އަފްޣާނިސްތާނުގެ ވެރިކަމަށް ޠާލިބާން ޖަމާޢަތުން އައުމުން ޕާކިސްތާނުގެ ސަލާމަތަށް ނުރައްކާވެފައިވާކަމުގެ ކަނބޮޑުވުން އެ ޤައުމުގެ ސަރުކާރުން ފައުޅުކޮށްފިއެވެ.
ޕާކިސްތާނުގެ އެންމެ ބޮޑު ކަނބޮޑުވުމަކީ ޕާކިސްތާނުގައި ޙަރަކާތްތެރިވާ ޠާލިބާނުންގެ ފަރާތުން އަތުވެދާނެ ޙަމަލާތަކަކަށެވެ. ޕާކިސްތާނުގެ އެންމެ ބޮޑު ޕުރޮވިންސްކަމަށްވާ ބަލޫޖިސްތާނުން އަފްޣާނިސްތާނާ ސަރަޙައްދީ ރޮނގު ޙިއްޞާކުރެއެވެ. އަދި އެއީ ޠާލިބާނުންގެ ނުފޫޒު އެންމެ ބޮޑަށް އޮންނަ ޕާކިސްތާނުގެ ޕުރޮވިންސެވެ. އޭގެ އިތުރުން އެ ސަރަޙައްދުގައި ދިރިއުޅޭ ޤަބީލާތަކުގެ މީހުންނަކީ އައިއެސްއާއި ލަޝްކަރޭ ޠައިބާފަދަ ޖަމާޢަތްތަކަށް ވާގިވެރިވާ ބައެކެވެ. އަފްޣާނިސްތާނުގައި އުފެއްދިފަދަ ސަރުކާރެއް ސިޔާސީ ހަމަނުޖެހުން ބޮޑު ޕާކިސްތާނުގައި އުފެއްދުމުގެ މަސައްކަތްކުރުމަކީ ޕާކިސްތާނަށް ކުރިމަތިވެފައިވާ އެންމެ ބޮޑު ކަނބޮޑުވުމުވެ.
އޮގަސްޓު 30ވަނަ ދުވަހުގެ މެންދަމު އެމެރިކާއާއި ހުޅަނގުގެ އަސްކަރީ އިއްތިޙާދު، ނެޓޯގެ ފައުޖުތައް އަފްޣާނިސްތާނުން ފޭބުމުން އެ ޤައުމުގައި ޙަރަކާތްތެރިވާ އަލްޤައިދާ ޖަމާޢަތުންވަނީ ޠާލިބާނުންނަށް މަރުޙަބާ ކިޔުމަށްފަހު އެ ސަރަޙައްދުގެ ޤައުމުތަކުގައި ހަނގުރާމަވެރި ޖަމާޢަތްތަކުގެ ބާރާއި ނުފޫޒު އިތުރުކުރުމަށް ގޮވާލައިފައެވެ. އެއީ ނުސީދާ ގޮތެއްގައި ޕާކިސްތާނަށް ދިން އިންޒާރެއްކަމަށް އެ ޤައުމުން ބަލައެވެ. ޚާއްޞަކޮށް ޕާކިސްތާނުގެ ޠާލިބާނުންވަނީ އެ ޤައުމުގެ ސަލާމަތީ ބާރުތަކާ ދެކޮޅަށް ދެމުންދާ ޙަމަލާތައް ފާއިތުވި ދުވަސްތަކުގައި އިތުރުކޮށްފައެވެ. އެ ގޮތުން އޮގަސްޓު 30ވަނަ ދުވަހު އަފްޣާނިސްތާނުގެ ސަރަޙައްދީ ރޮނގު ކައިރީގައި ބަދަލުކުރި ޙަމަލާތަކެއްގައި ޕާކިސްތާނުގެ ސިފައިންގެ ދެ މީހުންވަނީ މަރުވެފައެވެ. އެއާއެކު އަފްޣާނިސްތާނުގެ ބިންތައް ބޭނުންކޮށްގެން ޕާކިސްތާނަށް ޙަމަލާދިނުން ހުއްޓުވުމަށް އެ ޤައުމުންވަނީ ޠާލިބާނުންގެ ކިބައިން އެދިފައެވެ. ބެލެވޭ ގޮތުގައި އެ ކަމުގައި ޠާލިބާނުންގެ އެއްބާރުލުމެއް ނުލިބިއްޖެނަމަ އަފްޣާނިސްތާނުގެ ސަރަޙައްދުތަކަށް ޕާކިސްތާނުން ވައިގެ ޙަމަލާތައް ދިނުން އެކަށީގެންވެއެވެ.
އަފްޣާނިސްތާނުގެ ވެރިކަމާ ޙަވާލުވިފަހުން ފާއިތުވި ދެ ހަފުތާގެ ތެރޭގައި ޠާލިބާނުންގެ ސަރުކާރެއް އެކުލަވާލާފައެއް ނުވެއެވެ. މަޢުލޫމާތު ލިބިފައިވާ ގޮތުގައި ޠާލިބާނުން އެކުލަވާލަން ބޭނުންވަނީ އަވަށްޓެރި އީރާނުގައި އޮންނަކަހަލަ ވެރިކަމެކެވެ. އެ ގޮތުން އަފްޣާނިސްތާނުގެ ރޫޙީ އިސްވެރިޔަކަށް ޠާލިބާނުންގެ އެންމެ އިސްވެރިޔާ ހައިބަތުﷲ އަޚޫންޒާދާ އަދި އަފްޣާނިސްތާނުގެ އަމީރުގެ މަޤާމަށް ޠާލިބާނުންގެ ދެވަނައަށް އެންމެ އިސްވެރިޔާ މުއްލާ ޢަބްދުލްޣަނީ ބަރާދަރު ޢައްޔަންކުރާނެކަމަށް ބެލެވެއެވެ. އޭގެ އިތުރުން ސަރުކާރުގެ އިސް މަޤާމުތަކަށާއި ސަރަޙައްދީ ސަރުކާރުތަކުގެ އިސްވެރިންނަށްވެސް ޢައްޔަންކުރާނެކަމަށް ބެލެވެނީ ޠާލިބާނުންގެ އިސް ސަފުން ފެންނަ މީހުންނެވެ.