ރާއްޖޭގެ ރަށްތައް ހައި ސްޕީޑް ފެރީގެ ނިޒާމުން ގުޅާލުމުގެ މަސައްކަތުގެ ދަށުން، ޒޯން އެކެއްގެ ދަތުރުތައް ނޮވެމްބަރު މަހު ފަށާނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީ ސީއީއޯ އާދަމް އާޒިމް ވިދާޅުވެއްޖެއެވެ. ޚިދުމަތަށް ބޭނުންވާ ސްޕީޑް ފެރީތަކާއި، ފެރީ ޓަރމިނަލާއި ފެރީ ސްޓޮޕްތަކުގެ މަސައްކަތް މިހާރު ދަނީ ކުރަމުންނެވެ.
އިންޓަރގްރޭޓެޑް ފެރީ ނިޒާމުގެ ޚިދުމަތަށް ބޭނުންވާ ފެރީތައް ބަންނަނީ ގަލްފް ކްރާފްޓާ ހަވާލުކޮށްގެނެވެ. ޒޯން 1ގެ ޚިދުމަތަށް 17 ފެރީ ބަނުމަށް ހަމަޖެހިފަވާއިރު، މީގެ ފުރަތަމަ ފެރީގެ މަސައްކަތް ނިންމާ މިމަހު ޓެސްޓުކުރުމަށްވަނީ ހަމަޖެހިފައެވެ.
ސްޕީޑް ފެރީ ނިޒާމުން ރާއްޖޭގެ ރަށްތައް ގުޅާލުމަށް ކުރިއަށްގެންދާ މަޝްރޫޢަކީ ސަރުކާރުގެ މާސްޓަރ ޕްލޭންގެ ދަށުން ކުރިއަށްގެންދާ ބިޔަ މަޝްރޫޢެކެވެ. ޒޯން އެކެއްގައި ޚިދުމަތް ފެށުމަށް ފަހުގެ ތައްޔާރީތައް މިހާރު އަންނަނީ ވަމުންނެވެ. އެގޮތުން ފުރަތަމަ ލޯންޗް ފެރީގެ އޮނިގަނޑު މުޅިން ނިމި، އެތެރޭގެ މަސައްކަތްތައް ފެށުމަށްވަނީ ތައްޔާރުވެފައެވެ.
ތިލަފުށީގައި ހުންނަ ގަލްފް ކްރާފްޓްގެ ބޯޓް ޔާޑަށް ވަޑައިގެން، ފެރީ ލޯންޗުތައް ބަނުމުގެ މަސައްކަތްތައް ކުރިއަށްދާގޮތް މިނިސްޓަރ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމްއާއި، ރައީސް އޮފީހުގެ މިނިސްޓަރ އަލީ ޝިއާމް އާއި އެމްޓީސީސީގެ ސީއީއޯ ޢާދަމް އާޒިމްވަނީ ބައްލަވާލައްވާފައެވެ.
ފެރީ ނިޒާމުގެ ހުރިހާ މަސައްކަތްތައް ސަރުކާރުން ހަވާލުކޮށްފައިވަނީ އެމްޓީސީސީއާއެވެ. އެމްޓީސީސީގެ ސީއީއޯ ޢާދަމް އާޒިމް ވިދާޅުވީ ކަނޑައެޅިފައިވާ ގޮތަށް ފުރަތަމަ ލޯންޗު މިމަހު ކަނޑަށް ބާލާ، ޓެސްޓް ދަތުރުތައް ފަށާނެކަމަށެވެ.
" ފުރަތަމަ ފެރީ ޓެސްޓުކޮށް އެއަށްފަހު ފެރީތަކުގެ މާސް ޕްރޮޑަކްޝަން ފަށާނީ. މިއަހަރު ނޮވެމްބަރުގަ ޒޯން 1ގަ ޚިދުމަތް ފަށާނަން. 6 ލޯންޗާއެކު ފުރަތަމަ ދަތުރުތައް ފަށާނީ. 17 ލޯންޗާއެކު އޮޕަރޭޝަނަށް ގެނެސް، ޒޯން 1ގެ މުޅި ނިޒާމު ފުރިހަމަވާނެ އަންނަ އަހަރުގެ ޖެނުއަރީ ފެބްރުއަރީ ހިސާބުގައި." އާޒިމް ވިދާޅުވިއެވެ.
ފެރީތަކަކީ 30ނޮޓްސްގެ ބާރުމިނުގަ ދުވާގޮތަށް ހަދާ ފެރީތަކެކެވެ. މިއީ މިހާރު ބޭނުންކުރާ ފެރީތަކަށްވުރެ ހަލުވި ފެރީތަކެކެވެ. ފެރީއެއްގައި އެއްފަހަރާ 50މީހުން އުފުލޭނެއެވެ. މީގެއިތުރަށް ފުރޮޅުލީ ގޮނޑީގައި އުޅޭ މީހުންނާއި، ބަލިމީހުންވެސް ފަސޭހައިން އުފުލޭނެއެވެ.
މިޕްރޮޖެކްޓްގައި ރާއްޖޭގެ ސަރަޙައްދުތައް ޖުމްލަ 6 ޒޯނަށްވަނީ ބަހާލާފައެވެ. ޒޯން 1ގައި ހިމެނޭ ހ.އ، ހ.ދ އަދި ށ. އަތޮޅުގަ މީހުން ދިރިއުޅޭ 40 ރަށް ހިމެނެއެވެ.