ސަރުކާރުން އެއް ދާއިރާއަކަށް އެންމެ ބޮޑު ޚަރަދެއްކުރާ ދާއިރާއަކީ މީހުން ބިނާކުރުމުގެ ދާއިރާކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ. ސަރުކާރު ކުންފުނިތަކުން މީހުން ބިނާކުރުމަށް އިސްކަންދޭ މިންވަރު މިހާރު އިތުރުވެފައިވާކަން ފާހަގަކުރައްވައި ނައިބު ވިދާޅުވީ އެއީ ޤައުމު ބިނާކޮށް ކުރިއެރުވުމުގައި ނަމޫނާއެއް ކަމަށެވެ.
މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ 35ވަނަ އަހަރީ ދުވަހުގެ ރަސްމިއްޔާތު ޝަރަފުވެރި ކޮށްދެއްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވީ ޤައުމުގެ ކުރިއެރުމަށް ވޭތުދެދިޔަ ކައިރީ މާޒީގައި ސަރުކާރުގެ ކުންފުނިތަކުން ގިނަ މަސައްކަތްތަކެއް ކޮށްފައިވާކަމަށެވެ. ކޯވިޑްގެ ނުރައްކާތެރި ޙާލަތުގައި ޤައުމުތަކުގެ ހިނގުން ހުއްޓުނު ހިނދުވެސް ރާއްޖޭގެ ހިންގުމުގެ ދުވެލި މަޑުމަޑުން ކުރިއަށްގެންދިޔުމުގައި ރައީސް އިބްރާހީމް މުޙައްމަދު ޞާލިޙުގެ ވިސްނުންފުޅާ އެއްގޮތަށް އެންމެ މުހިއްމު މަސައްކަތެއް ކުރި އެއްބަޔަކީ ސަރުކާރު ކުންފުނިތަކުގެ މުވައްޒަފުންކަން ނާއިބު ރައީސް ވަނީ ފާހަގަކުރައްވާފައެވެ.
މީހުން ބިނާކުރުމަށް ސަރުކާރުން ޚާއްސަ އިސްކަމެއް ދެއްވާކަން ފާހަގަކުރައްވަމުން ނައިބު ރައީސް ވިދާޅުވީ ސަރުކާރުން އެއް ދާއިރާއަކަށް އެންމެ ބޮޑު ޚަރަދެއްކުރާ ދާއިރާއަކީ މީހުން ބިނާކުރުމުގެ ދާއިރާ ކަމަށެވެ.
އެމްޕީއެލްއިން އަލަށް ތަޢާރަފްކުރި ކޯޕަރޭޓް ސްކޮލާރޝިޕްގެ ފުރުސަތު ފާހަގަކުރައްވައި ނައިބު ރައީސްވަނީ އެކަމާ އުފާކުރައްވާކަމަށް ވިދާޅުވެފައެވެ.
"މިރޭ ފެނިގެން މިދިޔައީ ވަރަށް އުފާވާފަދަ މަންޒަރުތަކެއް. އެމްޕީއެލްއިން ތަޢާރަފުކުރި ސްކޮލާރޝިޕްތަކުން އެނގިގެންދިޔައީ މީހުން ތަމްރީނުކޮށް ބިނާކުރުމަށް ދެމުންދާ އަހަންމިއްޔަތު. އެނގިވަޑައިގަންނަވާނެ ސަރުކާރުން އެއްދިމާއަކަށް އެންމެ ބޮޑު ޚަރަދެއްކުރާ ދާއިރާއަކީ މީހުން ބިނާކުރުމުގެ ދާއިރާކަން." ނައިބު ރައީސް ވިދާޅުވިއެވެ.
