ވާރލްޑް ކަޕްގެ ދެކުނު އެމެރިކާ ސަރަހައްދުގެ ކޮލިފައިންގައި އާޖެންޓީނާ އާއި ބޮލީވިއާ ބައްދަލުރިމެޗް އާޖެންޓީނާ ކާމިޔާބުކޮށްފިއެވެ. އާޖެންޓީނާގައި ކުޅުނު މިމެޗް އެޓީމް ކާމިޔާބުކުރީ 3 ލަނޑު ސުންލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އާޖެންޓީނާއިންނެވެ. އަދި މިމެޗްގައި އާޖެންޓީނާގެ ކެޕްޓަން ލިއޮނެލް މެސީ ވަނީ ހެޓްރިކް ހަދާފައެވެ. މިތިން ލަނޑާއެކު މެސީ މިހާރު ވަނީ ދެކުނު އެމެރިކާ ސަރަހައްދުގައި ޤައުމީ ޓީމަށް އެންމެ ގިނަ ލަނޑު ޖެހި ކުޅުންތެރިޔާގެ މަގާމު ދިފާޢުކޮށް ފައެވެ. މިޝަރަފް ރެ އާއި ހަމައަށް އޮތީ ބްރެޒިލްގެ ކުރީގެ ތަރި ޕެލޭ އަތުގައެވެ. މިމެޗްގައި މެސީގެ ފުރަތަމަ ލަނޑު ޖަހާފައިވަނީ މެޗްގެ 14 ވަނަ މިނެޓްގައެވެ. އަދި ދެވަނަ ލަނޑު މެޗްގެ 64 ވަނަ މިނެޓްގައި ޖަހައިދިން އިރު ފަހު ލަނޑު ޖަހައި، ހެޓްރިކް ފުރިހަމަ ކުރީ 88 ވަނަ މިނެޓްގައި ޖެހި ލަނޑާއެކުއެވެ. މިތިން ލަނޑާއެކު މެސީ މިހާރުވަނީ އާޖެންޓީނައަށް ކުޅެދިން 153 މެޗްގައި 79 ލަނޑު ޖަހައިދީފައެވެ. ޕެލޭއަށް ޖަހާފައިވަނީ 92 މެޗްގައި 77 ލަނޑެވެ. މިމެޗްގައި މީގެއިތުރުންވެސް ލަނޑު ޖަހާނެ ރަނގަޅު ފުރުސަތު ލިބިފައިވާކަން ފާހަގަކޮށްލެވެއެވެ.
މިކާމިޔާބީއާއެކު އާޖެންޓީނާ މިހާރު އުޅެނީ ދެކުނު އެމެރިކާ ސަރަހައްދުގެ ކޮލިފައިންގެ ދެވަނައިގައެވެ. އެއީ ކުޅުނު އަށް މެޗުން ލިބިފައިވާ 18 ޕޮއިންޓާއެކުއެވެ. އަދި ބޮލީވިއާ އުޅެނީ 9 މެޗުން ލިބިފައިވާ 6 ޕޮއިންޓާއެކު ތާވަލްގެ 9 ވަނައިގައެވެ. މިމެޗަށްފަހު އާޖެންޓިނާގެ ކުޅުންތެރިން ވަނީ އެޓީމުން މިއަހަރު ކާމިޔާބުކުރީ ކޮޕާ އެމެރިކާގެ ތަށްޓާއެކު ސަޕޯޓަރުންނާއެކު އުފާފާޅު ކޮށްފައެވެ.