އެއްގަމު އުޅަނދު ދުއްވުމުގެ ލައިސަންސް ނަގާ ޑްރައިވިން ޓްރެކެއް ހުޅުމާލޭގައި ހެދުމަށް، މޯލްޑިވްސް ވޯޓަރ އެންޑް ސްވަރޭޖް ކޮމްޕެނީ އެމްޑަބްލިއުއެސްސީން، ޓްރާންސްޕޯޓް މިނިސްޓްރީއަށް ތަކެތި ހަދިޔާކޮށްފިއެވެ.
ހުޅުމާލޭގައި އެއްގަމު އުޅަނދު ދުއްވުމުގެ ލައިސަންސް ނަގާ ޑްރައިވިން ޓްރެކެއް ހެދުމަށް، އެމްޑަބްލިއުއެސްސީން އެހީ ދީފައިވަނީ އެ ކުންފުނީގެ އިޖްތިމާޢީ ޒިންމާގެދަށުންނެވެ. އެމްޑަބްލިއުއެސްސީން ބުނެފައިވަނީ މިމަސައްކަތް ކުރިއަށްގެންދިއުމަށް 1 މިލިއަނަށްވުރެ ގިނަ ރުފިޔާގެ ތަކެތި ހަވާލުކޮށްފަވާކަމަށެވެ. މި އެހީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާ ހަވާލުކޮށްދެއްވީ އެމްޑަބްލިއެސްސީގެ މެނޭޖިން ޑިރެކްޓަރ ޙަސަން ޝާހުއެވެ. ޓްރާންސްޕޯޓް މިނިސްޓްރީގެ ފަރާތުން އެހީއާ ހަވާލުވެވަޑައިގަތީ، މިނިސްޓަރ އައިޝަތު ނަހުލާއެވެ.
ހުޅުމާލޭގައި ޤާއިމުކުރަން ހަމަޖެހިފައިވާ ޑްރައިވިން ޓްރެކަކީ ވަރަށް ގިނަ ބަޔަކާ ގުޅިފައިވާ ކަމަކަށްވާތީ، އެފަދަ މަސައްކަތަކަށް އެމްޑަބްލިއުއެސްސީން އިސްނަގައި އެހީތެރިކަން ފޯރުކޮށްދީފައިވާތީ އެކަމަށް ޓްރާންސްޕޯޓް މިނިސްޓަރ ނަހުލާވަނީ ޝުކުރު އަދާކުރައްވާފައެވެ.
އެމްޑަބްލިއުއެސްސީން ބުނެފައިވަނީ މިފަދަ ކަމަކަށް އެކުންފުނިން އިސްނެގީ، އިންޖީނުލީ އެއްގަމު އުޅަނދުގެ ލައިސަންސްނަގާ މީހުންނަށް ޓެސްޓު ހެދުމުގައި ދިމާވެފައިވާ ދަތިތައް ޙައްލުކޮށްދިނުމަށްކަމަށެވެ. ޑްރައިވިން ލައިސަންސް ނެގުމަށް ބޭނުންވާ އެކަށީގެންވާ ޖާގައެއް ނެތުމަކީ ޑްރައިވިން ސްކޫލްތަކަށްވެސް އޮތް ގޮންޖެހުމެއް ކަމަށް އެ ކުންފުނިން ފާހަގަކުރެއެވެ.
މިފަދަ ޓްރެކެއް ޤާއިމުކުރުމާއެކު، އުޅަނދު ލައިސަންސް ނެގުމަށްޓަކާ ދެވޭ ޓެސްޓް ކުރިއަށް ގެންދިއުމަށް ރަނގަޅު މާޙައުލެއް ލިބި، ޑްރައިވިން ޓްރެކް ބޭނުންކުރާ މީހުންނަށް ބޮޑު ފަސޭހައެއް ލިބޭނެއެވެ.
ހުޅުމާލޭގައި މިވަގުތު އެއްގަމު އިންޖީނުލީ އުޅަނދު ދުއްވަން ދަސްކުރާ ވަކި ޚާއްސަ ސަރަޙައްދެއް ހެދިފައެއް ނެތެވެ. ނަމަވެސް އެމްޑަބްލިއުއެސްސީގެ މި އެހީއާއެކު، ލައިސަންސް ނަގާ މީހުންނަށް އެކަށީގެންވާ ސަރަޙައްދެއް ތަރައްޤީކުރެވިގެންދާނެއެވެ.