ފިޔަވަތީގައި ކުދިން ނުތަނަވަސްވެފައި ތިބޭ ގަޑިއެއްގައި ވާހަކަދެއްކުމަކީވެސް ރަނގަޅުކަމެއް ނޫން
ފިޔަވަތީގައި ތިބޭ ކުދިންނަށް ކުރިމަތިވާ ނުތަނަވަސްކަމާއި ހިތްހަމަނުޖެހިގެން ކުރާ ކަންކަން ވަގުތުން ހުއްޓުވުމަށްޓަކައި ފިޔަވަތީގައި ތިބޭ މުވައްޒަފުން ގަދަކަމުން މަސައްކަތް ނުކުރާނެކަމަށް ޖެންޑަރ މިނިސްޓްރީން ވިދާޅުވެއްޖެއެވެ.
ޖެންޑަރ މިނިސްޓްރީން ވިދާޅުވީ އެކުދިންނާ މުޢާމަލާތު ކުރަންޖެހޭ ވަކި ގޮތްތަކެއް އޮންނަކަމަށާއި އެފަދަ ނުތަނަވަސް ޙާލަތެއްގައި ބުނެވޭ ބަހަކީވެސް ކުދިންނަށް އެއިން ނޭދެވޭ އަސަރު ކުރުވަފާނެ ނާޒުކު ޙާލަތެއްކަމަށެވެ.
ޕީއެސްއެމްނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ޖެންޑަރ މިނިސްޓްރީގެ ޑެޕިއުޓީ ޑިރެކްޓަރ ޖެނެރަލް އާމިނަތު ރިޝްމީ އާމިރު ވިދާޅުވީ ދައުލަތުގެ ބެލުމުގެ ދަށުގައި ތިބޭ ކުދިންނަކީ ހިތްދަތި އެތައް ތަޖުރިބާ ކުރުމަށްފަހު ދައުލަތަށް ނަގާ ކުދިންކަމަށް ވުމުން ޢާއްމު ކުދިން ކަންކަމާ މުޢާމަލާތުކުރާގޮތާ ތަފާތުވާނެކަމަށާ، އެކުދިންގެ ކަންކަމާ ކުރިމަތިލާންޖެހޭ ގޮތްވެސް ތަފާތު ވާނެކަމަށެވެ.
އަދި ފިޔަވަތީގައި ތިބޭ ކުދިންގެ ފަރާތުން ފެންނަ ނުތަނަވަސްކަމާއި އެފަދަ ޙާލަތްތަކުގައި ގަދަކަމުން ފިޔަވަޅު އެޅުމަކީ ކުދިންނަށް އޭގެއިން ނޭދެވޭއެތައް އަސަރެއް ކުރާނެކަމެއްކަމަށް ރިޝްމީ ވިދާޅުވިއެވެ. މީގެ އިތުރުން ފުރާޅަށް އެރުމާއި އަޑުގަދަ ކުރުމާއި ރުޅި އިސްކުރުމަކީ އެކުދިންގެ ފަރާތުން ފެންނަ ކަންކަމުގައި ވީނަމަވެސް އެކަންކަމަށް ޑީލްކުރަނީ ކުދިން ހަމަޖެހެން ވަގުތު ދިނުމަށްފަހުގައިކަމަށް ޖެންޑަރ މިނިސްޓްރީން ވިދާޅުވެއެވެ.
"އެދުވަހުވެސް ކުދިން ހަމަޖެހެން ވަގުތު ދޭންޖެހޭ. އެސްޕޭސް ކުދިންނަށް ދޭންޖެހޭނެ. އެފަދަ ޙާލަތެއްގައި ފިޔަވަތީ މުވައްޒަފަކު އިންޓަވީންކުރާނީ ހަމައެކަނި ކުއްޖަކު އަމިއްލަ ނަފްސަށް ގެއްލުމެއް ދޭން އުޅޭކަމަށް ޤަބޫލުކުރެވޭނަމަ. ހަމަޖެހެން ވަގުތު ދިނުމަށްފަހު ދެން ވާހަކަދައްކާއިރު ކުދިންނަށްވެސް އެބަ އިޙްސާސްކުރެވޭ ތިމަންނައަށް ވާގޮތް ބަލަން ކައިރީގަ އެބަހުއްޓޭ މީހަކު. އަޑުއަހާނެ،އަޅާލާނެ މީހަކު ފެންހިސާބުގަ އެބަހުއްޓޭ." ރިޝްމީ ވިދާޅުވިއެވެ.
