އިންގްލިޝް ޕްރިމިއަރ ލީގުގެ ވޮޓްފަޑްގެ ކޯޗް ކަމަށް އިޓަލީވިލާތުގެ ކްލައުޑިއޯ ރަނިއޭރީ ހަމަޖައްސައިފިއެވެ. މަޢުލޫމާތު ލިބިފައިވާގޮތުގައި ރަނިއޭރީ ވޮޓްފަޑާ ހަވާލުވެފައިވަނީ 2 އަހަރު ދުވަހުގެ އެއްބަސްވުމެއްގެ ދަށުންނެވެ.
ވޮޓްފަޑުން ވަނީ އެޓީމްގެ ކޯޗް ޒިސްކޯ މުނޯޒް އިއްޔެގެ ވަގުތެއްގައި މަގާމުން ވަކިކޮށްފައެވެ. ރަނިއޭނީ ވާނީ އެކްލަބާއި ޕޮއްޒޯ އާއިލާއިން ހަވާލުވިފަހުން ހަވަލުވާ 14 ވަނަ ކޯޗަށެވެ. ވޮޓްފަޑް މިވަގުތު އޮތީ ހަތް މެދުން ލިބިފައިވާ ހަތް ޕޮއިންޓާއެކު ތާވަލްގެ 15 ވަނައިގައެވެ. ރަނިއޭރީ އެންމެފަހުން ކޯޗް ކޮށްދީފައިވަނީ އިޓާލިއަން ސެރީއާގެ ސެމްޕްޑޯރިއާއަށެވެ. އަދި މިދިޔަ ސީޒަނާއެކު ރަނިއޭރީ ސެމްޑޯރިއާ އާއި ދުރަށް ގޮސްފައެވެ.
ރަނިއޭރީ އެންމެ ބޮޑަށް ފާހަގަ ވެފައިވަނީ 2015-2016 ވަނަ ސީޒަންގައި ލެސްޓަރ ސިޓީއަށް އިންގްލިޝް ޕްރިމިއަރ ލީގު ކާމިޔާބު ކޮށްދިން ދިނުމެވެ. ރަނިއޭރީގެ ކޯޗް ކަމުގެ ދަށުން ވޮޓްފަޑް ކުޅޭ ފުރަތަމަ މެޗްގައި އޮކްޓޯބަރުމަހުގެ 16 ވަނަ ދުވަހު ނިކުންނާނީ އަމިއްލަ ދަނޑުގައި ލިވަޕޫލާއި ދެކޮޅަށެވެ. ވޮޓްފޯޑަކީ ރަނިއޭރީގެ 35 އަހަރުވީ ކޯޗިންގ ކެރިއަރުގައި ހަވާލުވާ 21 ވަނަ ކްލަބެވެ. ލެސްޓަރގެ އިތުރުން ރަނިއޭރީވަނީ 1996 ވަނަ އަހަރު ފިއޮރެންޓީނާއާއެކު ކޮޕާ އިޓާލިއާ އަދި 1999 ވަނަ އަހަރު ވެލެންސިއާ އާއި އެކު ކޮޕާ ޑެލް ރޭ ކާމިޔާބުކޮށްފައެވެ. ރަނިއޭރީ މީގެކުރިންވަނީ ލެސްޓަރ ގެ އިތުރުން އިންގްލިޝް ޕްރިމިއަރ ލީގުގެ ޗެލްސީ އާއި ފުލަމްއަށްވެސް ކޯޗް ކޮށްދީފައެވެ.