އައިޖީއެމްއެޗްގައި މަސައްކަތްކުރި ބިދޭސީ ނަރުހެއްގެ މަރުގެ މައްސަލައިގައި ޝައްކުކުރެވޭ ކަންތައްތަކެއް ހުރެގެން އެ މައްސަލަ ފުލުހުން ތަޙުގީގުކުރަން ފަށައިފިއެވެ.
މަޢުލޫމާތު ލިބޭ ގޮތުގައި މަރުވެފައިވަނީ ޕިލިޕީންސްއަށް ނިސްބަތްވާ މީހެކެވެ.
އެސްއެމް ނިއުސްއަށް މަޢުލޫމާތުދެއްވަމުން ފުލުހުން ވިދާޅުވީ އޮކްޓޯބަރު 19 ވަނަ ދުވަހު ހިނގި މި ހާދިސާގައި، އިތުރަށް ބަލަންޖެހޭ ކަންކަން ހުރިކަމަށް ފާހަގަކުރެވިފައިވާތީ، އެކަންކަން ބަލަމުންދާކަމަށެވެ.
މަޢުލޫމާތު ލިބިފައިވާ ގޮތުގައި ޕިލިޕީންސްއަށް ނިސްބަތްވާ އަންހެން މީހާ އަދި އޭނާގެ ފިރިމީހާވެސް މަސައްކަތްކުރަމުންދިޔައީ ނަރުހުންގެ ގޮތުގައި އައިޖީއެމްއެޗްގެ އެއް ޑިޕަރޓްމަންޓެއްގައެވެ. އެ ދެ މީހުން ދަރިއަކުވެސް ހުރެއެވެ.
މަޢުލޫމާތު ލިބޭގޮތުގައި، އޭނާ މަރުވެފައިވާކަމަށް ބުނެ އެމަޖެންސީގައި ހޮސްޕިޓަލަށް ގެނައީ އޭނާގެ ފިރިމީހާއެވެ. މަރުވީކަމަށް ބުނެ އޭނާ ހޮސްޕިޓަލަށް ގެނައީ، ޑިއުޓީގައި އުޅުމަށްފަހު ބްރޭކަށް ގެއަށް ދިޔަތާ ކުޑަ ވަގުތުކޮޅެއްފަހުން، އޭނާ މަރުވެއްޖެކަމަށްބުނެ އައިޖީއެމް ހޮސްޕިޓަލްގައި މަސައްކަތްކުރާ އޭނާގެ ފިރިމީހާ އެމްބިއުލާންސް ފޮނުވަން ގުޅުމުންނެވެ.
ހޮސްޕިޓަލަށް ގެނައި އިރުވެސް އޭނާ މަރެވެފައިވާކަމަށް މަޢުލޫމާތުލިބެއެވެ. މަންޒަރު ދުށް ބައެއް މިހުން ބުނިގޮތުގައި ނަރުސްމީހާ މަރުވެފައިވާކަމަށް ބުނެ ހޮސްޕިޓަލަށް ގެނައި ވަގުތު އޭނާގެ ފިރިމީހާގެ ކިބައިން އާދަޔާ ޚިލާފް ކަންތައްތަކެއް ފާހަގަވެފައިވެއެވެ. އެގޮތުން އޭނާ ނޭވާ ހާސްވެގެން ކުއްލިއަކަށް މަރުވީކަމަށާއި، އަދި ދަންޖެހިގެން އޭނާ މަރުވީކަމަށް އަނެއްބައި ފަހަރު އޭނާގެ ފިރިމީހާ ބުނަމުންދިޔަކަމަށް މަންޒަރުދުށް މީހުން ބުނެއެވެ.
އެމީހުން ބުނިގޮތުގައި އޭނާގެ ކަރުގައި ކޮންމެވެސް ކަހަލަ ނިޝާންތަކެއް ހުއްޓެވެ. ނަމަވެސް އެއީ ކަރުގައި ވާ/ފޮތި އައްސައިގެން ދަންޖެހިފައިވާ ނިޝާންތަކަކަށްވުރެ ބޮޑަށް ޝައްކު ކުރެވެނީ، މީހާ ހާސްކޮށްލަން މަސައްކަތްކޮށްފައިވާ އިނގިލީގެ ނިޝާންތަކެއްގެ ގޮތުގައިކަމަށް މަންޒަރު ފެނުނު މީހުން ބުނެފައިވެއެވެ.