ހުކުރު ދުވަހުގެ ޙާދިސާ ހިންގި ދުވަހާ ގުޅިގެން ސުވާލުކުރުމުން ޖެންޑަރ މިނިސްޓްރީގެ ޑިރެކްޓަރ ނިޝާ ޢަލީ ވިދާޅުވީ އެދުވަހަކީވެސް އެކުދިން އާދައިގެމަތިން ބޭރުގެ ބައެއް ޙާރަކާތްތައް ކުރިއަށްގެންދިޔަ ދުވަހެއްކަމަށެވެ. އެގޮތުން އެޙާދިސާއެއް ހިނގީ މޫދަށް ގޮސްފައި އައިސް އުޅުމުގެ ތެރޭގައިކަމަށެވެ. އަދި ކުދިން ފުރާޅުމަތީގައި ތިބި ވަގުތުވެސް އެތަނުގައި ފިޔަވަތީގެ ސައިކޮލޮޖިސްޓާއި އެހެނިހެން ކެއަރވޯކަރުން ޙަރަކާތްތެރިވަމުން ދިޔަކަމަށާއި ކުދިންނަށް ބޭނުންވާ އިތުރު ސަޕޯޓު ދިނުމަށް ވަގުތުން ޖެންޑަރ މިނިސްޓްރީގެ ޓީމުތައް ފިޔަވައްޗަށް ދިޔަކަމަށެވެ.
ފިޔަވަތީގައި ތިބި ކުދިންނަކީ އެކިކަހަލަ މާހައުލުތަކުން އަންނަ ކުދިންނަށްވުމާއެކު އެކުދިންގެ އުޅުމާއި ގުޅުންތައް ތަފާތުވާނެކަން ފާހަގަކުރައްވާ ނިޝާ ވިދާޅުވީ އެރޭ އެތަނުން ބޭރުގައި ތިބި ޢާއްމުންގެ ފަރާތުންވެސް ފެނިގެންދިޔައީ އެންމެ ރަނގަޅު މަންޒަރު ނޫންކަމަށެވެ.
"އަޅުގަނޑުމެނަށް ފާހަގަވި ބޭރުގަ ތިބި ޢާއްމުވެސް ކުދިންނާ މުޚާތަބުކޮށް ވާހަކަދެއްކުމާއި ކުޑަކުދިންނަށް އިވެންނުޖެހޭފަދަ ބަސްތައް ބޭނުންކޮށްގެ ވާހަކަދެއްކި އަޑުއިވުނު. ފިޔަވަތީގަ ތިބެނީ ހުސް އެއް ޢުމުރެގއް ކުދިން ނޫންވީމަ އެވަގުތު އެންމެ ބޮޑަށް ބަލަންޖެހުނީ މިއަޑުތައް އެތަނުގައި ތިބި ޢުމުރުން ކުޑަ ކުދިންނަށް ނީވެނެ ގޮތެއް ހެދުން." ނިޝާ ޢަލީ ވިދާޅުވިއެވެ.
ޖެންޑަރ މިނިސްޓްރީން ވިދާޅުވީ ދައުލަތުގެ ބެލުމުގެ ދަށުގައިތިބޭ ކުދިންނާމެދު ވަކިގޮތަކަށް ދެކުމުގެ ބަދަލުގައި މުޖުތަމަޢުން މިކުދިންނާމެދު އެހެން ކުޑަކުދިންނާމެދު ދެކޭގޮތަށް ދެކެންޖެހޭކަމަށެވެ. އެގޮތުން ޢާއްމުކޮށްވެސް ކުޑަކުދިން ރުޅިއައިސް ހިތްހަމަނުޖެހުމުން ބޮޑާހާކާ އަޑުގަދަކޮށް މީހުންނާ އެކެހެރިވާންވެސް މަސައްކަތްކުރާކަމާއި ފުރާވަރަށް އަރަމުން އަންނަކުދިން އެހެން މީހުންގެ ސަމާލުކަން ބޭނުންވާވަރުވެސް އިތުރުވާނެކަމަށް ޖެންޑަރ މިނިސްޓްރީން ވިދާޅުވެއެވެ. އެހެންނަމަވެސް ފިޔަވަތީގައި ތިބި ކުދިންނަކީ އެކިވަރުގެ ހިތާމަތައް ތަޙައްމަލު ކުރަމުންދާ ކުދިންކަމަށްވުމާއެކު އެކުދިން ދައުލަތަށް ނަގާއިރު އޮމޯޝަންސް މެނޭޖްކުރަން ނުވަތަ އިޙްސާސްތައް ދެނެގަންނަން ނޭނގޭއިރު ކުދިން އެފަދަ އިމޯޝަންސްތައް ދައްކާގޮތް ތަފާތުވާނެކަމަށް އެމިނިސްޓްރީން ވިދާޅުވެއެވެ.
ޖެންޑަރ މިނިސްޓްރީން ވިދާޅުވީ ފިޔަވަތީގައި ތިބި ކުދިންގެ ކިބައިން ޑިމާންޑުތަކެއް ކުރާ ވާހަކަތަކަކީ އެންމެ އެދެވޭ ވާހަކަތަކެއް ނޫންކަމަށެވެ. އެހެންނަމަވެސް އަމިއްލަ ޢާއިލާ ކައިރިއަށް ކުދިން ދާން ބޭނުންވާކަމަށާއި ރަށަށްދާން ބޭނުންވާކަމަށް ކުދިން ބުނާކަން އެމިނިސްޓްރީން ފާހަގަކުރައްވައެވެ.