝަނާއި އެކު ހެދި އެއްބަސްވުމުގައި ޒިޔާދު ސޮއިކުރީ ފިނޭންސް މިނިސްޓްރީގެ ހުއްދަ ލިބިގެންކަން ހެކިންގެ ހެކިބަހުން ސާބިތުވާކަމަށެވެ. އެހެންކަމުން އެއްބަސްވުމުގައި ކުށެއް އޮއްވާ އެ އެއްބަސްވުމުގައި ސޮއިކުރުމަކީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުންކަމަށް ނުބެލެވޭނެކަމަށްވެސް ދަށު ކޯޓްގެ ހުކުމުގައިވެއެވެ. އަދި އެއްބަސްވުމުގެ ފަހު ބަސްބުނުމުގެ ހައްގު އިސްލާމިކް މިނިސްޓްރީއަށް ލިބިގެން ނުވާކަމަށްވެސް އެ ހުކުމުގައިވެއެވެ. އަދި އެއްވެސް މުވައްޒަފެއްގެ ލޮލުގައި އަޅައި ނުގަތް ކުށް ޒިޔާދުގެ ލޮލުގައި އަޅައި ގަންނާނެކަމަށް ހަމަ ބުއްދިއަށް ގަބޫލުނުކުރެވޭނެކަމަށްވެސް އެ ހުކުމުގައިވެެވެ.
ހުކްމުގައި ބުނެފައިވަނީ އިސްލާމިކް މިނިސްޓްރީގެ ޒިންމާއަކީ މަޝްރޫއު ހިންގުންކަމަށެވެ. ޒިޔާދުު އިތުރުން މި މައްސަލާގައި ހިމެނޭ އިބްރާހީމް ޢަބްދުﷲ ސަޢީދުގެ މައްޗަށްވެސް ކުށް ސާބިތުނުވާކަމަށް ކްރިމިނަލްކޯޓުން ވަނީ ހުކުމްކޮށްފައެވެ.
ޒިކުރާ މިސްކިތުގެ އެއްބަސްވުމުގައި ސޮއިކުރުމުގެ ސަބަބުން ދައުލަތުން އެސްޖޭއަށް ދައްކަންޖެހޭ 30 މިލިއަން ރުފިޔާ ދިނުމުން ދައުލަތަށް ގެއްލުންވިކަމަށް ބުނިނަމަވެސް އެކަން ދައުލަތަށް ސާބިތުކޮށްދެވިފައި ނުވާކަމަށްވެސް ކްރިމިނަލްކޯޓްގެ ހުކުމުގައިވއެވެ.
ޒިކުރާ މިސްކިތް މައްސަލާގައި އެސްޖޭއިންވެސް ވަނީ ދައުލަތާއި ދެކޮޅަށް ދައުވާކޮށްފައެވެ. އެ ކުންފުނީގެ ދައުވާގައި ބުނެފައިވަނީ ޒިކުރާ މިސްކިތް އެޅުމަށް އެކުލަވާލި އެއްބަސްވުން ބާތިލުކުރުމުން އެ ކުންފުންނަށް ބޮޑު ގެއްލުމެއް ލިބިފައިވާކަމަށެވެ. އެހެންކަމުން އެސްޖޭއިން ދައުލަތާއި ދެކޮޅަށް ދައުވާކުރަނީ ބަދަލު ހޯދުމަށެވެ.
ޒިޔާދު މިނިސްޓަރުކަމުގެ މަގާމުގައި ހުންނަވައިގެން ޒިކުރާ މިސްކިތުގައި "ދާރުލް ޒިކްރާ"ގެ ނަމުގައި 10 ބުރީގެ އިމާރާތެއް އަޅަން އެސްޖޭ ކޮންސްޓަރަކްޝަނާއި ހަވާލުކުރީ 2018 ވަނަ އަހަރުއެވެ. ކޮންޓްރެކްޓް ފައިނޭންސް އުސޫލުން މި މަސައްކަތް ހަވާލުކޮށްފައިވަނީ 130 މިލިއަން ރުފިޔާއަށެވެ. އަދި އިކުއިޓީގެ ގޮތުގައި 30 މިލިއަން ސަރުކާރުން ދިނުމަށްވެސް ވަނީ ނިންމާފައެވެ.