އެމެރިކާގެ އެހީއާއެކު ދިވެހި އަސްކަރިއްޔާއިން ކުރިއަށްގެންދިޔަ ތަމްރީން ޕްރޮގްރާމްގައި، 36ސިފައިން ތަމްރީންކޮށްފިއެވެ.
"އެކްސަސައިޒް ލެންޓަރން މެޓަލް"ގެ ނަމުގައި ކުރިއަށްގެންދިޔަ ތަމްރީންގައި އެމެރިކާގެ އަސްކަރިއްޔާގެ 11 އޮފިސަރުންގެ ޓީމަކުންވަނީ ހަރަކާތްތެރިވެފައެވެ.
ތަމްރީން ޕްރޮގްރާމްގެ ނިމުން ފާހަގަކުރުމަށް ލ.ކައްދޫގައި ބޭއްވި ރަސްމިއްޔާތު ޝަރަފުވެރިކޮށްދެއްވީ އަލްއުސްތާޛާ މާރިޔާ އަޙުމަދު ދީދީއެވެ. "އެކްސަސައިޒް ލެންޓަރން މެޓަލް"ގެ ތަމްރީން ޕްރޮގްރާމްގައި ކޮމްބެޓް މާރކްސްމަންޝިޕް، ކައުންޓަރ-އައި.އީ.ޑީ އަދި މެރިޓައިމް އިންޓަރޑިކްޝަން އޮޕަރޭޝަންސް ހިމެނެއެވެ.
މި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ މާރިޔާ ވިދާޅުވީ މިއެކްސަސައިޒްއަކީ ދިވެހިރާއްޖެއާއި އެމެރިކާއާ ދެމެދު ޒަމާނުއްސުރެ އޮންނަ ގާތް އަދި ވަރުގަދަ އަސްކަރީ ގުޅުމުގެ މައްޗަށް އޮތް ހެއްކެއްކަމަށެވެ. އަދި ދެޤައުމުގެ ދެމެދުގައި މިދިޔަ އަހަރު ސޮއިކުރި ޑިފެންސް ފްރޭމްވަރކް އެގްރީމެންޓުގެ ސަބަބުން ދިފާޢީ ރޮނގުން ދެޤައުމުގެ ގުޅުން އިތުރަށް ވަރުގަދަވެފައިވާކަން ފެންނަ ކަމެއްކަމަށް ވިދާޅުވިއެވެ.
މިއެކްސަރސައިޒްގައިވަނީ އިންސާނީ ޙައްގުތަކާބެހޭ ބައެއް ހިމަނާފައިވެއެވެ. ސަރުކާރުން އިންސާނީ ޙައްޤުތައް ރައްކާތެރިކުރުމަށް އަޙައްމިއްޔަތުކަން ދެއްވާތީއާއި، ދިވެހި ޤައުމީ ދިފާޢީ ބާރު "ޑިމޮކްރަޓައިޒް" ކުރުމަށް މަސައްކަތްކުރަމުން ގެންދާތީ، ސިފައިންނަށް ހިއުމަން ރައިޓްސްގެ ރޮނގުން ޢިލްމާއި ހޭލުންތެރިކަން ދިނުމަކީ ވަރަށް މުހިންމު ކަމެއްކަން މިނިސްޓަރ މާރިޔާ ވަނީ ފާހަގަކުރައްވާފައެވެ.
އެކްސަރސައިޒް ލެންޓަރން މެޓަލްގެ ދަށުން އެމެރިކާގެ އަސްކަރިއްޔާގެ 11 އޮފިސަރުންގެ ޓީމުންވަނީ އެމްއެންޑީއެފްގެ ޖުމްލަ 36 ސިފައިން ތަމްރީނުކޮށްދީފައެވެ.
ތަމްރީން ޕްރޮގްރާމްގެ ނިމުން ފާހަގަކުރުމަށް އެމްއެންޑީއެފް ސެންޓްރަލް އޭރިޔާ ކޮމާންޑުގައި ބޭއްވި މިރަސްމިއްޔާތުގައި، ޗީފް އޮފް ޑިފެންސް ފޯރސް މޭޖަރ ޖެނެރަލް ޢަބްދުﷲ ޝަމާލާއި، ޔޫ.އެސް އާރމްޑް ފޯރސަސް ކޮންޓިންޖަންޓުގެ ޓީމް ކޮމާންޑަރ ކެޕްޓަން ބެންޖަމިން ޒެއިސް އާއި ކޮންޓިންޖަންޓުގެ އޮފިސަރުން ބައިވެރިވެވަޑައިގެންނެވިއެވެ.