މިރަސްމިއްޔާތުގައި ވާހަކަދައްކަވަމުން އެމްޕީއެލްގެ ސީއީއޯ ޝާހިދު އަލީ ވިދާޅުވީ ކޯވިޑްގެ ދުވަސްވަރު އެމްޕީއެލްގެ މުވައްޒަފުން ދެއްކީ އާދަޔާ ޚިލާފު ޤައުމީ ޖޯޝެއްކަމަށެވެ. މުޅި ދުނިޔެއަށް ކުރިމަތިވި ޙާލަތެއްގައި މުވައްޒަފުންގެ މުސާރައާއި ޢިނާޔަތްތައް ވަރަށް ބޮޑަށް ކުޑަކުރަން ޖެހިފައިވީނަމަވެސް މުވައްޒަފުންގެ މަސައްކަތަށް އެއްވެސް މަޑުޖެހުމަށް ނުގެނެސް ޚިދުމަތްތައް އިތުރަށް ފުރިހަމަކުރުމަށް މެނޭޖްމަންޓަށް އެހީތެރިކަން ފޯރުކޮށްދިންކަން ޝާހިދު ފާހަގަކުރެއްވިއެވެ. އަދި ކުންފުނީގެ މާލީ ޙާލަތު މިހާރު ރަނގަޅުވާން ފަށާފައިވާތީ މުވައްޒަފުންގެ މުސާރައާއި ޢިނާޔަތްތައް އަލުން އިޔާދަކޮށްފައިވާކަމަށް ޝާހިދު ވިދާޅުވިއެވެ.
އެމްޕީއެލްއިންވަނީ އަލަށް ކުންފުނީގެ ކޯޕަރޭޓް ސްކޮލަރޝިޕްގެ ދަށުން 6 މީހަކަށް ބޭރަށް ގޮސްގެން ތަމްރީން ފުރިހަމަކުރުމުގެ ފުރުސަތުތަކެއް ފަހިކޮށްދީފައެވެ. އަދި ކޮންމެ އަހަރަކުވެސް އޭލެވެލްގައި އެންމެ މަތީ ނަތީޖާ ހޯދާ އެއްދަރިވަރެއްގެ ޑިގްރީ ޕްރޮގްރާމް އެމްޕީއެލްގެ ޚަރަދުގައި ހަމަޖައްސައިދިނުމަށްވަނީ ނިންމާފައެވެ.
މީގެ އިތުރުން އެމްޕީއެލްގެ ތަރައްޤީއަށާއި ޚިދުމަތުގެ ފެންވަރު ރަނގަޅު ކުރުމަށް ގިނަ މަސައްކަތްތަކެއް އަންނަނީ ކުރަމުންނެވެ. އެގޮތުން މާލެއާއި ހުޅުމާލޭގެ އިތުރުން އައްޑޫސިޓީއާއި ކުޅުދުއްފުށީ ސިޓީގެ ޚިދުމަތުގެ ފެންވަރު ރަނގަޅުކުރުމަށް އެކި މަސައްކަތްކުރަމުން އަންނައިރު ތިނަދޫގެ ބަނދަރުގެ މަސައްކަތް ނިންމައި އަންނަ އަހަރު ބޭނުންކުރަން ފަށާނެކަމަށް އެމްޕީއެލްއިން ވިދާޅުވެއެވެ.
އެމްޕީއެލްގެ 35ވަނަ އަހަރީ ދުވަހުގެ މުނާސަބަތުގައިވަނީ ކޯވިޑްގެ ސަބަބުން ކުރިމަތިވި ފުރަބަންދުގެ ޙާލަތުގައި މަސައްކަތްކުރި މުވައްޒަފުންނަށް ހަނދާނީ ލިޔުން ޙަވާލުކޮށްފައެވެ. އަދި ކުންފުނީގައި މަސައްކަތްކޮށް ރިޓަޔަރވެފައިވާ މުވައްޒަފުންނަށްވެސް ހަނދާނީ ލިޔުން ޙަވާލުކޮށްފައިވެއެވެ. މީގެ އިތުރުން 20 އަހަރަށްވުރެ ދިގު މުއްދަތަކަށް އެމްޕީއެލްއަށް ޚިދުމަތްކުރި މުވައްޒަފުންނަށްވެސް ވަނީ ޝަރަފުގެ އައްޑަނަ ޙަވާލުކޮށްފައެވެ. އަދި އެމްޕީއެލްގެ ސްކޮލަރޝިޕަށް ހޮވުނު މީހުންނަށް ވަނީ އެވޯޑު ޙަވާލުކޮށްދެއްވާފައެވެ.