ރާއްޖޭގެ ޚާރިޖީ ވަޒީރު އަބްދުﷲ ޝާހިދު އދ.ގެ އާއްމު މަޖިލީހުގެ ރައީސްކަމުގެ ހުވާ ކުރެއްވުމާއި ގުޅިގެން، އެމަނިކުފާނަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު މަރުޚަބާ ވިދާޅުވެއްޖެއެވެ.
މިނިސްޓަރ ޝާހިދު އދ.ގެ އާއްމު މަޖިލީހުގެ ރައީސްކަމުގެ ހުވާ ކުރެއްވީ، ނިއުޔޯކްގައި ހުންނަ އދ.ގެ މައި އިދާރާގަ ރޭ ބޭއްވި އެ އިދާރާގެ 76 ވަނަ ސެޝަންގެ ތެރެއިންނެވެ.
މިނިސްޓަރ ޝާހިދުއަށް މަރުހަބާއަށް ދަންނަވާ ކުރެއްވި ޓްވީޓެއްގައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވިދާޅުވީ މިއީ ޚާރިޖީގޮތުން ރާއްޖެއަށް ތާރީޚީ ދުވަހެއްކަމަށާއި، ބައިނަލްއަޤްވާމީ މައިދާނުގަ ރާއްޖެއިން ކުރަމުންދިޔަ މަސައްކަތްތައް މުޅިން އެހެން ހަރުފަތަކަށް ގެންދެވުނު ދުވަހެއްކަމަށެވެ. އަދި މިފަދަ މަޤާމެއް ރާއްޖެއަށް ލިބިގެންދިއުމަކީ ރާއްޖޭއާމެދު ޤައުމުތަކުން ދެކެމުންއައިގޮތް ބަދަލުވެ، ރާއްޖެއާމެދު އިތުބާރު އާވެފައިވާކަމުގެ ހެއްކެތްކަމަށް ރައީސް ވިދާޅުވިއެވެ.
Congratulations to Foreign Minister @abdulla_shahid on being formally sworn in as President of the 76th UN General Assembly.
— Ibrahim Mohamed Solih (@ibusolih) September 15, 2021
This is a watershed moment in our foreign policy and a fine indication of the positive strides Maldives continues to make in international statecraft.
އާންމު މަޖިލީހުގެ 76 ވަނަ ސެޝަންގެ ރިޔާސަތާއި ހަވާލުވެވަޑައިގެން، މިނިސްޓަރ ޝާހިދު ވަނީ އެމަނިކުފާނުގެ ރިޔާސަތުގައި ކުރައްވާނެ މަސައްކަތްތައް ޙިއްސާކުރައްވާފައެވެ. އެގޮތުން 5 ދާއިރާއަކުން މަސައްކަތް ކުރައްވާނެކަމަށް ޝާހިދު ވިދާޅުވިއެވެ.
މީގެތެރޭގައި ޤައުމުތަކަށް ހަމަހަމަކަމާއެކު ވެކްސިން ފޯރުކޮށްދިނުމަށް މަސައްކަތްކުރުމާއި، އިންސާނީ ޙައްގުތަކާއި މޫސުމާ އަދި ޤައުމުތައް ގުޅިގެން މަސައްކަތްކުރުން ހިމެނެއެވެ.