ޕްރޮގްރެސިވް ކޮންގްރެސް ކޯލިޝަނުން ރޭ މާލޭގައި ޖަލްސާއެއް ބާއްވައިފިއެވެ. ކާނިވާ ސަރަހައްދުގައި "އައްޑަނަ" ނަމުގައި ބޭއްވި މިޖަލްސާގައި އިދިކޮޅު ޕީޕީއެމް ޕީއެންސީގެ ލީޑަރޝިޕްގެ ބޭފުޅުން ބައިވެރިވެވަޑައިގެންނެވިއެވެ.
މި ޖަލްސާގައި ވާހަކަ ދެއްކެވި އިދިކޮޅު ފަރާތްތަކުން ވަނީ ސަރުކާރަށާއި ޝަރުޢީ މަރުހަލާއަށްވެސް ވަރަށް ބޮޑަށް ފާޑުވިދާޅުވެ ވާހަކަފުޅު ދައްކަވާފައެވެ. އެގޮތުން ރައީސް ޔާމީންގެ މައްސަލަ ބެއްލެވި ފަނޑިޔާރުންގެ ބެންޗަށް ސަރުކާރުން ނުފޫޒް ފޯރުވާކަމަށް ތުހުމަތުކުރައްވާފައިވެއެވެ. އަދި މި ސަރުކާރު އައީ އިންސާފު ގާއިމު ކުރުމުގެ ވައުދާ އެކީގައި ނަމަވެސް، އެކަން ކުރުމުގައި ފެއިލްވެފައިވާކަމަށްވެސް އިދިކޮޅުން ތުހުމަތުކުރެއްވިއެވެ. އަދި ޤައުމުގައި ގިނަ މައްސަލަތަކެއް ހުރިކަމަށްވެސް އިދިކޮޅުން ތުހުމަތުކުރެއްވިއެވެ.
ރައީސް ޔާމީންގެ ޝަރީޢަތް ހިނގި ގޮތާއި ގުޅޭގޮތުން އިދިކޮޅުން ބޮޑު ތުހުމަތުތަކެއްކުރައްވާފައިވާއިރު، ރައީސް ޔާމީންގެ ޝަރީއަތް ހިންގި ޤާޟީންގެ އޯޑިއޯއެއްކަމަށް ބުނެ ދައުރުވާ އޯޑިއޯގެ މައްސަލަ ޖޭއެސްސީން އަންނަނީ ބަލަމުންނެވެ. އަދި އެ ޤާޟީން ވަނީ މައްސަލަ ބެލުމަށް ފުލުހުންނަށް އެބޭފުޅުންގެ އޯޑިއޯ ސާމްޕަލްވެސް ދެއްވާފައެވެ. ޤާޟީން ވަނީ އެބޭފުޅުންގެ މައްޗަށް ކުރާ ތުހުމަތުތައް ދޮގުކުރައްވާފައެވެ.