ރާއްޖެއަށް މިހާރު ކުރަމުންދާ ވިއްސާރައިގައި އައްޑޫ ސިޓީ ހިތަދޫގެ މަގުތަކުގައި ފެންބޮޑުވެ، އެމްއެންޑީއެފްއިން ފެން ހިންދުމުގެ މަސައްކަތް ފަށައިފިއެވެ.
ބޯކޮށް ވާރެވެހި ހިތަދޫގެ ގިނަ މަގުތަކެއްގައި ވަނީ ފެން ބޮޑުވެފައެވެ.
އައްޑޫ ސިޓީގައި ފެންބޮޑުވުމާއި ގުޅިގެން އެމްއެންޑީއެފްގެ ސަދަރން އޭރިއާގެ ސިފައިން ވަނީ ޕަމްޕް ބޭނުންކޮށްގެން ފެން ހިންދުމުގެ މަސައްކަތް ފަށާފައެވެ.
އައްޑޫ ސިޓީއަށް ކުރަމުންދާ ވިއްސާރައިގައި ބައެއް ގެތަކަށްވެސް ވަނީ ފެނުގެ އަސަރުކޮށްފައެވެ. އަދި އެގޮތުން ލިބުނު ގެއްލުންތައް ދެނެގަނެ، މަގުތަކުން ފެން ހިންދުމުގެ މަސައްކަތް ކައުންސިލާއި، އެމްއެންޑީއެފް ގުޅިގެން ދަނީ ކުރަމުންނެވެ.
Addu City ah boakoh vaarey vehi S.Hithadhoo ge baeh maguthakugai fen boduvumaai gulhigen pump beynunkohgen, fen hiykumuge masahkaiy MNDF Southern Area ge sifain fashaifi pic.twitter.com/LmKshznU5g
— Maldives National Defence Force (@MNDF_Official) September 24, 2021
އައްޑޫ ސިޓީގެ އިތުރުން ބައެއް އެހެން ރަށްރަށަށްވެސް އުދައިގެ އަސަރު ވަނީ ކޮށްފައެވެ. އަދި ބައެއް ރަށްރަށަށް ރާޅުއަރާ އެކިވަރުގެ ގެއްލުންތައްވެސް ލިބިފައިވެއެވެ.
އުދައެރުމާއި ވިއްސާރައިގައި ބައެއް ގެތަކަށް ފެން ވަނުމާއި ގުޅިގެން، އެމްއެންޑީއެފާއި ކައުންސިލްތައް ގުޅިގެން ދަނީ އެހީތެރިކަން ފޯރުކޮށްދެމުންނެވެ.
ރާއްޖެއަށް މިހާރު ކުރަމުންދާ ވިއްސާރައިގެ އަސަރު ރާއްޖޭގެ ހުރިހާ ސަރަޙައްދުތަކަށްވެސް ކުރާނެކަމަށް މޫސުމާބެހޭ ޤައުމީ އިދާރާއިން ވިދާޅުވެއެވެ. އަދި ބައެއް ރަށްތަކަށް ގުގުރުމާއެކު ބޯކޮށް ވާރޭވެހޭނެކަމަށްވަނީ ލަފާކޮށްފައެވެ.
މޫސުމާއި ބެހޭ އިދާރާއިން ވިދާޅުވީ އާއްމުކޮށް ވައިޖެހޭނީ 13މޭލާއި 23މޭލާއި ދެމެދުގައި ނަމަވެސް، ވިލާގަނޑުގައި 45މޭލަށް ވައިގަދަވާނެކަމަށް މެޓް އޮފީހުން ލަފާކުރެއެވެ.
ރާއްޖޭގެ ހުރިހާ ސަރަޙައްދުތަކެއްގައި ކަނޑުތައްވެސް އާއްމުގޮތެއްގައި ގަދަވާނެކަމަށާއި ރާޅުގެ އުސްމިން އުޅޭނީ 4ފޫޓާއި 6 ފޫޓާއި ދެމެދުގައިކަމަށްވެސް މެޓް އޮފީހުން މައުލޫމާތުދެއްވައެވެ.
މޫސުން ގޯސްވުމާ ގުޅިގެން ރާއްޖޭގެ އެކި ސަރަޙައްދުތަކަށް، މޫސުމާ ބެހޭ ޤައުމީ އިދާރާއިން ދަނީ އެލަރޓްތައްވެސް ނެރެމުންނެވެ. އެގޮތުން މެދުރާއްޖެއާއި ދެކުނުގެ އަތޮޅުތަކަށް ވަނީ އެލަރޓްތައް ނެރެފައެވެ.