މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އެމްއޭސީއެލްގެ އިމަރޖެންސީ ސަރވިސް، ފަޔަރ އެންޑް ރެސްކިއުގެ ދާއިރާއަށް އަގުހުރި ޚިދުމަތްތަކެއް ކޮށްދެއްވާފައިވާ އަޙުމަދު ފަޔާޒު ކުއްލި ގޮތަކަށް ނިޔާވެއްޖެއެވެ.
ފަޔާޒް އެމްއޭސީއެލްގެ ޚިދުމަތާ ގުޅިވަޑައިގެންފައިވަނީ 1990ވަނަ އަހަރުއެވެ. އެމްއޭސީއެލްގައި 31އަހަރު ޚިދުމަތްކުރައްވުމަށްފަހު، ފަޔާޒް ރިޓަޔަރ ކުރައްވާފައިވަނީ މިއަހަރުގެ މަރޗްމަހު ކަމަށް އެމްއޭސީއެލްއިން މަޢުލޫމާތުދެއެވެ. ރިޓަޔަރ ކުރެއްވިއިރު އޭނާ ހުންނެވީ އެމްއޭސީއެލްގެ ފަޔަރ އެންޑް ރެސްކިއުގެ ޑެޕިއުޓީ ޗީފް އޮފިސަރުގެ މަޤާމުގައެވެ.
މަޢުލޫމާތު ލިބޭގޮތުގަ ފަޔާޒް ނިޔާވެފައިވަނީ އެންމެ ފަހުން ޚިދުމަތް ފެށި، ހޯރަފުށީ އެއަރޕޯޓްގެ އިންސްޕެކްޝަން މަސައްކަތްތަކެއްގައި ހޯރަފުށީގައި ހުންނަވަނިކޮށް ކުއްލިގޮތަކަށެވެ.
ރާއްޖޭގެ ހިނގި އަލިފާނުގެ އެކި ޙާދިސާތަކުގައި އެމްއޭސީއެލްގެ ފަޔަރ އެންޑް ރެސްކިއު ޓީމުގެ އެހީތެރިކަން ފުޅާ ދާއިރާއެއްގައި ދަނީ ފޯރުކޮށްދެމުންނެވެ. މިފަދަ ޙާދިސާތަކުގައި އަލިފާން ނިއްވުމުގެ މަސައްކަތުގަ އިރުޝާދު ދިނުމަށް އެންމެ އިސްކޮށް މަސައްކަތްކުރެއްވި އެއް ބޭފުޅަކީވެސް އަޙުމަދު ފަޔާޒްއެވެ. ފަޔާޒްއަކީ އިމަރޖެންސީ ސަރވިސްގެ ދާއިރާގެ އެކި ރޮނގުރޮނގުން ތަމްރީން ހޯއްދަވައިގެން ހުންނެވި ބޭފުޅެކެވެ.
ފަޔާޒް ނިޔާވިއިރު އުމުރަކީ 49 އަހަރެވެ. ފަޔާޒްގެ ކުއްލި މަރާ ގުޅިގެން ގިނަބަޔަކުދަނީ ހިތާމަ ފާޅުކުރަމުންނެވެ.