ވަރުގަދަ ހަނގުރާއަކަށްފަހު ޠާލިބާން ޖަމާޢަތުގެ ބާރުގެ ދަށަށް އަފްޣާނިސްތާނުގެ ޕަންޖުޝީރު ޕުރޮވިންސް ގެނެސްފިއެވެ.
ޠާލިބާނުންގެ ބާރުގެ ދަށަށް އަފްޣާނިސްތާނުގެ ވެރިރަށް ކާބުލް ގެނައުމަށްފަހު އެ ޖަމާޢަތުގެ ވެރިކަމެއް އެ ޤައުމުގައި ޤާއިމުކުރި ނަމަވެސް އެ ޤައުމުގެ 34 ޕުރޮވިންސްގެ ތެރެއިން އުތުރުގައި އޮންނަ ޕަންޖުޝީރު އެ ޖަމާޢަތުގެ ބާރުގެ ދަށަށް ގެނެވިފައެއް ނުވެއެވެ. ޕަންޖުޝީރަކީ ޠާލިބާނުންނާ ދެކޮޅު ގިނަ ޢަދަދެއްގެ ހަނގުރާމަވެރިން ދިރިއުޅޭ ސަރަހައްދެކެވެ. އެއީ 1980ގެ އަހަރުތަކުގެ ތެރޭގައި އަފްޣާނިސްތާން އިސްތިޢުމާރުކުރި ރަޝިޔާގެ އަސްކަރީ ފައުޖުތަކާ ދެކޮޅަށް ކުރި ޖިހާދުގެ ބަޠަލެއްކަމަށްވާ އަޙްމަދު ޝާހް މައްސޫދަށް ބޮޑު ތާޢީދެއް އޮންނަ ސަރަޙައްދެކެވެ. އަޙްމަދު ޝާހް މައްސޫދުވަނީ 2001ވަނަ އަހަރުގެ ސެޕުޓެންބަރު މަހުގެ ތެރޭގައި ޠާލިބާނުން ދިން ޙަމަލާއެއްގައި މަރުވެފައެވެ. އޭގެ ފަހުން ޠާލިބާނުންނާ ދެކޮޅަށް އެންމެ އިސްކޮށް ޙަރަކާތްތެރިވަނީ އޭނާގެ ދަރިފުޅު އަޙްމަދު މައްސޫދެވެ. އެ ގޮތުން އަފްޢާނިސްތާނުގެ ވެރިކަމަށް ދެވަނަ ފަހަރަށް ޠާލިބާނުން އައުމުން އަޙްމަދު މައްސޫދާއި އޭނާއަށް ތާޢީދުކުރާ ގިނަ ޢަދަދެއްގެ ހަނގުރާމަވެރިންވަނީ ޕަންޖުޝީރަށް ޖަމާވެފައެވެ. ފާއިތުވި ހަފުތާތަކުގެ ތެރޭގައި ޠާލިބާނުންނާއި އިދިކޮޅު ހަނގުރާމަވެރިންނާ ދެމެދު ބަދަލުކުރި ޙަމަލާތަކުގައި ދެ ފަރާތަށް ބޮޑެތި ގެއްލުންތަކެއްވަނީ ލިބިފައެވެ.
ޠާލިބާނުންގެ ބާރުގެ ދަށަށް ޕަންޖުޝީރު ގެނެސްފައިވާކަން އިޢުލާންކުރައްވަމުން އެ ޖަމާޢަތުގެ އެންމެ އިސް ތަރުޖަމާނު ޒަބީހުﷲ މުޖާހިދު ވިދާޅުވީ އަފްޣާނިސްތާނުގެ ހުރިހާ ސަރަޙައްދެއް ޠާލިބާނުންގެ ބާރުގެ ދަށަށް ގެނެސްފައިވާކަމަށާއި އެ ޤައުމުގައި ޞުލްޙަ ޤާއިމުކޮށްފައިވާކަމަށެވެ. އަދި ޠާލިބާނުން އިސްކަންދިނީ މަޝްވަރާކޮށްގެން ޕަންޖުޝީރުގެ މައްސަލަ ޙައްލުކުރުމަށްކަން ފާހަގަކުރައްވަމުން މުޖާހިދު ވިދާޅުވީ އިދިކޮޅު ހަނގުރާމަވެރިން ޞުލްޙަވުމަށް ދެކޮޅުހެދިކަމަށެވެ. އެ ގޮތުން އިދިކޮޅު ހަނގުރާމަވެރިން ތިބީ ޠާލިބާނުންނާ ދެކޮޅަށް ކާމިޔާބު ލިބޭނެކަމުގެ އުއްމީދުގައިކަމަށާއި ނަމަވެސް ހަމަނުޖެހުން ހިންގައި ޤައުމު ފަސާދަކުރަން އެ ޖަމާޢަތުން އެއްވެސް ބަޔަކަށް އެއްވެސް ޖާގައެއް ނުދޭނެކަމުގެ އިންޒާރު މުޖާހިދު ވިދާޅުވިއެވެ. އަދި ޠާލިބާނުންނާ ދެކޮޅަށް ހަނގުރާމަކުރި އިސްވެރިން ހޯދުމުގެ މަސައްކަތްކުރަމުންދާކަމަށާއި އެ މީހުންނަށް އެ ޖަމާޢަތުން މަޢާފުދޭނެކަމަށް އޭނާ ވިދާޅުވިއެވެ.
އޮގަސްޓު 15ވަނަ ދުވަހު ޠާލިބާނުންގެ ބާރުގެ ދަށަށް އަފްޣާނިސްތާނަށް ގެނައުމަށްފަހު އެ ޖަމާޢަތުން އަދި ސަރުކާރެއް އެކުލަވާލައި އިޢުލާންކޮށްފައެއް ނުވެއެވެ. ބެލެވޭ ގޮތުގައި އަފްޣާނިސްތާނުގައި ޤާއިމުކުރާނީ އީރާނުގައި ތަންފީޒުކޮށްފައިވާ އިސްލާމީ ވެރިކަމުގެ ނިޒާމެކެވެ. އެ ގޮތުން އަފްޣާނިސްތާނުގެ ރޫޙީ އިސްވެރިޔާގެ މަޤާމަށް ހައިބަތުﷲ އަޚޫންޒާދާ ޢައްޔަންކުރުމަށްފަހު އެ ޤައުމުގެ އަމީރުގެ މަޤާމަށް ޢައްޔަންކުރާނީ މުއްލާ ޢަބްދުލް ޣަނީ ބަރާދަރުކަމަށް ބެލެވެއެވެ. އޭނާއަކީ ޠާލިބާނުންގެ ދެވަނައަށް އެންމެ އިސްވެރިޔާގެ އިތުރުން އެ ޖަމާޢަތުގެ ބާނީއެކެވެ.
1996ން 2001ވަނަ އަހަރަށް އަފްޣާނިސްތާނުގައި އޮތް ޠާލިބާނުން ވެރިކަމުގެ ދުވަސްވަރުގައި އެ ޖަމާޢަތުގެ ބާރުގެ ދަށަށް ޕަންޖުޝީރު ގެނެވިފައެއް ނުވެއެވެ.