ގޭންގުތަކުން ހިންގާ ނުރައްކާތެރި ކުށްތައް މަދުކުރެވި، ގޭންގު މާރާމާރީތަކުގައި މަރުވާ މީހުންގެ ޢަދަދުވެސް ވަރަށްބޮޑަށް ދަށްކުރެވިފައިވާކަމަށް ކަމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.
ބައިނަލްއަގުވާމީ އަހިންސާ ދުވަސް ނުވަތަ ނޮން ވަޔަލަންސް ޑޭއާ ގުޅިގެން ކޮމިޝަނަރ އޮފް ޕޮލިސް ކުރެއްވި ޓްވީޓުގައި ވިދާޅުވީ، ގޭންގު މާރާމާރީތަކާއި ގޭންގުތަކުން ހިންގާ ނުރައްކަތެރި ކަންކަން ހުއްޓުވުމަށް ކުރެވޭ މަސައްކަތުގައި ފާއިތުވެދިޔަ ދެއަހަރުގެ ތެރޭގައި ބޮޑެތި ކާމިޔާބީތަކެއް ހޯދިފައިވާކަމަށެވެ. ސީޕީ ވިދާޅުވީ، ގޭންގުތަކުން ހިންގާ ތަފާތުއެކި ބާވަތްތަކުގެ ކުށްތައް ހުއްޓުވުމަށް އަދިވެސް ގިނަ މަސައްކަތްތަކެއް ކުރަންޖެހޭކަމަށެވެ. ޚާއްސަކޮށް ގޭންގުތަކުން ރާވައިގެން ހިންގާ ބޮޑެތި ކުށްތަކާއި، ގޭންގު މާރާމާރީތައް ހުއްޓުވުމަށްވެސް ގިނަ މަސައްކަތްތަކެއް ކުރަން ހުރިކަން ފާހަގަކުރައްވައި ސީޕީ ޙަމީދު ވިދާޅުވީ، މިހާރުވެސް ފުލުހުންގެ މުއައްސަސާއިން އެމަސައްކަތް ކުރަމުންދާކަމަށެވެ. އަދި އެކަމަށް ދާއިމީ ހައްލެއް ގެނެވޭނެކަމަށްވެސް ސީޕީ ވަނީ ވިދާޅުވެފައެވެ.
ސީޕީ ޙަމީދު ވިދާޅުވި، ގޭންގު ކުށްތައް މަދުކުރެވިފައިވާއިރު، އެފަދަ މާރާމާރީތަކުގައި މަރުވާ މީހުންގެ ޢަދަދުވެސް ފާއިތުވި ދެ އަހަރު ދުވަހުގެ ތެރޭގައި މަދުވެފައިވާކަމަށެވެ. ނަމަވެސް މިކަން އެއްކޮށް ހުއްޓުވަން ކުރަންޖެހޭ ކަންކަން ވަރަށް ގިނަ ކަމަށް ސީޕީވަނީ ވިދާޅުވެފައެވެ.
މާލެ އާއި ރާއްޖޭގެ އެކި ކަންކޮޅުތަކުގައި ހިންގާ ގްރޫޕް މާރާމާރީތަކާއި، ނުރައްކާތެރި ކުށްތައް ހުއްޓުވުމަށް މީގެ ކުރިން ކޮށްފައިވާ މަސައްކަތްތަކަށް މާކަބޮޑު ކާމީޔާބިއެއް ލިބިފައެއް ނުވެއެވެ.
ފުލުހުންނަށް މިހާތަނަށް އެކިފަހަރުމަތިން ޢާމްުކޮށްފައިވާ ތަފާސްހިސާބުތައް ދައްކާގޮތުން 2008ވަނަ އަހަރުން 2019ވަނަ އަހަރާއި ދެމެދު މާރާމާރީ އެންމެ ގިނަވެފައިވަނީ 2009ވަނަ އަހަރުއެވެ. އަދި މާރާމާރީ އެންމެ މަދުވެފައި ވަނީ 2019ވަނަ އަހަރުއެވެ. އަދި މާރާމާރީގެ ކުށްތައް އަހަރުން އަހަރަށް އަންނަނީ މަދުވަމުންކަމަށް ފުލުހުންގެ ތަފާސްހިސާބުތަކުން ދައްކައެވެ.