ރަސްފަރި ފަރަށް އެރި އާގުބޯޓުން ފަރަށް ލިބުނު ގެއްލުމާއި ޖޫރިމަނާގެ ގޮތުގައި 893 މިލިއަން ރުފިޔާ އަރާކަމަށާއި، ނަމަވެސް ޤާނޫނު އޮތްގޮތުން ޖޫރިމަނާކުރެވެން އޮތީ 100 މިލިއަން ރުފިޔާއާ ހަމައަށްކަމަށް އެންވަޔަރަމަންޓަލް ޕްރޮޓެކްޝަން އެޖެންސީ އިޕީއޭއިން ބުނެފިއެވެ.
"އެމް.ވީ ނެވިއޯސް އެމަރައިލިސް" ނަމަކަށްކިޔާ މި ބޯޓު މާލެ އަތޮޅު ރަސްފަރި ފަރަށް އަރާފައިވަނީ 19 އޮގަސްޓްގައެވެ. އަދި އެބޯޓު ފުންކޮށްފައިވަނީ 29 އޮގަސްޓުގައެވެ.
މި ބޯޓު ފަރަށް އެރުމާއި ގުޅިގެން ލިބުނު ގެއްލުންތައް ބެލުމަށްފަހު އީޕީއޭއިން ވިދާޅުވީ މިހާދިސާގައި ފަރުގެ 8867 އަކަމީޓަރުގެ ސަރަޙައްދަކަށް ބޮޑެތި ގެއްލުންތައް ލިބިފައިވާކަމަށެވެ. އަދި ތިމާވެއްޓަށް ލިބުނު ގެއްލުންތައް ބަލައި ވަޒަންކޮށް ކަނޑައެޅި ޖޫރިމަނާއާ ބަދަލުގެ ގޮތުގައި 893 މިލިއަން ރުފިޔާއަށް ޙާދިސާގައި ލިބުނު ގެއްލުމުގެ އަގު އަރާކަމަށްވެސް އީޕީއޭއިން ވިދާޅުވެއެވެ. ނަމަވެސް ތިމާވެށި ރައްކާތެރިކުރުމުގެ ޤާނޫނު ބުނާގޮތުން، ބަދަލުހޯދުމަށް ކަނޑައެޅޭނެ އެންމެ ބޮޑު އަގަކީ 100މިލިއަން ރުފިޔާކަމަށާއި، އެހެންކަމުން 100 މިލިއަން ރުފިޔާގެ ޖޫރިމަނާ ދެއްކުމަށް 30 ދުވަހުގެ މުއްދަތެއް އެކުންފުންޏަށް ދީފައިވާކަމަށް އީޕީއޭއިން ބުނެއެވެ.
އީޕީއޭއިން ވިދާޅުވީ ގެއްލުމުގެ ބަދަލު މައްސަލައިގައި ތިމާވެއްޓަށް ލިބުނު ގެއްލުމުގެ ބަދަލު ހޯދުމުގެ މަސައްކަތް، ޝަރިއަތް މެދުވެރިކޮށް އެޓަރނީ ޖެނެރަލްގެ އޮފީހާއެކު ފަށާފައިވާކަމަށެވެ. އަދި ބޯޓު އަދިވެސް ރާއްޖޭގައި އޮތްއިރު، ބޯޓަށް ފުރޭނީ ޖޫރިމަނާ ފައިދާ ދެއްކުމުންކަމަށް އީޕީއޭއިން ބުނެއެވެ.
މި ބޯޓު ފަރަށް އަރާފައިވަނީ އިންޑިއާއިން ފުރައިގެން ސައުތު އެފްރިކާއަށް ދަތުރުކުރަމުން ދަނިކޮށް، ބޯޓުގެ އިންޖީނެއްގެ ހޫނުމިން މާބޮޑަށް މަތިވެގެން، އިންޖީނު ނިއްވާލުމުގެ ސަބަބުން ބޯޓު ބީހިގެނެވެ.
ކަމާއިބެހޭ ފަރާތްތަކުން ބުނާގޮތުން މި ޙާދިސާ ހިނގުމުގައި ބޯޓުގެ ކެޕްޓަންގެ ބޮޑު އިޙުމާލެއް އޮތްކަމަށާއި، އެގޮތުން ހާދިސާ ހިނގުމުން ކަމާއިބެހޭ ފަރާތްތަކަށް އަންގާފައިނުވާކަމަށެވެ.
މި ބޯޓު ފަރަށް އެފި ކ.ރަސްފަރި ފަރަކީ ތިމާވެށި ޙިމާޔަތްކުރުމުގެ ޤާނޫނުގެދަށުން، 27 ސެޕްޓެމްބަރު 1995އިން ފެށިގެން ޚިމާޔަތްކޮށްފަވާ ސަރަޙައްދެކެވެ.